«Սերժ Սարգսյանն իր վրա է վերցնում ՀՀ-ում կոշտ ավտորիտար համակարգի ձեւավորման պատասխանատվությունը». Սաքունց
10:14, April 12, 2018 | Այլ լրատվամիջոցներ, Նորություններ
«ՀՀԿ գործադիր մարմնի այդ միահամուռ որոշումն արդեն իսկ վկայում է այդ կուսակցությունում միանձնյա ղեկավարման ստալինյան ոճի առկայության մասին»,- նման կարծիք հայտնեց իրավապաշտպան Արթուր Սաքունցը՝ անդրադառնալով ՀՀԿ խոսնակի հայտարարությանը, որ ՀՀԿ գործադիր մարմինը միահամուռ առաջարկել է Սերժ Սարգսյանին որպես վարչապետի թեկնածու:
Իրավապաշտպանի խոսքով, Սերժ Սարգսյանին վարչապետի թեկնածու առաջադրելու մասին ՀՀԿ-ի որոշումն առավել ցայտուն հիմնավորում է Freedom House իրավապաշտպան կազմակերպության տված գնահատականը.
«Այս պարագայում Սերժ Սարգսյանն իր վրա է վերցնում Հայաստանում կոշտ ավտորիտար համակարգի ձեւավորման պատասխանատվությունը, ժողովրդավարական պետություն ունենալու պատասխանատու անձն ինքը կհրաժարվեր, անկախ այն հանգամանքից, որ մի քանի տարի առաջ հայտարարել էր, որ չի հավակնելու ոչ նախագահի, ոչ վարչապետի պաշտոնին:
Իշխող կուսակցությունը ոչ միայն ապացուցեց Freedom House-ի տված գնահատականը ավտորիտարիզմի խորացման վերաբերյալ, այլեւ իր որոշմամբ քայլ կատարեց այդ ուղղությամբ: Դա ոչ միայն կոշտ ավտորիտարիզմի ձեւավորման ուղղությամբ քայլ էր, այլեւ բռնապետական կառավարման ուղղված քայլ, որի «հաճույքներից» շատերը, որոնք խորը անտարբերությամբ են նայում ՀՀ-ում տեղի ունեցող իրադարձություններին, որոնք Սերժ Սարգսյանին ներկայացնում են միակ արեւմտամետը, կվայելեն բռնապետական կառավարման այդ հաճույքները»: