ՀՔԱ Վանաձորի գրասենյակն առաջարկներ է ներկայացրել ՀՀ մարդու իրավունքների պաշտպանի ներկայացրած օրենքների նախագծերի վերաբերյալ
18:27, September 14, 2017 | Նորություններ, Սեփական լրատվություն
2017 թ. հուլիսի 3-ին ՀՀ Մարդու իրավունքների պաշտպանի գրասենյակը դիմել է ՀՔԱ Վանաձորի գրասենյակ՝ «Հայաստանի Հանրապետության քրեական դատավարության օրենսգրքում լրացումներ կատարելու մասին», «Ձերբակալված և կալանավորված անձանց պահելու մասին» ՀՀ օրենքում փոփոխություններ և լրացումներ կատարելու մասին» ՀՀ օրենքների և «Հայաստանի Հանրապետության կառավարության 2006թ. օգոստոսի 3-ի թիվ 1543-Ն որոշման մեջ փոփոխություններ կատարելու մասին» ՀՀ Կառավարության որոշման նախագծերի վերաբերյալ առաջարկություններ և դիտողություններ ստանալու նպատակով:
Նշենք, որ վերոնշյալ նախագծերը ՀՀ Արդարադատության նախարարության իրավական ակտերի նախագծերի հրապարակման միասնական կայքում տեղադրված չեն:
ՀՀ մարդու իրավունքների պաշտպանի կողմից ներկայացված օրենսդրական նախագծերի փաթեթի մշակումը ուղղված է երաշխավորելու կալանավորված անձի մերձավոր ազգականի և օրինական ներկայացուցչի հետ տեսակցությունների իրավունքը։
ՀՔԱ Վանաձորի գրասենյակը իրականացված վերլուծության հիման վրա հայտնել է դիրքորոշում, որ անհրաժեշտ է օրենսդրական փոփոխությունների ենթարկել ոչ միայն մեղադրյալների, այլ նաև կասկածյալների և դատապարտյալների արտաքին աշխարհի հետ հաղորդակցվելու իրավունքները ապահովող ազգային նորմերը։
ՀՀ մարդու իրավունքների պաշտպանի կողմից վերհանված խնդիրը ճյուղավորված է իրավական այլ խնդիրներով, որոնք սահմանափակված չեն միայն կալանավորված անձի իրավական կարգավիճակով։ Հիմնախնդիրն է ապահովել մինչդատական, դատական վարույթների և դատավճռի կատարմնան փուլերում ազատությունից զրկված անձանց արտաքին աշխարհի հետ հաղորդակցվելու իրավունքը։
ՀՔԱ Վանաձորի գրասենյակը ներկայացրել է առաջարկություններ ազատազրկված անձանց տեսակցության իրավունքի ապահովման երաշխիքների, սահմանափակումների և պատժախցում գտվելու ժամանակ իրավական հետևանքների վերաբերյալ։ Կազմակերպությունը անհրաժեշտ է համարում գործող օրենսդրությունում կատարել փոփոխություններ, որոնք ուղղված կլինեն վերացնելու պատժախցում գտնվելու ժամանակ ազատազրկված անձանց իրավունքների չհիմնավորված սահմանափակումները և արժանապատվությունը նվաստացնող ձևերի կիրառումը։ Անդրադարձ է կատարվել նաև ՀՀ օրենսդիրի կողմից սահմանված դատապարտյալների՝ արտաքին աշխարհի հետ հաղորդակցվելու իրավունքի նորմերի տարբերակված կարգավորումներին, որոնց համաձայն բանտարկյալների արտաքին աշխարհի հետ հաղորդակցության աստիճանը որոշվում է դատավճռով սահմանված պատժի տեսակից և պատժի կրման ռեժիմից։
Առաջարկները ՀՀ մարդու իրավունքների պաշտպանին ՀՔԱ Վանաձորի գրասենյակը ներկայացրել է 2017 թ. սեպտեմբերի 8-ին:
Առաջարկներն ամբողջությամբ՝ ներկայացված են ԱՅՍՏԵՂ