«Ճակատին գրված էր, որ պիտի մեռնի, մեռավ, ու ոչ ոք ոչինչ չի կարող անել»
17:53, December 6, 2013 | Այլ լրատվամիջոցներ, Նորություններ | Արդար դատաքննության իրավունք, Զինծառայողների/Զորակոչիկների իրավունքներ, Կյանքի իրավունք | Զինված ուժեր2011 թ. դեկտեմբերի 30-ին «Նորք» ինֆեկցիոն հիվանդանոցում ջրծաղիկի բարդության հետեւանքով մահացած զինծառայող, Շիրակի մարզի Սպանդարյան գյուղի բնակիչ 18-ամյա Հայկ Խաչատրյանի մահվան փաստով դատաքննությունը մոտենում է իր ավարտին: Շատ հնարավոր է, որ այս գործում մեղադրյալներ համարվող Մինաս Մկրտչյանի և Միքայել Միքայելյանի նկատմամբ կիրառվի համաներում: Պաշտոնատար անձինք՝ ՀՀ ՊՆ 14203 զորամասի նյարդաբանական բաժանմունքի պետ Մինաս Մկրտչյանն ու Կենտրոնական կլինիկական զինվորական հոսպիտալի պետ Միքայել Միքայելյանը դատավորին դիմում են ներկայացրել՝ իրենց նկատմամբ համաներում կիրառելու: Եվ ինչպես եւ սպասվում է, դատավորը հաջորդ նիստին կբավարարի նրանց միջնորդությունը:
Իսկ մահացած տղայի ծնողները, հարազատներն ու փաստաբանները որոշել են բոյկոտել դատական նիստերը. արդեն մի քանի նիստ է, այսօր եւ ընդհանրապես չեն մասնակցի այս գործի դատաքննությանը: Նրանք սպասում են դատարանի վճռին, որպեսզի ներպետական ատյաններում գործի լսումից հետո կարողանան դիմել Եվրոպական դատարան:
«Արդեն ցինիզմը հասել է նրան, որ դատավորը արդարադատություն իրականացնելու փոխարեն հայտարարում է, որ Հայկ Խաչատրյանի մահվան մեջ ոչ ոք էլ մեղք չունի, ճակատին գրված էր, որ պիտի մեռնի, մեռավ, ու ոչ ոք ոչինչ չի կարող անել: Ահա քեզ արդարադատություն»:
Հայկ Խաչատրյանի հայրը ասաց, որ իրենք դեռ մեկ ամիս առաջ են հայտարարել դատական նիստերը բոյկոտելու մասին.
«Մենք դատարանում հաղորդել ենք, որ գնալու իմաստ չենք տեսնում, ոչ օրենք կա, ոչ կարգ էս երկրում: Գլխավոր հանցագործն էլ, ով այս երկրի ղեկավարն է, հանցագործներին պատժելու փորարեն ամունիստ է հայտարարել: Մենք վաղուց հայտարարել ու դուրս ենք եկել, սա նշանակում է, որ չենք վստահում այս երկրին, չենք վստահում արդարադատությանը, որ բոյկոտում ենք իրենց բացահայտումները»:
Մովսես Խաչատրյանը ասաց, որ եթե ինքը որոշի նորից դատարան գնալ, դա կնշանակի, որ համաձայնել է մասնակցել այն խեղկատակությանն ու «դերասանությանը», ինչ մտադիր են անել: Այդ իսկ պատճառով հրաժարվել է նիստերից: «Երկրի հանցագործները իրար պադերշկա են անում, որպեսզի գործը փակեն: Բացահայտ աչքերիդ մեջ նայում ու սուտ են ասում, ես էլ ինչ ասեմ: Ես գնամ ինչ անեմ, խեղկատակություն է այնտեղ, անհարմար է: Ես երեւի թե մի նամակ գրեմ այս երկրի հանցագործների պարագլուխ Սերժ Սարգսյանին, ով հովանավորում է բոլոր հանցագործներին, ու վերջացնեմ: Պետք է սպասել մինչեւ վճիռ հրապարակեն, հետո էլ վճիռները հերթով բողոքարկեմ, հերթով մինչեւ Եվրոպական դատարան»:
Մահացած զինվորի հայրը հավատացած է, որ տեղի է ունեցել բացահայտ հանցագործություն. իր որդուն սպանել են, եւ հանցագործները ազատության մեջ են:
«Երեխիս տանջահար անելով աչքիդ դեմն են սպանել, ես գիտեմ, ներկա եմ, եւ սա էն դեպքը չէ, որ սպանեն գաղտնի, վերցնեն ասեն հանկարծամահ կամ ինքնասպան է եղել: Զավեշտը դա է: Ու դրա համար էլ զարմանում եմ, թե այսքանից հետո ո՞նց է, որ ես չեմ խելագարվում կամ ինքնասպան չեմ լինում: Հիմա ինչ ուզում են անեն, ամունիստով ազատ են արձակելու:
Չգիտեմ ինչ ասեմ, այստեղ օրենքը բացարձակապես չի գործում: Հասցրին այնտեղ, որ մինչեւ ամունիստի օրը գար, որ հետո միանգամից դերերը խաղային, լրիվ դերասանություն են անում: Խեղկատակության նման մի բան: Մարդուն, քաղաքացուն ծաղրի են ենթարկում՝ որպես այս երկրի քաղաքացու եւ մահացած զինվորի հոր: Գնամ ի՞նչ անեմ, տեսնեմ, թե ոնց է դատավորն ասում՝ գիտեք ինչ կա, էս-էս հոդվածներով մեղավոր են ճանաչվում, էս-էս հոդվածներով ազատ են արձակվու՞մ… այդ համաներումը հենց այսպիսի հանցագործների համար է հայտարարում: Դուրս են մնում պատժից մարդասպանները, մարգարօհանյանները, իրենց միջի մյուս խուլիգանները, իսկ մի հավ ու ձու գողացողները շարունակում են իրենց դաժան պատիժը կրել: Թու՜, ձեր արդարադատությանը…»,- ասաց Մ. Խաչատրյանը: