«Էլեկտրիկ Երևանի» մասնակցի բողոքը վերաքննիչը ևս մերժեց. վճռաբեկ բողոք կներկայացվի (Տեսանյութ)
17:59, July 20, 2017 | Նորություններ, Սեփական լրատվություն | Ազատության և անձնական անձեռնմխելիության իրավունք, Հավաքների և միավորումների ազատություն
2017 թ. հուլիսի 20-ին ՀՀ Վերաքննիչ քրեական դատարանը շարունակեց «Էլեկտրիկ Երևանի» մասնակից Միքայել Կիրակոսյանի և նրա ներկայացուցիչ, ՀՔԱ Վանաձորի գրասենյակի Երևանի ներկայացուցչության իրավաբան Տաթևիկ Սիրադեղյանի բողոքի քննությունը և գործով որոշում կայացրեց:
Հիշեցնենք՝ 2015 թ. հուլիսի 6-ին բողոքի վայրից բռնությամբ բերման ենթարկվելու և դրա արդյունքում վնասվածքներ ստանալու վերաբերյալ Մ. Կիրակոսյանի ներկայացրած հանցագործության մասին հաղորդման հիման վրա ՀՀ Հատուկ քննչական ծառայությունում քրեական գործ էր հարուցվել և 2016 թ. դեկտեմբերի 26-ին կարճվել: Դատարան ներկայացված բողոքով պահանջվել էր պարտավորեցնել վարույթն իրականացնող մարմնին վերացնել Մ. Կիրակոսյանի իրավունքների և ազատությունների խախտումը:
2017 թ. մայիսի 11-ին Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը մերժեց բողոքը, որից հետո վերաքննիչ բողոք է ներկայացվել:
Վերաքննիչ դատարանում կայացած նախորդ դատական նիստը հետաձգվել էր վերաքննիչ բողոքի վերաբերյալ վարույթն իրականացնող մարմնի և գործը հսկող դատախազի դիրքորոշումը ևս լսելու նպատակով, քանի որ վերջիններս դատական նիստին ներկա չէին:
Հուլիսի 20-ին հրավիրված դատական նիստին ևս վարույթն իրականացնող քննիչը չէր ներկայացել: Դիրքորոշում հայտնեց ՀՀ Գլխավոր դատախազության դատախազ Վաղարշակ Մկրտչյանը: Նա բողոքն անհիմն համարեց, իսկ հավաքը սահմանափակելու և ֆիզիկական ուժ կիրառելու ոստիկանության գործողությունները՝ իրավաչափ:
Իր խոսքում դատախազ Վ. Մկրտչյանը չանդրադարձավ բողոքում նշված այլ հանգամանքների, մասնավորապես՝ Մ. Կիրակոսյանի՝ անձնական ազատության և անձեռնխելիության, հավաքների ազատության իրավունքների սահմանափակմանը ոստիկանության կողմից:
Մ. Կիրակոսյանի ներկայացուցիչ Տ. Սիրադեղյանը հայտարարությամբ հանդես եկավ և նշեց, որ ՀՀ Ոստիկանությունը հավաքի վայրի նկատմամբ սահմանափակում կիրառելու իրավասությամբ օժտված չէ, և անդրադարձավ ստիկանության բաժնում գտնվելու ընթացքում Մ. Կիրակոսյանի անձնական ազատության և անձեռնմխելիության իրավունքի խախտման փաստին:
Այսքանով դատարանը բողոքի քննությունն ավարտված համարեց և ավելի ուշ հրապարակված որոշմամբ բողոքը մերժեց: Մ. Կիրակոսյանն ու նրա ներկայացուցիչը քրեական գործը կարճելու որոշումը կբողոքարկեն նաև Վճռաբեկ դատարանում:
Լուսանկարն ու տեսանյութերը՝ aravot.am-ի
Տես նաև՝ a1plus.am