Հաշմանդամության կարգ չստացած Ս. Գ.-ի հայցի քննությունը շարունակվեց՝ առանց ԲՍՓ ներկայացուցիչների
17:52, February 20, 2018
Այսօր՝ 2018 թ․ փետրվարի 20-ին ՀՀ Վարչական դատարանը շարունակեց քննել ՀՀ ԱՍՀՆ ՀՀ Բժշկասոցիալական փորձաքննության գործակալության դեմ հաշմանդամության կարգ չստացած Ս. Գ.-ի հայցը:
Վերջինիս շահերը դատարանում ներկայացնում է Հելսինկյան քաղաքացիական ասամբելայի Վանաձորի գրասենյակի Երևանի ներկայացուցչության իրավաբան Տաթևիկ Սիրադեղյանը:
Նրանք պահանջում են անվավեր ճանաչել Ս. Գ.-ի համար հաշմադամության կարգ չսահմանելու՝ ՀՀ ԱՍՀՆ ՀՀ Բժշկասոցիալական փորձաքննության գործակալության Երևանի թիվ 5 բժշկասոցիալական փորձաքննական հանձնաժողովի որոշումը:
Այսօր ԲՍՓ ներկայացուցիչները դատարան չէին ներկայացել, իսկ Երևանի թիվ 5 բժշկասոցիալական փորձաքննական հանձնաժողովի նախագահ Անահիտ Մարտիրոսյանը դատական նիստը հետձագելու միջնորդություն էր ներկայացրել, որով հայտնել էր, որ գործակալության աշխատակիցները մասնակցում են վերապատրաստումների և դասընթացների։
Հայցվորի ներկայացուցիչ Տ. Սիրադեղյանը կարևորեց գործը ողջամիտ ժամկետում քննելու հանգամանքը, քանի որ դա էական նշանակություն ունի Ս․ Գ.-ի համար: Նա ուշադրություն հրավիրեց այն հանգամանքին, որ միջնորդությանը որևէ ապացույց չի կցվել:
Դատարանը մերժեց միջնորդությունն ու դատական նիստը շարունակեց պատասանողի բացակայությամբ:
Տ. Սիրադեղյանը ներկայացրեց հայցի հիմքերն ու առարկան, գործով կիրառելի իրավական ակտերի շրջանակը և նշեց, որ Ս․ Գ.-ի մոտ առկա հիվանդությունն առաջացնում է կենսագործունեության սահմանափակում, հետևաբար, նրան պետք է հաշմանդամության կարգ տրվեր:
Դատարանը հարցեր ուղղեց հայցվորին և նրա ներկայացուցչին, որից հետո գործը համարեց դատաքննությանը պատրաստ։
Հաջորդ դատական նիստը նշանակվեց 2018 թ․ մարտի 20-ին՝ ժամը 11։45-ին։