0 8000 12 11

2016 թվականի ապրիլի 13-ին Լոռու մարզի ընդհանուր իրավասության դատարանում, նախագահությամբ՝ Վ. Հովնանյանի, շարունակվեց «Ավան հոգեկան առողջության կենտրոն ՓԲԸ-ը՝ ընդդեմ ՀՔԱ Վանաձորի գրասենյակի և Ժուլետա Ամարիկյանի գործով» դատաքննությունը:

Այս դատական նիստին ներկայացել էին հայցվոր կողմի ներկայացուցիչ, փաստաբան Է. Բադեմյանը, պատասխանող ՀՔԱ Վանաձորի գրասենյակի ներկայացուցիչ փաստաբան Ա. Զալյանը: Պատասխանող Ժ. Ամարիկյանը և գործով ինքնուրույն պահանջ չներկայացրած երրորդ կողմ «Ազատություն» ռադիոկայանի ներկայացուցիչը չէին ներկայացել դատական նիստին:

Լսելով կողմերի կարծիքը՝ դատական նիստը վերջիններիս բացակայությամբ անցկացնելու վերաբերյալ՝ Դատարանն անցավ ապացույցների հետազոտմանը:

Պատասխանող կողմի՝ հայցային վաղեմություն կիրառելու վերաբերյալ միջնորդության առնչությամբ հայցվոր կողմը դատարան ներկայացրեց հայցադիմումը դատարան ներկայացնելու ժամկետների վերաբերյալ փոստային անդորրագիր:

Ինչպես արդեն տեղեկացրել ենք, 2015 թ. հոկտեմբերի 20-ի դատական նիստին պատասխանող կողմը միջնորդություն է ներկայացրել հայցային վաղեմություն կիրառելու մասին այն հիմքով, որ հայցվոր կողմը հայցադիմումը դատարան է ներկայացրել ՀՀ Քաղաքացիական դատավարության օրենսգրքի դրույթների խախտմամբ:

Հայցվոր կողմը հրապարակային ներողություն խնդրելու, դատարանի վճիռը լրատվամիջոցներով հրապարակելու և փոխհատուցում վճարելու պահանջների մասին նախ հայցադիմում է ներկայացրել Երևան քաղաքի Ավան և Նոր Նորք վարչական շրջանների ընդհանուր իրավասության դատարան, սակայն Դատարանը հետ է վերադարձրել հայցադիմումը՝ ընդդատյա չլինելու պատճառաբանությամբ, որից հետո 2014 թ. դեկտեմբերի 8-ին հայցվոր կողմը նույն պահանջով հայցադիմում է ներկայացրել Լոռու մարզի ընդհանուր իրավասության դատարան, որի առնչությամբ դատավոր Բ. Գրիգորյանը որոշում է կայացրել հայցադիմումը վերադարձնելու վերաբերյալ, քանի որ այն ներկայացված է եղել ՀՀ Քաղաքացիական դատավարության օրենսգրքի 88-րդ հոդվածի 1-ին (Հայցադիմումին կցվում է սահմանված կարգով և չափով պետական տուրքի վճարած լինելը հավաստող փաստաթուղթ կամ օրենքով նախատեսված դեպքերում` պետական տուրքի վճարման ժամկետը հետաձգելու կամ տարաժամկետելու կամ դրա չափը նվազեցնելու վերաբերյալ միջնորդություն) և 92-րդ հոդվածի 1-ին կետի 5-րդ ենթակետի խախտմամբ (չեն ներկայացվել սահմանված կարգով և չափով պետական տուրքի վճարումը հավաստող փաստաթղթեր, իսկ այն դեպքերում, երբ օրենքով նախատեսված է պետական տուրքի վճարումը հետաձգելու կամ տարաժամկետելու կամ դրա չափը նվազեցնելու հնարավորություն` բացակայում է դրա վերաբերյալ միջնորդությունը կամ նման միջնորդությունը մերժվել է):

2015թ. հունվարի 23-ին հայցվոր կողմը կրկին հայցադիմում է ներկայացրել Լոռու մարզի ընդհանուր իրավասության դատարան, որը 2014 թ. հունվարի 26-ին ընդունվել է դատավոր Վ. Հովնանյանի վարույթ:

Ներկայացված բոլոր դեպքերում հայցվոր կողմը հայցադիմումը դատարան է ներկայացրել ՀՀ Քաղաքացիական դատավարության օրենսգրքի դրույթների խախտմամբ:

2016 թ. ապրիլի 13-ի դատական նիստի ընթացքում հայցվոր կողմը դատարան ներկայացրեց փոստային առաքման վերաբերյալ անդորրագիր, որով փաստվում է, որ հայցվորը երրորդ անգամ հայցադիմումը Լոռու մարզի ընդհանուր իրավասության դատարան ուղարկել է 2014 թ. դեկտեմբերի 25-ին (ինչը դատարանն ստացել է 2015 թ. հունվարի 23-ին), սակայն հայցվոր կողմը որևէ ապացույց չկարողացավ ներկայացնել այն մասին, թե երբ է ստացվել Լոռու մարզի ընդհանուր իրավասության դատարանի դատավոր Բ. Գրիգորյանի՝ հայցադիմումը վերադարձնելու մասին որոշումը, որից հետո եռօրյա ժամկետում հայցվոր կողմը պարտավոր էր ներկայացնել հայցադիմումը:

Դատարանն անցավ ապացույցների հետազոտման փուլին, որի ընթացքում հետազոտվեցին գործում առկա փաստաթղթերը, տեսաերիզները:

Պատասխանող կողմի ներկայացուցիչ, ՀՔԱ Վանաձորի գրասենյակի իրավաբան Ա. Զալյանը միջնորդություն ներկայացրեց newspress.am լրատվական կայքի «Աղի հանքի հոգեբուժարանում հիվանդներին ծեծում են» վերնագրով նյութը քննվող գործին կցելու վերաբերյալ, որտեղ Ավան հոգեկան առողջության կենտրոնում բուժում ստացած 39-ամյա Ա. Չատինյանը դժգոհում է կենտրոնում տիրող իրավիճակից: Նյութում անդրադարձ է կատարվել Կենտրոնի վերաբերյալ այլ դժգոհությունների ևս:

Դատարանը մերժեց ներկայացված միջնորդությունը, քանի որ գործն արդեն գտնվում է դատաքննության փուլում:

Ապացույցների հետազոտման փուլը համարելով ավարտված՝ Դատարանը նշանակեց վճռի հրապարակման օր:

Դատարանի վճիռը կհրապարակվի 2016 թ. ապրիլի 28-ին՝ ժամը 17:00-ին:

Տես նաև՝ hcav.am