0 8000 12 11

ԳԱԼԱ հեռուստաընկերության վարորդ Արմեն Պետրոսյանը 2013 թ. մարտի 25-ին իր բնակարանում ճաշելն ավարտելուց հետո փորձել է գնալ աշխատանքի, սակայն ոստիկանները, առանց որևէ իրավական հիմք ներկայացնելու, շուրջ երեք ժամով ազատազրկել են նրան, իսկ նրան պատկանող VAZ 2106 մեքենան՝ երեք օր ապօրինի պահել ճանապարհային ոստիկանության հատուկ պահպանվող տարածքում:

Երբ Արմեն Պետրոսյանը ոստիկաններին հայտնել է, որ պետք է գնա աշխատանքի և, որ վերջիններս կանչեն նրան օրենքով սահմանված կարգով, ոստիկանության աշխատակիցները զգուշացրել են, որ եթե նրանց հետ չգնա՝ ստիպողաբար կտանեն, քանի որ «պետը զրուցելու բան ունի» նրա հետ:

Ա. Պետրոսյանը՝ ոստիկանի ուղեկցությամբ, նստել է իր մեքենայի ղեկին, իսկ ոստիկանը՝ նրա կողքին: Ճանապարհին նրան զանգել են և շտապ կանչել աշխատանքի: Ա. Պետրոսյանը ուղղություն է վերցրել դեպի ԳԱԼԱ հեռուստաընկերություն և շրջափակվել ոստիկանության մեքենաներով:

Ճանապարհային ոստիկանության աշխատակից Մարտին Սարգսյանը սկսել է քաշքշել Արմեն Պետրոսյանին, ստիպել մեքենան տանի ճանապարհային ոստիկանության հատուկ պահպանվող տարածք, որտեղ մեքենան պահվել է մինչև 2013 թ. մարտի 27-ը:

Նրան տարել են ճանապարհային ոստիկանության պետ Ա. Կարապետյանի մոտ, որն էլ հայտնել է, իբր ինքը Գյումրի քաղաքի Սայաթ-Նովա փողոցի վրա կատարել է ճանապարհային երթևեկության կանոնների խախտում, մասնավորապես, իբր նա հոծ գիծ է հատել: Արմեն Պետրոսյանը պատասխանել է, որ նման խախտում չի կատարել, որից հետո ոստիկանության աշխատակից Գրիգորյանը հանձնարարել է պետավտոտեսուչներին վարչական իրավախախտում կատարելու վերաբերյալ ակտ կազմել, ըստ որի Ա. Պետրոսյանը ենթարկվել է 5 000 ՀՀ դրամ վարչական պատասխանատվության:

Արմեն Պետրոսյանը դիմել է վարչական դատարան՝ խնդրելով ճանաչել իր ազատ տեղաշարժվելու, անձնական ազատության և անձեռնմխելիության իրավունքների խախտման փաստը, ՀՀ ոստիկանության աշխատակիցների ոչ իրավաչափ գործողությունները, ինչպես նաև՝ անվավեր ճանաչել ՀՀ ոստիկանության ճանապարհային ոստիկանության 2013 թ. մարտի 27-ին կազմված տվյալ վարչական ակտը:

Դատարանում Արմեն Պետրոսյանի շահերը կպաշտպանեն ՀՔԱ Վանաձորի գրասենյակի նախագահ Արթուր Սաքունցը և իրավաբան Արայիկ Զալյանը: