Վահանին ոստիկանությունում ինքնասպանությա՞ն են հասցրել, թե՞ սպանել
00:00, April 21, 2010 | Նորություններ | ՈստիկանությունՍա, թերեւս, ամենահավանական վարկածն է, որը չի բացառել նաեւ Հատուկ քննչական ծառայությունը` 24-ամյա Վահան Խալաֆյանի մահվան փաստով հարուցված քրեական գործով:
Դա է վկայում նաեւ դիակի դատաբժշկական փորձաքննության արդյունքը: Ի դեպ, փորձաքննությանը քննիչի թույլտվությամբ ներկա է եղել նաեւ տուժողի ազգականը: Ըստ այդմ` ապրիլի 13-ին գողության կասկածանքով Չարենցավանի ոստիկանություն բերման ենթարկված, ապա դանակի մահացու վնասվածքներից մահացած 24-ամյա Վահան Խալաֆյանի դիակի վրա` ոտքերի հատվածում նաեւ բռնության հետքեր են հայտնաբերվել, իսկ հագուստի վրա չեն եղել դանակի այն անցքերը, որոնք առկա են եղել դիակի վրա: Այսինքն` դեպքի պահին Վահանը մերկ է եղել. նկատենք, որ գոնե այս պահի դրությամբ չկա որեւէ տվյալ` Վահանի կամ ոստիկանների` նուդիստ լինելու մասին: Ուրեմն ինչո՞ւ է Վահանը կիսով չափ մերկ եղել… Ու թեեւ ոստիկանությունը համառորեն հերքում է, որ Վահան Խալաֆյանի նկատմամբ ոստիկանության Չարենցավանի բաժնում բռնություն է կիրառվել, եւ որ ինքն է իրեն դանակով հարվածել, այդուհանդերձ Հատուկ քննչական ծառայությունում հարուցվել է քրեական գործ` քր.օր.-ի 110 հոդվածի 1-ին մասի հատկանիշներով «ինքնասպանության հասցնելը»: Այսինքն` այդ հոդվածը գոնե հերքում է ՀՀ ոստիկանապետ Ալիկ Սարգսյանի` նախօրեին առաջ քաշած այն մոտեցումը, որ ոստիկաններն ընդամենը զգոն չեն եղել, եւ ինքը նրանց կարող է մեղադրել միայն ծառայողական անփութություն դրսեւորելու` հանցանքը խոստովանած անձին առանց ձեռնաշղթաների եւ մենակ թողնելու համար, ինչից օգտվելով էլ, իբր պրոֆիլակտիկայի բաժանմունքի պետի, ոստիկանության մայորի աշխատասենյակում գտնվող Վահանը ոստիկանների պահարանից վերցրել է դանակը եւ հարվածել իր որովայնին:
ՀՔԾ-ից տեղեկացնում են, որ Վահանի մահվան փաստով առաջ են քաշվել մի շարք վարկածներ, այդ թվում` ՀՀ ոստիկանության Չարենցավանի բաժնի աշխատակիցների կողմից Վահան Խալաֆյանին սպանելու վարկածը: Ի դեպ, սպանության վարկածը հաստատող հետաքրքիր մանրամասներ է հայտնում նաեւ Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցը, որոնք համընկնում են «Ժամանակ»-ի` օրեր առաջ հայտնած որոշ տեղեկությունների: Մասնավորապես` որ բերման ենթարկվածների մեջ եղել է նաեւ տուժողի եղբայր Վարդանը, ով երկու անգամ դուրս է եկել բաժնից` Վահանի եւ ոստիկանների համար հաց բերելու նպատակով, սակայն երկրորդ անգամ, երբ վերադարձել է, պարզել է, որ եղբայրը դանակահարված է: Վկան` Նորայրը, ով եւս եղել է ոստիկանությունում եւ ում հետ խոսել է իրավապաշտպանը, հայտնել է Չարենցավանի բաժնի պետի տեղակալ Տոնոյանի եւ Վահանի եղբոր միջեւ դեպքից րոպեներ անց ծավալված խոսակցությունը. վերջինս փորձել է պարզել, թե ինչպես է եղել դանակահարման դեպքը, Տոնոյանն էլ պատասխանում է` «Ինքն իրեն խփեց»: «Վահանի եղբայրը մնում է ապշած ու ասում, թե 4-ին 15 պակաս տեսել է եղբորը ու հաց տվել: Վահանի եղբայրը գնում է հիվանդանոց ու այնտեղ իմանում, որ Վահանն արդեն մահացած է», – պատմել է Նորայրը: Այստեղ հարց է ծագում` եթե Վահանին «4-ին 15 պակաս» է եղբայրը հաց տվել, ինչո՞ւ են նրան 15 րոպե անց կրկին ուղարկել հացի հետեւից, ի՞նչ նպատակով… ոստիկանների՞ համար: Արդյո՞ք դրա նպատակը եղբոր ներկայությունից ազատվելը եւ Վահանի նկատմամբ բռնություն գործադրելը չի եղել` ինչ-ինչ նպատակներով: Նկատենք, որ ամբողջը` Վահանին հաց տալուց մինչեւ դանակահարություն (16.05 րոպե), կատարվել է շատ արագ` ընդամենը 20 րոպեում:
Դրան հավելենք նաեւ իրավապաշտպանին հայտնի դարձած մյուս մանրամասները, որոնք նա լսել է հազիվ շարժվող ու սթրեսային վիճակում գտնվող Նորայրից. «Երիտասարդը հազիվ հասկացրեց, որ ինքն ուրիշ սենյակում է եղել, բայց կողքի սենյակներից մնացածների ծեծի ձայները լսել է, իսկ ժամը 16.00-ին մոտ, երբ պետի տեղակալ Տոնոյանը եկել է, իրարանցում է սկսվել: Պատմեց, որ ոստիկանները հայհոյում էին, գոռգոռում, ու հանկարծ ձայները դադարեցին: Մեկ էլ իմանում է, որ Վահանին ուզում են տեղափոխել հիվանդանոց: Վահանի եղբայրը ներքեւում խոսում է Տոնոյանի հետ, ով նրան ասում է` եղբայրդ խփեց: Տղան կարծում է, թե եղբայրը ոստիկաններից մեկին է խփել, դե երեւի հարվածել է ձեռքով: Հարցնում է` ո՞ւմ խփեց: Սա պատասխանում է` ինքն իրեն խփեց: Վահանի եղբայրը մնում է ապշած ու ասում, թե 4-ին 15 պակաս տեսել է եղբորը ու հաց տվել…»: Այստեղ իրավապաշտպանը մի դիտարկում է անում` «Մինչեւ Տոնոյանի գալը ամեն ինչ նորմալ ընթացք է ունեցել»: Վահանը նույնիսկ ոստիկաններին հաց ուտելու է հրավիրել:
Եվ կրկին հարց է ծագում` արդյո՞ք Վահանին չեն սպանել, եւ արդյո՞ք ոստիկանության Չարենցավանի բաժնում մարդկանց խոշտանգելու, պաշտոնեական հանցագործությունները թաքցնելու դեպքերը մի քիչ շատ չեն: Հիշեցնենք, որ ԱԺ նախկին պատգամավոր, «Սասուն» ջոկատի հրամանատար Սասուն Միքայելյանի դեմ սուտ ցուցմունքներ կորզելու համար տեղի ոստիկանությունում հենց նրա մարտական ընկերներին, համագյուղացիներին էին ծեծում… Ակամա հիշեցի նաեւ տարիներ առաջ տեղի ունեցած Գեւորգ Մանուկյանի հետ կապված դեպքը, երբ նա ընկերների հետ իր ավտոմեքենայով գնացել էր մայր եւ աղջիկ մարմնավաճառների ծառայություններից օգտվելու, հետո տղաների մեջ վեճ էր ծագել, հարվածել էին Գեւորգի գլխին, ինչից հետո մեքենան շուռ էին տվել եւ գործը փակել «ավտովթարով»: Ուշագրավն այն էր, որ հենց Չարենցավանի ոստիկանության տարածք տեղափոխված եւ նրանց հսկողության տակ գտնված մեքենայի միջից անհետացել էին Գեւորգի արյան հետքերով ներծծված բոլոր իրեղեն ապացույցները, որոնք կարող էին հավաստել ոչ թե ավտովթարի, այլ սպանության մասին: Այժմ էլ գուցե ոստիկանները փորձեն որոշ իրեղեն ապացույցներ թաքցնել` իրենց կաշին փրկելու համար… Ու մինչեւ ե՞րբ… Մինչեւ հաջորդ Ղուլյան կամ Խալաֆյա՞ն:
ԱՂԲՅՈՒՐԸ` http://www.zhamanak.com/article/14730/