0 8000 12 11

Ավելի վաղ տեղեկացրել էինք, որ Հայաստանի արդարադատության նախարարությունը քննարկում է Գյումրիում Ավետիսյանների ընտանիքի սպանության համար ցմահ ազատազրկման դատապարտված Վալերի Պերմյակովի պատիժը կրելու վայրի հարցը:

Թեմայի շուրջ «Հայաստան24»-ը զրուցեց ՀՔԱ Վանաձորի գրասենյակի նախագահ, իրավապաշտպան Արթուր Սաքունցի հետ:

Պարոն Սաքունց, ՀՀ արդարադատության նախարարությունը նշել է, որ Պերմյակովը դատապարտվել է հայաստանյան և ռուսաստանյան դատարանների կողմից: Արդյոք սա հիմք կարո՞ղ է դառնալ վերջինիս` ռուսական կողմին արտահանձնման մասին խոսելու համար:

Սա կեղծ հարցադրում է, որովհետև Պերմյակովը չի գտնվում Հայաստանի Հանրապետության արդարադատության նախարարության ենթակայության որևէ քրեակատարողական հիմնարկում, որի հիման վրա Արդարադատության նախարարությունը կարող է նման հարց նույնիսկ քննարկել: Չի կարող որոշում կայացնել մի մարդու վերաբերյալ, որի պատիժը կրելու նկատմամբ փաստացի հսկողություն չի իրականացնում, ավելին` այդ մարդը չի գտնվում և չի գտնվել թե՛ նախաքննության ընթացքում, թ՛ դատաքննության ընթացքում ՀՀ քրեակատարողական հիմնարկում, հետևաբար ոչ թե արտահանձնման մասին է խոսքը տվյալ դեպքում, այլ խոսքը կարող է միայն գնալ ռուսական կողմի պահանջի կատարման մասին` թույլատրելու կամ թուղթ գրելու գլխավոր դատախազի կողմից Պերմյակովին ՀՀ սահմանով անցկացնելու վերաբերյալ: Իսկ թե ինչուԳլխավոր դատախազությունը, որովհետև ՀՀ դատարանի կողմից Ռուսաստանի Դաշնության քաղաքացին մեղավոր է ճանաչվել հանցագործության կատարման մեջ, և նա չի կարող ազատ ռեժիմով անցնել սահմանը:

Այս դեպքում, ընդգծում եմ, գործ ունենք ոչ թե արտահանձնման, այլ փոխանցման հետ:

Որքանո՞վ կարող ենք վստահ լինել, որ Վալերի Պերմյակովն իր պատիժը կշարունակի կրել նաև ՌԴ տարածքում, և չի կրկնվի նույնը, ինչ եղավ Սաֆարովի դեպքում:

Ռուսաստանի Դաշնության իշխանությունների կողմից որևէ պատասխանատվություն նույնիսկ իր քաղաքացիների նկատմամբ գոյություն չունի, առավել ևս` այլ քաղաքացիների և պետության, այն էլ Հայաստանի Հանրապետության նկատմամբ ՌԴ-ն որևէ պարտավորվածություն չունի, որի հիման վրա կարող ենք միանշանակ ենթադրել, որ նման բան տեղի ունենալ չի կարող: Բայց մյուս կողմից էլ, առնվազն 10 տարի պետք է ենթադրել, որ նա պատիժ կկրի, քանի որ ՌԴ դատարանն է իրեն մեղավոր ճանաչել:

Պերմյակովի` ՌԴ վերադարձի դեպքում ո՞րը կլինի տուժող կողմի` Ավետիսյանների պատասխանը:

Տվյալ դեպքում, երբ արդեն անձը մեղավոր է ճանաչվում հանցագործության կատարման մեջ և դատապարտվում է ազատազրկման, այնտեղ արդեն տուժողի անելիքներն ավարտվում են, բայց այն դատաքննությունը, նախաքննական պրոցեսը, որի արդյունքում անձը մեղավոր է ճանաչվել, ապա դրա հիմնավորվածության վերաբերյալ կասկածների առկայության դեպքում, որը մենք ունենք և գտնում ենք, որ Ավետիսյանների ընտանիքի սպանության քրեական գործով օբյեկտիվ և բազմակողմանի քննություն չի կատարվել, և բոլոր մեղավորները չեն բացահայտված և պատասխանատվության ենթարկված, այս հիմքով մենք կդիմենք Եվրոպական դատարան: Մեզ սա է մնում:

Hayastan24.com