«Երաշխիք չկա, որ հետագայում ևս զինվորական գործերով քննություն իրականացնելիս ընտրողական մոտեցում չի ցուցաբերվի»
16:22, September 26, 2013 | Նորություններ | Զինծառայողների/Զորակոչիկների իրավունքներ | Զինված ուժերՀՀ զինված ուժերում մահվան ելքով քրեական գործերի վերանայման հանձնաժողովի աշխատանքները ստվերում և իմաստազրկում ենք ոչ թե մենք, այլ` Սյունիքի նախկին մարզպետ Սուրիկ Խաչատրյանի որդու՝ Տիգրան Խաչատրյանի և թիկնապահի նկատմամբ քրեական հետապնդումը դադարեցնելու մասին ակնհայտ ապօրինի որոշում կայացնողները:
ՄԱՄՈՒԼ.am լրատվականի թղթակցի հետ զրույցում նշեց Հելսինկյան Քաղաքացիական Ասամբլեայի Վանաձորի գրասենյակի նախագահ Արթուր Սաքունցը: Հիշեցնենք, որ սեպտեմբերի 10-ին Սաքունցի ղեկավարած գրասենյակը և «Լրագրողներ հանուն մարդու իրավունքների» ՀԿ-ն հայտարարել էին Հայաստանի զինդատախազության նախաձեռնությամբ ստեղծված՝ Զինված ուժերում արձանագրված մահվան ելքով դեպքերի քննության արդյունավետությունն ուսումնասիրող հանձնաժողովում իրենց մասնակցությունը դադարեցնելու մասին:
«Հաշվի առնելով ՀՀ ՊՆ քննչական ծառայության կողմից Սյունիքի նախկին մարզպետ Սուրիկ Խաչատրյանի որդու՝ Տիգրան Խաչատրյանի և թիկնապահի նկատմամբ քրեական հետապնդումը դադարեցնելու մասին ակնհայտ ապօրինի որոշումը, որը կայացավ ՀՀ զինվորական դատախազ Գևորգ Կոստանյանի անմիջական ուղղորդմամբ և հսկողությամբ, հայտարարում ենք, որ անհնարին ենք համարում մեր հետագա գործունեությունը դեռևս աշխատանքները չսկսած զինծառայողների մահվան հարցերով հանձնաժողովի կազմում»,- ասված էր երկու կազմակերպությունների ղեկավարներ Արթուր Սաքունցի և Ժաննա Ալեքսանյանի տարածած հայտարարությունում:
Երկու ՀԿ-ների հայտարարությունը տարօրինակ էր համարել ՀՀ զինվորական դատախազ Գևորգ Կոստանյանը: «Առավոտ»-ի հետ զրույցում մեկնաբանելովլով հանձնաժողովից դուրս գալու վերաբերյալ նրանց հայտարարությունը` զինդատախազը նշել էր. «Հանձնաժողովը լքելու մասին հայտարարությունները տպավորություն են ստեղծում, որ դրանցով պարզապես փորձ է արվում ստվերել կամ իմաստազրկել հանձնաժողովի աշխատանքները»։ Անդրադառնալով Գ. Կոստանյանի մեկնաբանությանը` Արթուր Սաքունցը նշեց. «Հանձնաժողովի աշխատանքները ստվերել ենք ոչ թե մենք, այլ ՊՆ քննչական ծառայությունը, որը հետագայում պետք է զինվորական գործերով քննություն իրականացներ, ստվերել է հենց զինդատախազը»: Ըստ նրա` Արտակ Բուդաղյանի գործը ևս զինվորական է: ՊՆ քննչական ծառայությունը Բուդաղյանների գործով ակնհայտ ապօրինի վարքագիծ է դրսևորել և ապօրինի որոշում է կայացրել:
«Այդ որոշումը տրամագծորեն ամբողջովին հակասում է գործի նյութերին: Չի կարող մի մարմինը մի գործով լինել անաչառ, մյուս գործերով` կողմնակալ: Մարմնի վարքագիծն ու մոտեցումները պետք է միատեսակ ու կանխատեսելի լինեն: Մինչդեռ ՊՆ քննչական ծառայության կանխատեսելիության բացակայության դեպքում ոչ մի երաշխիք չկա, որ հետագայում զինվորական գործերով քննություն իրականացնելիս ևս ընտրողական մոտեցում չի ցուցաբերվի: Իսկ մենք չենք ցանկանում ընդգրկվել ձևական բնույթ ունեցող հանձնաժողովում»,- ասաց Ա. Սաքունցը:
«Հանձնաժողովի կազմից դուրս գալը պատճառաբանվում է մի հանգամանքով, որն այս փուլում դեռևս առնչություն չունի զինվորական դատախազության հետ։ ՀՀ ՊՆ քննչական ծառայության կողմից քննված քրեական գործով Խաչատրյանի նկատմամբ հետապնդումը դադարեցնելու վերաբերյալ որոշումը մինչ այս պահը չի դարձել Զինվորական դատախազության քննարկման առարկա։ Ավելին՝ դեռ չեն ավարտվել դրա օրինականության ստուգման ընթացակարգերը, և զինվորական դատախազությունը որևէ պաշտոնական գնահատական չի տվել վերը նշված ատախազությունը որևէ պաշտոնական գնահատական չի տվել վերը նշված որոշմանը»,- «Առավոտի» հետ զրույցում հայտարարել էր Գ. Կոստանյանը:
Մինչդեռ Ա. Սաքունցի խոսքով` որոշում կայացնելուց առաջ, հսկողության տրամաբանությունից ելնելով, զինդատախազը պետք է իր ցուցումները տար քննչական մարմիններին: «Քննչական մարմինն առանց զինդատախազության հետ համաձայնության նման որոշում չէր կարող կայացնել»,- նշեց իրավապաշտպանը:
Աղբյուրը՝ http://www.mamul.am