ՀՔԱ Վանաձորի գրասենյակը դիմում է ներկայացրել ՀՀ սահմանադրական դատարան
11:29, January 11, 2012 | Նորություններ | Արդար դատաքննության իրավունք, Տեղեկատվության եւ խոսքի ազատություն2011 թ. դեկտեմբերի 29-ին Հելսինկյան Քաղաքացիական Ասամբլեայի Վանաձորի գրասենյակի կողմից լիազորված ներկայացուցիչներ Արտակ Զեյնալյանը և Արայիկ Ղազարյանը դիմում են ներկայացրել ՀՀ սահմանադրական դատարան՝ «Տեղեկատվության ազատության մասին» ՀՀ օրենքի 3-րդ հոդվածի դրույթները ՀՀ Սահմանադրության 3-րդ, 27-րդ հոդվածներին կամ ՀՀ Սահմանադրության 1-ին հոդվածին և ՀՀ քրեական դատավարության օրենսգրքի 182-րդ, 185-րդ, 262-րդ հոդվածների դրույթները ՀՀ Սահմանադրության 1-ին, 14.1-րդ, 27-րդ հոդվածներին հակասող և անվավեր ճանաչելու վերաբերյալ:
ՀՔԱ Վանաձորի գրասենյակի կողմից ՀՀ սահմանադրական դատարան դիմելու համար հիմք է հանդիսացել ՀՀ հատուկ քննչական ծառայության պետի կողմից կազմակերպության տեղեկատվության հարցմանն ի պատասխան գրությունը:
Կազմակերպությունը 2010 թ. մարտի 17-ին տեղեկատվության հարցմամբ դիմել է ՀՀ հատուկ քննչական ծառայության պետին՝ խնդրելով տրամադրել 2009 թ. հունվարի 1-ից մինչև 2010 թ. փետրվարի 28-ն ընկած ժամանակահատվածում ՀՀ հատուկ քննչական ծառայության կողմից կայացված քրեական գործ հարուցելու մասին որոշումների պատճենները, քրեական գործի հարուցումը մերժելու մասին որոշումների պատճենները, քրեական հետապնդումը դադարեցնելու մասին որոշումների պատճենները, ինչպես նաև քրեական գործը կարճելու մասին որոշումների պատճենները:
ՀՔԾ-ն հարցմանը պատասխանել է հետևյալ կերպ՝ « … Ձեր 2010 թ. մարտի 17-ի գրության ի պատասխան հայտնվում է, որ քրեական դատավարության ընթացքում կայացված որոշումների և դատավարական այլ փաստաթղթերի պատճենները ստանալու իրավասություն ունեցող անձանց շրջանակը և այդպիսիք տրամադրելու կարգը սահմանված է ՀՀ քրեական դատավարության օրենսգրքով, որն ավելի բարձր իրավաբանական ուժ ունի Ձեր կողմից մատնանշած օրենքի նկատմամբ: Դուք նման խնդրանքով հանդես գալու պատշաճ և իրավասու անձ չեք հանդիսանում, հետևաբար, այդ որոշումների պատճենները ձեզ տրամադրելը չի բխում ՀՀ քրեական դատավարության օրենսգրքի և մյուս օրենքների պահանջներից»:
Կազմակերպության կողմից ներկայացված հայցը մերժվել է դատական բոլոր ատյաններում: