Գյումրու 102-րդ ռազմաբազայի «բարդակին» լուծում չի տրվում… վտանգ կա թե ծառայողների և թե հարակից բնակիչների կյանքի համար
16:28, October 24, 2017 | Այլ լրատվամիջոցներ, Նորություններ
Գյումրեցի քաղաքագետ Գագիկ Համբարյանը, երեկ հղում անելով իր աղբյուրներին, «Ֆեյսբուք» սոցիալական ցանցի միջոցով հանրությանը տեղեկացրել էր, որ Գյումրիում տեղակայված 102-րդ ռազմաբազայում մահացել է 2 զինծառայող։ «Ալագյազ» զորավարժարանում զենքի հետ անզգույշ վարվելու պատճառով ռազմաբազայի պայմանագրային զինծառայողներից մեկը կրակել է ընկերոջ վրա (նա մահացել է), որից հետո ինքնասպանություն է գործել։
Ընդ որում, նախքան Համբարյանի՝ ուշ գիշերին կատարած գրառումը, միջադեպի մասին որևէ տեղեկություն չէին հայտնել ոչ ռուսական կողմը, ոչ էլ Հայաստանի իրավապահ մարմինները՝ չնայած դեպքը տեղի էր ունեցել ժամը 16.00-ի սահմաններում։
«Առաջին լրատվական»-ի հետ զրույցում Գագիկ Համբարյանը նշեց, որ դժբախտ պատահարը պետք չէ կապել բազայի կարգուկանոնի հետ, բայց, այնուամենայնիվ, կա մտահոգիչ հանգամանք. «Ինձ այլ հարց է հետաքրքրում՝ եթե դեպքը եղել է 16.00-ի սահմաններում, ինչո՞վ է պայմանավորված այն փաստը, որ հայկական կողմը տեղյակ չի լինում դրանից։ Դեպքը ՀՀ տարածքում է եղել, բայց իշխանությունները իմանում են համացանցից։ Իմ հրապարակումից մեկ ժամ անց ռուսական կողմը՝ Հարավային զինվորական օկրուգի ներկայացուցիչները պաշտոնական հայտարարություն տարածեցին ռուսական «Ria.ru» կայքով։ Իհարկե հասկանում եմ, որ բազան ռուսական է, խնդիրները հիմնականում կապված են պաշտոնական Մոսկվայի հետ, բայց չպետք է մոռանանք, որ բազան գտնվում է ՀՀ տարածքում, և բոլոր իրադարձությունների վերաբերյալ տեղեկատվությունը պետք է հայ հասարակությունը ևս իմանա»։
Արդյոք Ավետիսյանների սպանությունից հետո բազայի կարգուկանոնին պատշաճ ուշադրություն դարձվո՞ւմ է՝ հարցին ի պատասխան մեր զրուցակիցն արձագանքեց. «Ռազմաբազայի զինվորները անցյալ տարի Գյումրիում «Մայր Հայաստան» կոչվող համալիրի մոտ իրար սպանեցին, դրանից հետո մանր-մունր տարբեր հանցագործություններ եղան, և այն, որ բազայում կա կարգուկանոնի խնդիր, մեզ՝ գյումրեցիներիս համար նորություն չէ։ Կոնկրետ այս պարագայում չեմ կարող ասել, թե միտումնավոր գործած հանցագործություն է։ Այն, ինչ ես եմ իմացել, և ինչ ասում է ռուսական կողմը, համապատասխանում են մեկը մյուսին. դժբախտ պատահար է եղել, ինչի արդյունքում զոհվել է երկու ռուս զինծառայող։ Ինձ համար, որպես ՀՀ քաղաքացի, կարևոր է, որ պատահարի արդյունքում չեն զոհվել ՀՀ քաղաքացիներ»։
Իրավապաշտպան, Ավետիսյանների իրավահաջորդի ներկայացուցիչ Արթուր Սաքունցը միջադեպը մտահոգիչ է համարում։ «Առաջին լրատվական»-ի հետ զրույցում Սաքունցը նշեց, որ Ավետիսյանների ընտանիքը սպանության փաստով հարուցված քրեական գործի շրջանակներում այդպես էլ իրավական գնահատական չստացավ բազայի հրամանատարական կազմի գործողությունների, հենց Պերմյակովի անմիջական հրամանատարի գործողությունների հետ կապված՝ նրանք ընդհանրապես դատարան չներկայացան. «Հենց դա անպատժելիության վարքագիծը խրախուսող հանգամանք էր։ Ոչ ռուսական կողմը խնդիր դրեց, ոչ էլ հայկական կողմը պահանջատեր եղավ։ Ես չեմ էլ զարմանում, որ նման դեպքեր են լինում։ Պարզապես հերթական անգամ արձանագրենք, որ ՀՀ տարածքում գտնվող ռուսական բազայի նկատմամբ ՀՀ իշխանությունների, պետական մարմինների կողմից պատշաճ մշտադիտարկում ու վերահսկողություն գոյություն չունի։ Եվ նաև առանձին քրեական գործերով էլ չեն տրվում գնահատականներ։ Բազայի հետ կապված նման իրավիճակը արդեն համոզում է, որ վտանգ կա թե բազայի ծառայողների և թե հարակից բնակիչների կյանքի համար»։
Սաքունցը շարունակում է՝ այն տվյալները, որ ներկայացնում են իրենց գործընկերները Ռուսաստանի ԶՈՒ-երի հետ կապված, չեն կարող իրենց արտացոլումը չունենալ ՌԴ ԶՈԻ-երի այլ ստորաբաժանումների վրա. «Բայց հիմնական պատասխանատվությունը ոչ միայն ռուսական կողմի վրա է՝ պատշաճ պայմաններ ապահովելու իմաստով, այլ նաև մենք պետք է արձանագրենք, որ ՀՀ իշխանությունները հարց չեն բարձրացնում սեփական երկրի քաղաքացիների անվտանգության հետ կապված»։
Հետաքրքրվեցինք՝ նորմա՞լ է, որ հայկական կողմն այդքան ուշ է իմանում բազայում տեղի ունեցած միջադեպի մասին: «Իհարկե, նորմալ չէ, բայց խնդիրն այն է՝ ռուսական կողմը պարտավորություն ունի՞ հայտնելու, իրազեկելու ՀՀ իշխանություններին, որ նման հանցագործություն է եղել՝ չգիտեմ, պայմանագրով չեմ հիշում, որ նման դրույթ ամրագրված լինի։ Բայց քանի որ հայ-թուրքական պաշտպանությունը հանձնված է ռուսական կողմին, և ռուսական բազան էլ գործում է մեր տարածքում, շատ տրամաբանական կլիներ, որ լիներ նման պարտավորություն Հայաստանի նկատմամբ։ Կարող են արտակարգ դեպքեր լինել, օրինակ՝ զինված բունտ, խժդժություն, որը կարող է դուրս գալ բազայի սահմաններից և անմիջապես սպառնալ հարակից բնակչության ու ՀՀ քաղաքացիների անվտանգությանը»,- եզրափակեց ՀՔԱ Վանաձորի գրասենյակի ղեկավար, իրավապաշտպան Արթուր Սաքունցը։