«Ինչո՞ւ է մահվան դեպքերի քննությունն անհրաժեշտ միայն կալանքի վայրերում, բա՞ զինված ուժերում, ծերանոցներում…»
00:00, December 13, 2011 | Նորություններ | Արդար դատաքննության իրավունք | Զինված ուժերԻրավապաշտպան Արթուր Սաքունցը կասկածում է, որ Մարդու իրավունքների ազգային ռազմավարությունը, որն այսօր քննարկման դրվեց, լուրջ առաջընթաց կապահովի ոլորտում:
Henaran.am-ի հետ զրույցում իրավապաշտպանն ասել է. «Ունենք ՄԻ եվրոպական կոնվենցիան, Եվրոպական սոցիալական խարտիան, որին հոդվածների մի մասով Հայաստանը միացել է, վերջին հաշվով ունենք սահմանադրական դրույթներ, այսինքն այն բոլոր իրավական սկզբունքները, որոնք գոյություն ունեն, արդեն իսկ ամրագրված են, հետեւաբար, այստեղ հիմնականում խնդիրը կատարման եւ դրա երաշխիքը հանդիսացող դատական իշխանության մեջ է»:
Իրավապաշտպանը շեշտել է, որ եթե Հայաստանում արդար դատական համակարգ չձեւավորվի, որեւէ փաստաթուղթ, այդ թվում նաեւ նշված ռազմավարությունը արդյունք ունենալ չի կարող: «Մի բան է, դեկլարատիվ ընդունելը, մեկ այլ բան` այն իրականացնելը կամ ոչ պատշաճ իրականացման արդյունքնում մարդու խախտված իրավունքի պաշտպանության արդյունավետությունը»:
Իրավապաշտպանը նշում է, որ զուտ փաստաթուղթը եւս թերություններ ունի: «Օրինակ, եթե կյանքի իրավունքը դիտվում է որպես առաջնահերթ խնդիր, ինչո՞ւ է մահվան դեպքերի քննությունն անհրաժեշտություն համարվում միայն կալանքի վայրերում, բա՞ զինված ուժերում, ծերանոցներում, հոգեբուժարաններում կամ առողջապահական հաստատությունում, երբ մարդը մահանում է ոչ պատշաճ բուժօգնության արդյունքում»,-նկատել է Արթուր Սաքունցը:
Ի դեպ, լսումների ընթացքում այս հարցը քաղաքացիական հասարակության մեկ այլ ներկայացուցչի կողմից հնչեցվել է, ինչին ի պատասխան ԱԱԽ աշխատակազմի ազգային անվտանգության իրականացման ռազմավարության պետ Արամ Թանանյանը ասել է, որ բանակում տեղի ունեցող դեպքերը, որոնք բացառիկ բնույթ են կրում, օրինաչափության ենթակա չեն, ուստի փաստաթղթի մշակողները չեն գտնում, որ դրանք պետք է արտացոլվեն ռազմավարության մեջ:
«Իրավական այն ակտերը, որոնցով կարգավորվում է ԶՈՒ կյանքը, իրավական տեսանկյունից ձեւակերպված են: Դեպքերը որոշակիորեն վերաբերվում են հրամկազմի որոշ մասի` իրենց իրավունքների իրականացմանը եւ հայեցակարգային խնդիր չեն, որ ռազմավարական մակարդակում մենք ձեւակերպենք, հետո իջնենք օրենքների եւ ծրագրերի մակարդակ»,-ասել է նա ու հավելել, որ նշված խնդիրը ԶՈՒ ղեկավարության ուշադրության կենտրոնում է:
Աղբյուրը`http://henaran.am/?p=59432