Քննչական վարչությունը հավատ չի ներշնչում «Հարսնաքարի» գործի օբյեկտիվ քննության համար. Արթուր Սաքունց (տեսանյութ)
August 3, 2012Այսօր ՀՀ ոստիկանության քննչական գլխավոր վարչության շենքի առջև «Հարսնաքար» ռեստորանային համալիրում դաժան ծեծի հետևանքով մահացած Վահե Ավետյանի ծննդյան օրվա կապակցությամբ ընթացող բողոքի ակցիային մասնակցում էր նաև իրավապաշտպան Արթուր Սաքունցը, ով mardik.am-ի հետ զրույցում ասաց, որ իրենք քննչական վարչությունից պահանջում են, որ Վահե Ավետյանի և մնացած տուժածների փաստաբաններին տրամադրվեն անհրաժեշտ փաստաթղթեր:
Պրն Սաքունցի խոսքով` «Հարսնաքարի» ողբերգական միջադեպը տեղի է ունեցել հունիսի 17-ին, բայց տուժողի իրավահաջորդին` Վահե Ավետյանի հորը, քննչական գործում ներգրավել են միայն հունիսի 27-ին: «Խոչընդոտներ եղել են նաև տուժողի իրավահաջորդի փաստաբաններին ներգրավելու ընթացքում»,- ասաց պրն Սաքունցը` հավելելով, որ քննչական վարչությունը հավատ չի ներշնչում նաև գործի օբյեկտիվ քննության համար: «Գործը բավական դանդաղ է ընթանում, ավելին` խոսվում էր 15 բռնարարք կատարողների մասին, սակայն առայօր 6 հոգի է ձերբակալված»,- ասաց իրավապաշտպանը:
Հույս ունի արդյոք իրավապաշտպանը, որ սեպտեմբերի 10-ին մանդատից կզրկեն Ռուբեն Հայրապետյանին: Ա. Սաքունցի խոսքով` դա ավելի շատ քաղաքական այն ուժի խնդիրն է, որի անդամ է Ռուբեն Հայրապետյանը, բայց Ռուբեն Հայրապետյանը պատասխանատու է իր մարդկանց վարքագծի համար: « Ավելի կարևոր է Ռուբեն Հայրապետյանին ոչ թե մանդատից զրկելը, այլ նրան օբյեկտիվ ձևով քրեական պատասխանատվության ենթարկելը»,- եզրափակեց Արթուր Սաքունցը:
Աղբյուրը` http://mardik.am/am