«ՍԵՐԺ ՍԱՐԳՍՅԱՆԸ ԼԱՎ ՇԱԽՄԱՏ ՉԻ ԽԱՂՈՒՄ»
00:00, July 2, 2007 | Հավաքների և միավորումների ազատությունՄի քանի տասնյակ քաղաքացիներ այսօր կապել էին իրենց բերանները վզկապներով` ի նշան բողոքի:«Ազատությունը քեզ համար, Հայաստան», «Ազատություն Ռոբերտ Քոչարյանին, Սերժ Սարգսյանին, Տիգրան Թորոսյանին եւ էն մյուսներին», «Մահ կամ ազատություն». այս եւ այլ ցուցապաստառներով մի շարք հասարակական կազմակերպությունների ներկայացուցիչներ, «Ազատություն» ռադիոկայանի ունկնդիրներ Ազատության հրապարակից երթով շարժվեցին Ազգային ժողովի շենք:
Խաղաղ ցույցի մասնակիցները իրենց հետ տանում էին մի երկար ցուցապաստառ՝ վրան նկարված անդեմ 79 պատգամավոր` անուն ազգանուններով:
«Սա ճնշում է 79 հոգու վրա, որոնք կողմ են քվեարկել օրինագծերին: Նրանք անդեմ են, քանի որ չունեն դեմք եւ կարծիք: Իսկ բերաններիս փակելը նշանակում է՝ մեր ձայնը փակում են, մեր իրավունքը տարբեր կարգի տեղեկատվություն ստանալու»,- ասաց «Թրանսփարենսի ինտերնեշնլ» հայաստանյան մասնաճյուղի ղեկավար Ամալյա Կոստանյանը: Խորհրդարանի դարպասներին հասնելով մի քանի տասնյակի հասնող բողոքի ակցիայի մասնակիցները բացեցին բերանները, խախտեցին լռությունը՝ սկսեցին սուլել եւ գոռալ. «Ա-մոթ, ա-մոթ, ժողովրդի «ընտրյալներին»», «Ա-զա-տու-թյուն, ա-զա-տու-թյուն»:
«Սա միանշանակ ազատության դեմ էր, սակայն ակցիան միայն «Ազատության» պաշտպանության համար չէ, այլ ընդդեմ այն բռնապետության, որ տիրում է մեր մեջ: Երեկ «Ա1+»-ն էր, այսօր «Ազատությունը», վաղը կլինեն հասարակական կազմակերպություններ, թերթեր»,- կարծում է Ամալյա Կոստանյանը:
Երեւանի մամուլի ակումբի նախագահ Բորիս Նավասարդյանը վստահ է, որ քննարկվող օրինագծերը միանշանակ ուղղված են «Ազատություն» ռադիոկայանի դեմ: Ըստ նրա` հեռարձակող ԶԼՄ-ների դաշտը կարգավորելու իրոք շատ լուրջ խնդիր կա, եւ նրա մեջ ինչ որ խնդիր անջատելը եւ արագ կարգով քննարկելը խորհրդարանում սխալ է: «Այսօր եթե որեւէ ստանդարտներ որակյալ լրագրության մնում են, ապա նաեւ նրա շնորհիվ է, որ «Ազատությունը» որոշակի նորմեր առաջարկում է եւ տեսել ենք, որ հանրային ռադիոյի որակը բարձրացել է նաեւ շնորհիվ «Ազատության»»,-ասաց նա:
Հայաստանի Հելսինկան կոմիտեի նախագահ Ավետիք Իշխանյանը կարծում է, որ թեեւ մեր իշխանությունները վստահեցնում են, որ օրինագծերը «Ազատություն» ռադիոկայանի դեմ չեն, բայց ոչ ոք չի հավատում:
«Բռնապետության հակումներ ունեցող ցանկացած իշխանություն, իսկ մերոնք այդպիսին են, ամենաշատ սարսափում են խոսքի ազատությունից: Սա «Ա1+»-ի եթերից զրկելու շարունակությունն է, եւ մի փոքր նույնիսկ ուշացրել են իշխանությունները: Եւ կարծում եմ, որ սրան կհետեւեն այլ ճնշումներ տպագիր մամուլի դեմ, քանի որ հասարակության կողմից դիմադրություն չկա»,-ասում է նա: Այնուամենայնիվ, վերջինս վստահ է. «Ամեն դեպքում նույնիսկ ամենաբռնատիրական իշխանության վերջը գալիս է, ինչ որ ձեւով իշխանությունը հեռացնում են: Նրանք հասարկության առաջ պատասխան են տալու»:
Հելսինկյան ասամբլեայի Վանաձորի գրասենյակի նախագահ Արթուր Սաքունցի կարծիքով՝ Սերժ Սարգսյանը իրապես շատ վախեցած է. «Կապում եմ առաջիկա նախագահական ընտրությունների հետ: Այնքան է վախեցած, որ խորհրդարանում մեծամասնություն ունենալով գնում է քաղաքական համաձայնության, միարժամանակ սկսում է լրատվական դաշտի վրա ազդել: Դա շատ կարճ մտածված կոմբինացիա է: ճիշտ է՝ սիրում է շախմատ խաղալ, բայց խաղալ չգիտի, քանի որ ավելի շուտ է մոտեցնում իր վախճանը»:
Գյումրիի «Ասպարեզ» ակումբի նախագահ Լեւոն Բարսեղյանը կարծում է, որ «բարգավաճ ֆեոդալական կլանին ոչ մի կերպ ձեռնտու չի» «Ազատություն» ռադիոկայանի առկայությունը: «Այս մարդիկ ուզում են, որ 2008թ. ընտրություններին իրենց ոչ ոք չխանգարի: Չնայած որ ունեն ընտրակաշառքների հսկայական պաշար եւ բանեցրեցին, բայց նույնիսկ այդ 1 ժամ ու կես եթերից են վախենում: Հանրայինով չի հեռարձակվելու, իսկ մասնավորին էլ Ամալյան Գիրգորը կասի՝ տղերք գործ չունեք, թե չէ լավ չի լինի»:
Ի դեպ, ակցիայից «մասնակցում էին» նաեւ Ազգային անվտանգության աշխատակիցներն ու ոստիկանները:
http://www.a1plus.am/am/?page=issue&iid=50899