ՙԱվան հոգեկան առողջության կենտրոն ՓԲԸ-ը՝ ընդդեմ Ժուլետա Ամարիկյանի և ՀՔԱ Վանաձորի գրասենյակի՚ գործով հերթական նախնական դատական նիստն ավարտվեց. Դատաքննությունը՝ հոկտեմբերի 19-ին
14:35, September 23, 2015 | Նորություններ, Սեփական լրատվություն
2015թ. սեպտեմբերի 23-ին Լոռու մարզի ընդհանուր իրավասության դատարանում, նախագահությամբ՝ դատավոր Վ. Հովնանյանի, տեղի ունեցավ ՙԱվան հոգեկան առողջության կենտրոն ՓԲԸ-ը՝ ընդդեմ Ժուլետա Ամարիկյանի և ՀՔԱ Վանաձորի գրասենյակի՚ գործով հերթական նախնական դատական նիստը: Դատական նիստին ներկա էին հայցվոր կողմի ներկայացուցիչ Էդգար Բադեմյանը և պատասխանող կողմի ներկայացուցիչ, ՀՔԱ Վանաձորի գրասենյակի իրավաբան Արայիկ Զալյանը: Պատասխանող կողմ Ժ. Ամարիկյանը և գործով ինքնուրույն պահանջ չներկայացրած երրորդ անձ, ՙԱզատություն՚ ռադիոկայանի ներկայացուցիչը դատական նիստին չէին ներկայացել: Դատարանը, հաշվի առնելով այն հանգամանքը, որ վերջիններս պատշաճ կերպով ծանուցվել են դատական նիստի մասին, որոշեց նիստը շարունակել նրանց բացակայութամբ:
Դատարանի հարցին, թե արդյոք պատասխանող կողմը առարկություններ ունի հայցվոր կողմի՝ 3մլն դրամ վճար բռնագանձելու վերաբերյալ պահանջի առնչությամբ, Ա. Զալյանը նշեց, որ պատասխանող կողմը նախորդ դատական նիստերի ժամանակ արդեն ներկայացրել է իր առարկությունները:
Գործը համարվեց Դատաքննության նախապատրաստված: Դատաքննությունը նշանակված է 2015թ. հոկտեմբերի 19-ին՝ ժամը 16:00:
Տես նաև՝ hcav.am