Ընդդիմադիր ուժերից և քաղհասարակության ներկայացուցիչներից որոնք են համաձայն քննարկել ԸՕ նախագիծը ՀԱԿ-ի առաջարկած 4+4+4 ձևաչափով
16:23, March 22, 2016 | Այլ լրատվամիջոցներ, Նորություններ | Ընտրական իրավունք
Իշխանությունը հաստատել է Ընտրական օրենսգրքի նախագծի շուրջ ընդդիմության և քաղաքացիական հասարակության հետ բանակցելու պատրաստակամությունը:
Մնում է, որ ընդդիմադիր ուժերը և քաղհասարակության ներկայացուցիչները կարողանան համախմբվել, ձևավորել միասնական պլատֆորմ և ստիպեն իշխանություններին գնալ զիջումների և փոխել խնդրահարույց դրույթները:
«Սա փոխհամաձայնության ձևաչափ է, որտեղ պետք է գանք տարբերակների համաձայնությամբ քննարկումներով և փոխզիջումներով: Իրականում առաջարկվածը հավասարակշիռ ֆորմատ է, 4 հոգի իշխող կոալիցիայից, չորս հոգի՝ մեկական ներկայացուցիչ ընդդիմադիր ֆրակցիաներից՝ Կոնգրես, Ժառանգություն, ՕԵԿ և ԲՀԿ: Չորս ներկայացուցիչ քաղաքացիական հասարակությունից, որ պետք է քաղաքացիական հասարակությունը կողմնորոշվի և անուններ տա»,- ներկայացրեց Լ. Զուրաբյանը:
Ըստ պատգամավորի՝ իդեալական տարբերակը կլիներ այն, որ քննարկումները կատարվեին լրատվական միջոցների ներկայացուցիչների ներկայությամբ, անգամ ուղիղ հեռարձակվեին, սակայն, ըստ Զուրաբյանի, հասկանալի է, որ իշխանության համար դա անընդունելի տարբերակ է:
Ամենակարևորն այն է, որ ընդդիմությունը և քաղհասարակության ներկայացուցիչները կարողանան միասնական դիրքորոշում ներկայացնել և պահանջել ընտրություններին մասնակիցների անունների հրապարակում:
«Սա կարևոր բաղադրիչ գործոն է. ընտրակեղծարարության 60-70 տոկոսը կվերացնի: Սա է պատճառը, որ իշխանությունն ամենակատաղի դիմադրությունը ցույց կտա հենց այդ կետում: Եվ հենց դա է պատճառը, որ մենք ամեն ինչ անում ենք, որ մեր համախմբումն էլ լինի հենց այդ կետում, որ կարողանանք համախմբել քաղհասարակության ներկայացուցիչների, քաղաքական կուսակցություններին: Այդ հարցում անգամ ՀՅԴ-ն է կողմ, որ ընտրացուցակները հրապարակվեն, բոլոր ֆրակցիաների ներկայացուցիչները կողմնակից են, ամբողջ հասարակությունը կողմնակից է, միակ դիմադրողն իշխող կուսակցությունն է: Իսկ միջազգային հանրությունը նույնպես փոխել է իր կարծիքը, որովհետև ԵԱՀԿ ԺՄԻԳԻ զեկույցի մեջ շատ հստակ գրված էր, որ չկա որևէ խոչընդոտ և արգելք միջազգային իրավունքի մեջ ցուցակների հրապարակման: Այսինքն, ըստ էության, միջազգային հանրությունը լեգիտիմացրել է մեր պահանջը, և դիվանագետների հետ շփումն էլ դա է ցույց տալիս, որ ընտրացուցակների հրապարակման խնդրի շուրջ որևէ խնդիր չկա, և լուրջ հիմնավորում չկա, որ իշխանությունը կարողանա մերժել»:
Ընդդիմադիր Ժառանգություն կուսակցությունից դեռ չեն որոշել՝ նման ֆորմատով քննարկումներին մասնակցելու են, թե ոչ: Ըստ Ժառանգության փոխնախագահ Արմեն Մարտիրոսյանի՝ այս պահին Ժառանգությունում չի քննարկվել այդ հարցը, պատրաստվում են քննարկել, որից հետո կասեն՝ Ժառանգությունը մասնակից կունենա, թե ոչ: Ըստ Մարտիրոսյանի՝ մինչև հիմա Ժառանգությանը նման առաջարկով չեն դիմել.
«Ոչ գրավոր, ոչ նամակով, ոչ մի ձևի առաջարկ մինչև հիմա չի ստացել Ժառանգությունը: Բայց, կրկնում եմ, կքննարկենք»,- ասաց Մարտիրոսյանը:
Քաղհասարակության ներկայացուցիչները ևս ոգևորված չեն նման ֆորմատով քննարկումներից:
Թրանսփարենսի ինթերնեյշնլ հակակոռուպցիոն կենտրոնի փոխտնօրեն Սոնա Այվազյանը ԳԱԼԱ-ի հետ զրույցում ասաց, որ դեռ կենտրոնը որոշում չունի՝ կմասնակցի, թե ոչ քննարկումներին, իսկ ՀՔԱ Վանաձորի գրասենյակն արդեն իսկ հայտարարեց, որ չի մասնակցելու: Ըստ Արթուր Սաքունցի՝ այդ ֆորմատով քննարկումների ժամանակն արդեն անցել է. «Այդ ֆորմատը մի քիչ ավելի ընդլայնված կազմով, կարծում եմ, մի քիչ շուտ պետք է ստեղծվեր, նախագծի մշակման ժամանակ, ոչ թե արդեն գոյություն ունեցող նախագծի փոփոխությունների նպատակով: Այդ առումով իհարկե մեր կազմակերպությունը չի մասնակցի, որովհետև քաղհասարակության ներկայացուցիչները մի քանի անգամ հրապարակավ ներկայացրել են պահանջները խնդրահարույց կետերի վերաբերյալ: Դրանք հայտնի են թե քաղաքական ուժերին, թե որոշում ընդունողներին, իսկ թե քաղաքական ուժերն ինչքանով հաշվի կառնեն, դա կորոշեն քվեարկության ժամանակ: Իսկ քվեարկողների մեծամասնությունը ՀՀԿ-ն ու ՀՅԴ-ն են, և հիմա իրենք իրենց հայտարարություններում կամ արտահայտություններում որևէ նոր բան չեն ասում, որը հույս կտա մտածել, որ կփոխեն իրենց տեսակետները մասնավորապես ընտրություններին մասնակցած անձանց անունների հրապարակման և այլնի մասով»:
Գլոբալիզացիայի և տարածաշրջանային համագործակցության վերլուծական կենտրոնի խորհրդի նախագահ Ստեփան Գրիգորյանն ասում է, որ ցանկացած քննարկում իրենց համար ողջունելի է, միայն թե ասում է՝ ավելի լայն սպեկտր պետք է ներառել այդ քննարկումներում:
«Ես դեմ չէի լինի նաև մասնակցել, բայց պետք է հասկանանք, որ ցանկացած նախաձեռնություն դրական է, բայց չի կարող ներգրավել ամբողջ հասարակության մասշտաբով: Ես կարծում եմ, որ դա դրական է, բայց ավելի լայն ֆորմատներով պետք է շարունակել քննարկումները: Մեկը մյուսին պետք չէ հակադրել, ես, օրինակ, հաճույքով կմասնակցեի, բավականին լուրջ ուսումնասիրություններ ունենք և կներկայացնենք առաջարկություններ: Այս ֆորմատը դրական է, ողջունում ենք: Ֆորմատները շատ են, և պետք է բոլորն էլ շարունակել օգտագործել»: