«ՔԱՆԻ ՉԵՆ ԱՊԱՑՈՒՑԵԼ, ԱՆՄԵՂ ԵՆ»
00:00, November 14, 2007 | Արդար դատաքննության իրավունք
«Մատաղիսի» գործով լրացուցիչ նախաքննությունն ավարտվել է: Ամբաստանյալների փաստաբանները` Ստեփան Ոսկանյանն ու այսուհետեւ նաեւ Հայկ Ալումյանը, մինչեւ դեկտեմբերի 22-ը պետք է ծանոթանան քրեական գործի նյութերին:
«Ծանոթանալուց հետո մի քանի միջնորդություններ կանենք, որոնց ընդունման դեպքում գործը չի գնա դատարան, իսկ հակառակ դեպքում դատարանում կրկին կպաշտպանենք երեք տղաներին»,- «Ա1+»-ին ասաց փաստաբան Հայկ Ալումյանը:
Ըստ նրա` Վճռաբեկ դատարանը , ունենալով այդքան փաստեր, ավելի ճիշտ կաներ եթե որոշեր անմիջապես դադարեցնել հետապնդումը այդ ամբաստանյալների նկատմամբ, այլ ոչ թե դատախազությանը հնարավորություն տար նորից քննելու «Երկու տարբերակ ուներ` կամ վերջնական լուծում տալ, կամ ուղարկել լրացուցիչ նախաքննության: Կողջունեի, եթե վերջնական լուծում տային»,- նշեց նա:
Փաստաբանների պալատի նախագահ Ռուբեն Սահակյանը եւս համամիտ է, որ անհրաժեշտ էր դադարեցնել քրեական հետապնդումը :
Ինչի՞ հետեւանք էր` հարցին` նա պատասխանեց. «գործող օրենքի իներցիան: Այ, հիմա որեւէ գործ չի կարող գնալ լրացուցիչ քննության: Օրենքի թերություն էր,: Օրենքում կար մի տողանցք, որից օգտվեց Վճռաբեկ դատարանը»: Ահա ավելացրեց. «Շատ լավ ծանոթ եմ այդ գործին, շատ լավ քննված գործ է: Չեմ ասում, թե մեղավոր կամ անմեղ են այդ տղաները: Բայց դատելով այն բանից, որ չեն կարողացել ապացուցել նրանց մեղքը, անմեղ են»:
Հիշեցնենք, որ Ռազմիկ Սարգսյանը, Արայիկ Զալյանը եւ Մուսա Սերոբյանը դատական երկու ատյաններում ցմահ ազատազրկման էին դատապարտվել Մատաղիսի զորամասում զինծառայողներ Ռոմա Եղիազարյանի եւ Հովսեփ Մկրտումյանի սպանության մեղադրանքով: Երեք տարուց ավել կալանքի տակ գտնվելուց հետո Վճռաբեկ դատարանի որոշմամբ նրանք ազատ են արձակվել, եւ գործն ուղղարկվել էր լրացուցիչ նախաքննության:
Աղբյուր՝
http://www.a1plus.am/am/?page=issue&iid=54375