0 8000 12 11

 ՀՀ այն քաղաքացիները, ում հետաքրքրում է ՌԴ բանակում, այդ թվում և Գյումրիում տեղակայված 102-րդ ռազմաբազայում ծառայության անցնելու հեռանկարը, 2015 թվականի հունվարի 2-ից այդպիսի հնարավորություն ունեն: Տարեսկզբին ՌԴ նախագահ Վլադիմիր Պուտինը ստորագրել է դեռ 2003 թվականից շրջանառության մեջ գտնվող հրամանագիրը , որը ենթադրում է, որ օտարերկրացի 18-30 տարեկան երիտասարդները առնվազն 5 տարի ժամկետով կարող են պայմանագրային զինծառայություն անցնել Ռուսաստանի զինված ուժերում կամ ներքին զորքերում, եթե նրանք տիրապետում են ռուսերենին, քրեական անցյալ կամ դատվածություն չունեն:Նորակոչիկները, ինչպես գրված է հրամանագրում, կներգրավվեն նաեւ ռազմական գործողություններին:

Հրամանագիրը իրավապաշտպան Արթուր Սաքունցի բնորոշմամբ ամբողջովին Վլադիմիր Պուտինի քաղաքականության տրամաբանության մեջ է, և հիմքում դրված է Եվրասիական միության ծրագրի իրականացումը.

«Մենք լավ հասկանում ենք, որ այդ ձևակերպմամբ Պուտինը իրականում հանդես է գալիս որպես ռուսական նոր կայսրության գաղափարի իրականացնողը»,- ասում է Սաքունցը:

Քիչ հավանական է, որ այս օրենքից կօգտվեն եվրոպական երկրների կամ, ասենք, ԱՄՆ-ի քաղաքացիները: Ռազմական հարցերով ռուսաստանցի փորձագետներ Պավել Ֆելգենհաուերը և Ալեքսանդր Գոլցը BBC-ին հայտնել են, որ նոր պայմանագիրն ընդամենը օրինականացնում է այն, ինչը տարիներով գոյություն է ունեցել, իսկ հին մեթոդներով ՌԴ զինված ուժերում ծառայել են հիմնականում նախկին Խորհրդային Միության այն երկրների քաղաքացիները, որոնց նկատմամբ ՌԴ գործող իշխանությունները, այսպես ասած, «հավակնություններ» ունեն. «Այդ երկրներում, ըստ էության, ինքնիշխանության կարևոր ազգային ինստիտուտներից մեկը հանդիսանում է զինված ուժերը, և ինքը այդ օրենքով ստեղծում է այլընտրանք այդ երկրների քաղաքացիների համար, որպեսզի նրանք բացի ազգային զինված ուժերից ունենան նաև ռուսական կայսրության ազգային ուժերում ծառայության անցնելու հնարավորություն, և կարծում եմ սա հիմնականում միտված է հենց այդ ազգային պետական կարևորագույն ինստիտուտների թուլացմանը, որովհետև, այնուամենայնիվ, ինչքան էլ որ ռուսական կայսրության բանակը հիմա բազմաթիվ խնդիրներ ունի, այն ավելի լավ առաջարկ կարող է ներկայացնել, քան, ենթադրենք, սեփական ազգային բանակները կամ զինված ուժերը:

Օրենքը ռուսական կայսրության տեսանկյունից շատ տրամաբանորեն բխում է և պրագմատիկ լուրջ քայլ է: Այստեղ մտահոգություն պետք է ունենան ազգային պետությունները, որոնց մնացած վերջին ինքնուրույնության և ինքնիշխանության ինստիտուտը, ինչպիսին զինված ուժերը և բանակն է, կարող են բավական լուրջ մարտահրավեր ունենալ հանձինս նման օրենքի»,- նկատում է իրավապաշտպանը: ՀՀ պաշտպանության նախարարությունում այս հրամանագիրը, սակայն, մտահոգության տեղիք չի տվել, մամլո խոսնակ Արծրուն Հովհաննիսյանն ասում է. «Չեմ կարծում, որ Հայաստանին ինչ-որ բան է սպառնում, դա կարող է Ռուսաստանի հայերին հետաքրքրի»:

Ռազմական փորձագետ Ալեքսանդր Գոլցը BBC-ին ասել էր, որ պայմանագրային զինծառայողի ամսական աշխատավարձը 30 հազար ռուբլի է, մոտավորապես 500 ԱՄՆ դոլար: Արծրուն Հովհաննիսյանը պնդում է, որ սա մեծ թիվ չէ. «Մոտ 400 դոլար մենք ենք տալիս, գումարած առանձին դիրքերի ծառայություններով, եթե հաշվենք, մեր մոտ ավելի շատ կարող է ստացվի»,- ասում է Արծրուն Հովհաննիսյանը: Հարցին, թե այս օրենքը կարո՞ղ է պատճառ հանդիսանալ, որպեսզի ՀՀ ՊՆ-ը վերանայի պայմանագրային զինծառայողների աշխատավարձը, պատասխանում է. «Նախարարությունը պայմանագրայինի պայմանները տարեցտարի վերանայում է, ըստ պետության հնարավորությունների»:

Կասկածի տակ չդնելով այն փաստը, որ ՌԴ այս հրամանագիրը ամբողջությամբ սահմանադրական է և բխում է երկրի շահերից, իրավապաշտպան Արթուր Սաքունցը հարկ է համարում նկատել. «Սրանով Պուտինը ձևավորում է արտասահմանյան լեգիոն, վարձկանների թիմ: Ըստ երևույթին, Պուտինը կարդում է բյուզանդական կայսրության պատմությունը, բայց վատ է հասկանում, որովհետև հենց վարձկանների ինստիտուտը հանդիսացավ բյուզանդական կայսրության քայքայման պատճառներից մեկը, որովհետև այդ մարդիկ իրենց երկրի կամ կայսրության համար չէին պայքարում, այնպես որ, վարձկանների ինստիտուտի ձևավորմանն ուղղված այդ օրենքը կարճաժամկետ կտրվածքով մարտահրավեր է ազգային պետությունների համար, երկարաժամկետով՝ հենց ռուսական կայսրության համար, որովհետև վարձկանները նրանք ոչ թե գաղափարի մարտիկներ, այլ վարձու աշխատողներ են»:

Աղբյուրը՝ galatv.am