Հայաստանի իշխանությունների «դասերը» ԵՄ-ին. արժե մտածել ծախսերի արդյունավետության մասին
15:19, May 2, 2017 | Այլ լրատվամիջոցներ, Նորություններ
Օրերս ՀՀ քննչական կոմիտեն տեղեկություն տարածեց Եվրոպական միության պատվիրակության կողմից Հայաստանին հատկացված դրամաշնորհների գումարներից առանձնապես խոշոր չափերի հափշտակության մասին: Պաշտոնական աղբյուրը չի հաղորդում գումարի չափի մասին, բայց հայտնի է, որ գործել է մի ամբողջ խումբ. 10 հոգուց ավելի հափշտակության գործին մասնակից են եղել:
Հարուցվել է քրեական գործ, նրանցից մեկի նկատմամբ մեղադրանք է առաջադրվել, կա նաեւ տեղեկություն, որ երեք անձի նկատմամբ միջազգային հետախուզում է հայտարարված:
Կոնկրետ որքան գումարի մասին է խոսքը՝ հայտնի չէ, բայց տարբեր աղբյուրների վկայակոչմամբ դրանք մի քանի հարյուր միլիոն դրամի են հասնում:
Անդրադառնալով տեղի ունեցածին՝ իրավապաշտպան, ՀՔԱ Վանաձորի գրասենյակի համակարգող Արթուր Սաքունցը երեք փաստ է առանձնացնում:
Առաջինն, ըստ նրա, այն է, որ իշխանությունները տարիներ շարունակ ստեղծել ու գումար են աշխատել ֆեյք ՀԿ-ների միջոցով.
«Այդ կազմակերպությունների գործունեությունը որեւէ տեղ որեւէ ձեւով չի երեւացել, որպես իրավաբանական անձ գործող ՀԿ-ներ չեն հանդիսացել: Դրանք նույն այն ՀԿ-ներն են, որոնց մենք հանդիպում ենք եւ այս վերջին ընտրությունների ժամանակ էլ տեսանք որպես դիտորդներ: Դրանք ֆեյք դիտորդական առաքելություն իրականացնող կազմակերպություններ են, որոնք շատ դեպքերում հիմնադրվում են հենց իշխանությունների կողմից կամ մարդկանց կողմից, ովքեր իշխանությունների հետ սերտ կապերի մեջ են»:
Հաջորդն, ըստ Սաքունցի, այն է, որ երկրում, որտեղ կոռուպցիան համակարգային բնույթ ունի, եւ կոռուպցիայի դեմ համակարգային պայքարի քաղաքական կամք չկա, այդ երկրում միջազգային կառույցների գործունեությունը եւս դատապարտված է:
«Այսինքն, մի երկրում, որտեղ կա այդպիսի համատարած կոռուպցիա, դու չես կարող լիարժեք քո ծրագրերն իրականացնել: Մնում է որոշես՝ ներդրումներ կկատարես, եթե կա պայքար կոռուպցիայի դեմ: Եթե չկա, ուրեմն ոչ միայն վտանգված է գործունեության արդյունքը, այլեւ կոռուպցիան կարող է նաեւ սողոսկել քո մարմինները»:
Ըստ Սաքունցի՝ կարեւոր երրորդ փաստն այն է, որ ԵՄ պատվիրակությունը ոչ թե քողարկեց, այլ բացահայտեց եւ կասեցրեց կոռուպցիան, ինչը լավագույն դասն է ՀՀ իշխանություններին.
«Եվրամիության պատվիրակության ղեկավար Պյոտր Սվիտալսկին իր օրինակով ցույց տվեց, որ ինչպես պետք է պայքարել կոռուպցիայի դեմ: Այսինքն, ոչ թե պետք է փորձես կոծկել՝ այն մտայնությամբ, որ պետք է հեղինակությանը վնասի, այլ հակառակը՝ հեղինակությանը կվնասի կոռուպցիայի շարունակականությունը: Եվ պետք է ունենալ քաջություն եւ քաղաքական կամք դրսեւորել կոռուպցիայի դեմ պայքարելու եւ արմատախիլ անելու համար, որը հեղինակության իրական բացահայտումն է:
Սա ուղերձ է Հայաստանի իշխանություններին, որ աննահանջ պայքար պետք է մղել կոռուպցիայի դեմ»:
Տարիներ շարունակ ոչ միայն հասարակական կազմակերպությունները, այլեւ բազմաթիվ ազնիվ քաղաքացիներ, լրատվամիջոցները բարձրաձայնել են, որ երկրում կոռուպցիայի պայքարի համար տրվող գումարները մսխվում են: Սակայն միջազգային կառույցները շարունակաբար ֆինանսավորել են Հայաստանի իշխանություններին: Արդյոք սա դաս կլինի միջազգային կառույցներին եւ այսուհետ կսկսեն մտածել հատկացվող ֆինանսների նպատակահարմարության եւ արդյունավետ ծախսերի մասին:
Իրավապաշտպանն ասում է.
«Կարեւոր սկզբունքն այն է, որ ԵՄ-ն՝ հանձինս ՀՀ-ում ԵՄ պատվիրակության, համոզվեց, որ շատ ավելի կոշտ եւ համարժեք պետք է լինեն իրենց պահանջները եւ դիրքորոշումները երկրում կոռուպցիայի դեմ պայքարի ուղղությամբ, որ անհրաժեշտ է ստեղծել այնպիսի մի միջավայր, որտեղ երկկողմ համագործակցությունը լինի արդյունավետ: Այս իմաստով կարծում եմ ֆինանսական ներդրումների արդյունավետությունը կբարձրանա այն իմաստով, որ պահանջները ֆինանսական միջոցների արդյունավետության առումով կբարձրանա:
ԵՄ-ն արդեն ինքն իր դրամաշնորհների հատկացման հետ կապված նաեւ մի եզրակացություն պետք է ստանա, որ քաղաքական նպատակահարմարությունը չպետք է գերակշռի տվյալ երկրում խնդիրների լուծման ուղղությամբ: Չի կարելի քաղաքական նպատակահարմարություններից ելնելով աչքաթող անել թերություններ կամ էլ տուրք տալ իշխանությունների հավաստիություններին, որ դրանք ժամանակավոր եւ էական նշանակություն չունեցող թերություններ են»:
Աղբյուրը` www.galatv.am