0 8000 12 11

ՀՔԱ Վանաձորի գրասենյակի ղեկավար, իրավապաշտպան Արթուր Սաքունցը, Newsline-ի հետ զրույցում Ոստիկանության գործողությունները գնահատելով, նկատեց, որ Ոստիկանությունը կատարեց պատժիչ գործողություն, որը ինքնագլուխ գործողություն չէր.«Դա Բաղրամյան 26-ից իջեցված հրահանգ էր: Ինձ մոտ այնպիսի տպավորություն ստեղծվեց, որ այն բոլոր վարժանքները, որ  ոստիկանության տարբեր կառույցներ ուսուցողական ծրագրերի շրջանակներում ացնել են, այդ ամենը, կարծեք, փորձարկվեց իր ամբողջ դաժանությամբ: Եթե դիտարկեին, որ հրապարակում ոչ բոլորն էին ցուցարար, կային նաև ոստիկանության աշխատակիցներ, կհասկանային, որ 100 ցուցարարի նկատմամբ այդ ջրի շիթերը կիրառելը պարզապես ցինիզմ է: Ախմախ գործողություն է, որն անմարդկային է իր ողջ բովնակությամբ: Սա տիպիկ օրինակ է, երբ անմարդկայինն անգրագիտության հետևանք է: Ոչ թե մտածված է, որ դաժանություն անեն, այլ սա անգրագետ գործողություն էր: Եթե նրանք նման մտադրություն ունենային ի սկզբանե,  ցուցարարներին չէին թողնի, որ Ազատության հրապարակից դուրս գային: Հենց այնտեղից կցրեին»:

Թե ինչի կկարողանան հասնել քաղաքացիական հասարակությունն իր գործողություններով, Ա. Աաքունցը նկատեց. «Քաղաքացիական հասարակությունն արդեն իսկ  ցույցերով հասել է նրան, որ ցույց է տվել, որ ՀՀ-ում կան քաղաքացիներ: Քաղաքացիական հասարակությունը օժտված չէ այն գործիքներով, ինչ` որոշում կայացնողները: Բողոքի ցույցերի ձևով մարդիկ ներկայացնում են իրենց անհամաձայնությունն ընդունված կամ ընդունվելիք որոշումներին»:

Մեր հարցին, թե կկարողանա՞ ժողովուրդն ազդեցություն ունենալ կոնկրետ էլեկտրաէներգիայի վերաբերյալ ընդունված որոշման վրա, իրավապաշտպանը նկատեց, որ այդտեղ միայն քաղաքական միավորները պետք է գործ անեն. «Կա Ազգային ժողով, կա Կառավարություն, կան պատգամավորներ: Բողոքի փաստը որպես գործոն օգտագործել և որոշումների վրա ազդեցություն ունենալ, դա ինքնին ենթադրում է բոլորովին այլ մեխանիզմ: Ես չեմ կարծում, թե պետք է քաղաքացիական հասարակությունից ակնկալել ավելին: Եթե որոշումները չեն փոխվելու, դա արդեն ուղիղ ճանապարհ է դեպի առճակատում»: