Ռոբերտ Քոչարյանը «քաղաքական հալածյալ» չէ. իրավապաշտպան
15:53, July 31, 2018 | Այլ լրատվամիջոցներ, Նորություններ
Այս օրերին ներքաղաքական օրակարգի համար մեկ հարցը շարունակում է մնալ հանապետության երկրորդ նախագահին առաջադրված մեղադրանքը, նրա կալանավորումն, դրա իրավական հիմքերը: Հարցը իրավական տեսանկյունից դիտարկելու համար VNews.am-ը զրուցել է իրավապաշտպան Արթուր Սաքունցի հետ:
-Պարոն Սաքունց, ինչպե՞ս կմեկնաբանեք մեր իրականության մեջ տիրող վերջին զարգացումները:
-Քրեական հետապնդումն առավել քան հիմնավոր է, որովհետև այդ ամենը տեղի է ունեցել բոլորիս աչքի առաջ: Զինված ուժերն օգտագործվել են ներքաղաքական նպատակներով: Ավելին, բոլոր այն փաստարկները, իբր թե, ներքին անվտանգությանը սպառնալիքներ են եղել, ամենևին չեն համապատասխանում իրականությանը: Խաղաղ հավաքները չեն կարող անվտանգության տեսանկյունից վտանգավոր համարվել: Մարտի 1-ին զորքի ներգրավումը, արտակարգ դրության հայտարարումը, որևէ հիմնավորում չունեին: Ինչ վերաբերում է արտաքին անվտանգությանը, ապա նման դեպքերում զորքը ոչ թե սահմաններից բերում են մայրաքաղաք, այլ՝ հակառակը:
-Իսկ ինչպե՞ս կհիմնավորեք խափանման միջոցի ընտրությունը:
– Ես մեկ հիմնավորում կարող եմ բերել: Նրա ազատության մեջ լինելը կարող է խանգարող հանգամանք դառնալ գործի քննության համար՝ հաշվի առնելով Ռոբերտ Քոչարյանի նախկինում զբաղեցրած պաշտոնը, այդ իշխանության բնույթը, որը կենտրոնացված էր մեկ անձի ձեռքում, իսկ նա իշխանությունն իրականացնում էր ոչ օրինական մեթոդներով: Այդ ամենը ներկայումս ևս կարող է կիրառվել որպես ճնշման մեթոդ՝ հնարավոր վկաների, կասկածյալների նկատմամբ: Եվ հաշվի առնելով նրա, թեկուզ իր նախկին իշխանությամբ պայմանավորված, հնարավորությունները, պարզ է, որ նրա նկատմամբ կալանքը որպես խափանման միջոց կիրառելն առավել քան հիմնավոր էր՝ ելնելով նախաքննության շահերից: Ինչ վերաբերում է անձեռնմխելիությանը, ապա այդ անձեռնմխելիության տրամադրման նպատակը նույն Սահմանադրությամբ ամրագրված սահմանադրական կարգի հիմունքները պաշտպանելուն ուղղված գործողությունների համար է նախատեսված: Իսկ իր գործողություններն ուղղված են եղել հենց սահմադրական կարգի խախտման դեմ: Տվյալ դեպքում անձեռնմխելիությունը չի կարող դիտարկվել որպես փաստարկ՝ պատասխանատվությունից խուսափելու համար:
-Ռոբետ Քոչարյանին փորձ է արվում ներկայացնել որպես «քաղաքական հալածյալ»: Ինչպե՞ս կմեկնաբանեք:
-Վերջին շրջանում Քոչարյանը քաղաքականությամբ չի զբաղվել: Առանձին հարցազրույցները, որոնք տվել է, քաղաքական ակտիվ գործունեության մասին չեն խոսում: Հետևաբար, նա քաղաքական գործունեութուն պետք է իրականացներ, որ քաղաքական հետապնդման ենթարկվեր: Իսկ քաղբանտարկյալ համարվում է մարդը, երբ հետապնդվում է իր կարծիքի, դիրքորոշման համար: Չկա որևիցե նման հիմք, փաստ, որ այդ քրեական գործի շրջանակներում նա հետապնդվում է իր քաղաքական հայացքների համար: Ավելին, դա վերաբերում է 10 տարի առաջվա դեպքերին, երբ նա նախագահ էր: Իսկ այն ժամանակ նրա քաղաքական հայացքները չեն դրված եղել գործունեության հիմքում, այլ հակառակը, Քոչարյանն է եղել ապրօրինի գործողություններով քաղաքական ընդդիմադիրներին հետապնդողը: Եվ հիմա այդ ապօրինությունների համար պատասխանատվության ենթարկելը որակելը որպես «քաղաքական հալածյալ» կամ «քաղաքական հետապնդում» առնվազն պետք է վառ երևակայության արդյունք լինի: