0 8000 12 11

2012 թ. նոյեմբերի 24-ին ՀՔԱ Վանաձորի գրասենյակում տեղի ունեցավ «ՀՀ զինված ուժերում մարդու իրավունքների պաշտպանության մեխանիզմների հզորացումը» ծրագրի շրջանակներում իրականացվելիք մոնիթորինգի դասընթացը:

Դասընթացին մասնակցում էին Լոռու, Շիրակի, Տավուշի մարզերից և Երևան քաղաքից ներգրավված հարցազրուցավարները, ովքեր հարցազրույցներ են իրականացնելու զորացրված անձանց հետ 2012 թ-ի դեկտեմբերից մինչեւ 2013 թվականի հունվար ամիսը:

Դասընթացի ընթացքում մասնակիցներին ներկայացվեցին ընտրանքի սկզբունքները և հարցաշարը, որի միջոցով  պետք է իրականացվի հարցազրույցները: Հարցազրույցներ իրականացվելու են ընդհանուր առմամբ 980 զորացրված անձանց հետ, որի նպատակն է բացահայտել զինված ուժերում զինծառայության ժամանակ ներքին բողոքարկման մեխանիզմների արդյունավետությունը, բժշկական ծառայության տրամադրման վիճակը եւ զինծառայության պայմանները:

Ուսումնասիրության արդյունքերը ծրագրի ավարտին կներառվեն զեկույցում, որը կներկայացնի նաև համապատասխան օրենսդրական վերլուծություն:

Ծրագիրն իրականացվում է Ժողովրդավարության հանձնաժողովի փոքր դրամաշնորհների շրջանակներում Հայաստանում ԱՄՆ դեսպանատան կողմից ֆինանսավորվող «ՀՀ զինված ուժերում մարդու իրավունքների պաշտպանության մեխանիզմների հզորացումը» ծրագրի շրջանակներում, որը մեկնարկել է 2012 թ. սեպտեմբերին:

Ծրագրի ընթացքում կպատրաստվեն նաև հետաքննական հոդվածներ, որոնք կանդրադառնան վերոնշյալ հարցերին: