Առաջին աշխատանքային քննարկումը «Նախադեպային իրավունքն արդարադատության իրականացման գործընթացում» ծրագրի շրջանակներում
00:00, February 25, 2011 | Քննարկումներ | Արդար դատաքննության իրավունք
2011 թվականի փետրվարի 25-ին Հելսինկյան Քաղաքացիական Ասամբլեայի Վանաձորի գրասենյակում տեղի ունեցավ «Նախադեպային իրավունքն արդարադատության իրականացման գործընթացում» ծրագրի շրջանակներում կազմակերպվող առաջին աշխատանքային քննարկումը:
Ծրագիրը նպատակ ունի ամփոփել կազմակերպության կողմից 2000-2010 թթ. ընթացքում նախաձեռնած դատական գործերը, եւ գնահատել դրանց ազդեցությունը ՀՀ օրենսդրական փոփոխությունների եւ իրավակիրառ պրակտիկայի վրա:
Ծրագրի շրջանակներում կազմակերպված առաջին աշխատանքային քննարկման նպատակն էր՝ ներկայացնել կազմակերպության կողմից 2000-2010 թթ. ընթացքում նախաձեռնած գործերը:
Աշխատանքային քննարկմանը մասնակցում էին փաստաբաններ եւ իրավաբաններ, ինչպես նաեւ ՀՔԱ Վանաձորի գրասենյակի աշխատակիցներ:
Քննարկման ընթացքում մասնակիցները ներկայացրեցին իրենց մասնակցությամբ իրականացված-իրականացվող՝ ՀՔԱ Վանաձորի գրասենյակի կողմից նախաձեռնած գործերը: Դրանք արձանագրվեցին եւ ամփոփվեցին հատուկ մշակված ձեւաչափի մեջ:
Քննարկման ընթացքում մասնակիցները ներկայացրեցին ՀՔԱ Վանաձորի գրասենյակի կողմից նախաձեռնած գործերի թեմաները-ոլորտները:
Ներկայումս ցուցակագրվել են կազմակերպության կողմից նախաձեռնած 30 գործեր, որոնք համալրման ենթակա են եւս 10 գործերով: Մասնակիցների կողմից քննարկվեց նաեւ գործերի ամփոփման նախնական տարբերակը մեկ գործի հիմքով, որը բաղկացած է հետեւյալ բաժիններից.
1. խնդրի նկարագրություն
2. տվյալ իրավահարաբերությունները կարգավորող իրավական նորմեր
3. վերլուծություն
4. եզրահանգումներ:
Գործի ամփոփման քննարկման արդյունքում որոշվեցին նաեւ գործերի ազդեցության գնահատման խնդիրները, մասնավորապես՝ գործերի ազդեցության գնահատման սխեման՝ հիմնականում բաղկացած երկու մասից.
1. կազմակերպության կարողությունների զարգացման գնահատում՝ ըստ ներկայացված գործերի 2000-2010 թվականների ընթացքում
2. ՀՀ իրավակիրառ պրակտիկայի եւ օրենսդրության բարեփոխումների վրա գործերի ազդեցության գնահատում:
Գնահատման երկրորդ բաղադրիչը ներառելու է հետեւյալ դասակարգումը.
1. գործեր, որոնք ունեն նախադեպային նշանակություն՝ դրանց վերաբերյալ կայացված որոշումների իմաստով
2. գործեր, որոնք փոփոխություն են առաջացրել իրավակիրառ պրակտիկայում
3. գործեր, որոնք որեւէ փոփոխություն չեն առաջացրել, սակայն նկարագրում են տիրող իրավիճակը:
Ծրագիրն իրականացվում է Քաունթերփարթ Ինթերնեշնլ կազմակերպության կողմից տրամադրված դրամաշնորհի միջոցով: