ՀՔԱ Վանաձորի գրասենյակը հանրագիր է ներկայացրել Քննչական կոմիտեի և Հատուկ քննչական ծառայության մասին օրենքներում փոփոխություններ և լրացումներ կատարելու մասին օրենքների նախագծերի վերաբերյալ
11:20, February 19, 2018 | Նորություններ, Սեփական լրատվություն
2018 թ. փետրվարի 16-ին Հելսինկյան Քաղաքացիական Ասամբլեայի Վանաձորի գրասենյակը ՀՀ Արդարադատության նախարարություն է ներկայացրել հանրագիր, որով առաջարկներ է ներկայացրել «Հայաստանի Հանրապետության քննչական կոմիտեի մասին ՀՀ օրենքում փոփոխություններ և լրացումներ կատարելու մասին» ՀՀ օրենքի և «Հատուկ քննչական ծառայության մասին ՀՀ օրենքում փոփոխություններ և լրացումներ կատարելու մասին» ՀՀ օրենքի նախագծերի վերաբերյալ:
Նախագծերով առաջարկվում է քննչական կոմիտեի նախագահի, նախագահի տեղակալի և հատուկ քննչական ծառայության պետի ու նրա տեղակալի նշանակումը վերապահել, համապատասխանաբար, կառավարությանը և վարչապետին: Գործող օրենքով այդ լիազորությունները վերապահված են ՀՀ նախագահին՝ բացառությամբ հատուկ քննչական ծառայության պետի տեղակալին նշանակելը:
ՀՀ ԱՆ ներկայացված հանրագրով առաջարկվել է.
- «Հատուկ քննչական ծառայության մասին» ՀՀ օրենքում փոփոխություններ և լրացումներ կատարելու մասին» ՀՀ օրենքի նախագծում կատարել փոփոխություն, որով կսահմանվի, որ հատուկ քննչական ծառայության պետին և նրա տեղակալին նշանակում է Ազգային ժողովը` պատգամավորների կամ խմբակցությունների առաջադրմամբ (ձայների հարաբերակցության մասով կարելի է քննարկել):
- «ՀՀ քննչական կոմիտեի մասին» ՀՀ օրենքի 8-րդ հոդվածի 3-րդ մասում «Հանրապետության նախագահին» բառերը փոխարինել «Ազգային ժողովին» բառերով:
- «Հատուկ քննչական ծառայության մասին» ՀՀ օրենքի 3-րդ հոդվածի 6-րդ կետում «Հանրապետության նախագահին» բառերը փոխարինել «Ազգային ժողովին» բառերով:
- ՀՀ Ազգային ժողովի կանոնակարգ սահմանադրական օրենքում լրացնել 128.1 հոդված՝ սահմանելով քննչական կոմիտեի և հատուկ քննչական ծառայության կողմից տարեկան հաղորդում ներկայացնելու և դրանց քննարկման կարգը:
Հնարագիրն ամբողջությամբ՝ ԱՅՍՏԵՂ