Պետք է ոչ թե մերժել, այլ ուղղություն ցույց տալ
00:00, August 9, 2011 | Մամլո հաղորդագրություններ | Արդար դատաքննության իրավունք, Տեղեկատվության եւ խոսքի ազատություն2011 թ. օգոստոսի 9-ին ՀՀ վարչական վերաքննիչ դատարանում տեղի ունեցավ Հելսինկյան Քաղաքացիական Ասամբլեայի Վանաձորի գրասենյակն ընդդեմ ՀՀ Շիրակի մարզի ընդհանուր իրավասության դատարանի նախագահի՝ տեղեկություններ տրամադրելուն պարտավորեցնելու պահանջի մասին գործի քննությունը:
Դատական նիստը նախագահում էր Ա.Աբովյանը, նիստին հայցվոր կողմից մասնակցում է ՀՔԱ Վանաձորի գրասենյակի նախագահ Ա.Սաքունցը, իսկ պատասխանող կողմը դատական նիստին չէր ներկայացել:
Նիստի ընթացքում Ա.Սաքունցի կողմից ներկայացվեց հայցի պահանջը, ինչպես նաև լրացուցիչ պարզաբանումներ՝ համաձայն «Տեղեկատվության ազատության մասին» ՀՀ օրենքի:
Դատավորի այն հարցին՝ եթե դատարանը չի տրամադրում հետևյալ տեղեկատվությունը, ապա կազմակերպությունը ինչ ակնկալիքներ ունի, Ա.Սաքունցը հայտնել է. «Մեր իրավունքն է դիմելու, իսկ դատարանը պարտավոր է տրամադրել, իսկ եթե տեղեկատվությունը չունի, ապա պետք է ուղղություն ցույց տա, թե որտեղից կարող ենք ստանալ հետևյալ տեղեկությունները, այլ ոչ թե մերժել»:
Դատական նիստը հետաձգվեց և նշանակվեց 2011 թ. օգոստոսի 30-ին՝ ժամը 17:05-ին:
Հիշեցնենք, որ 2010 թ. հունիսի 16-ին ՀՔԱ Վանաձորի գրասենյակը դիմում էր ներկայացրել ՀՀ Շիրակի մարզի ընդհանուր իրավասության դատարան՝ խնդրելով կազմակերպությանը տրամադրել տեղեկատվություն 2008 թ. մինչ օրս Շիրակի մարզի ընդհանուր իրավասության դատարանի կողմից կայացված խուզարկությունների թույլտվության մասին որոշումների եւ նշված ժամանակահատվածում խուզարկությունների միջնորդությունները մերժելու մասին որոշումների պատճենները:
2010 թ. հունիսի 25-ին ՀՀ Շիրակի մարզի ընդհանուր իրավասության դատարանի նախագահի կողմից ստացվել էր պատասխան գրություն, որով մերժվել էր պահանջվող տեղեկատվության տրամադրումը: