Դատավոր Մկոյանը ևս մեկ անգամ ցույց տվեց իր ոչ բավարար մասնագիտական իմացությունները
17:35, March 27, 2015 | Նորություններ, Սեփական լրատվություն | Արդար դատաքննության իրավունք
ՀՀ Արդարադատության համակարգի հանդեպ անվստահության մթնոլորտ ստեղծողները հենց արդարադատություն իրականացնող դատավորներն են: Այս փաստը ևս մեկ անգամ ապացուցվեց այսօր 2015 թ. մարտի 27-ին Տիգրան Մելիքյանի գործով տեղի ունեցած 2 դատական նիստերի ժամանակ:
Ինչպես արդեն հայտնել էինք, Թովմա Մաթևոսյանի սպանության մեջ մեղադրվող Տիգրան Մելիքյանի գործով նախագահող դատավոր Ա. Մկոյանին ինքնաբացարկի մասին միջնորդություն էր ներկայացվել, որից վրդովված դատավորը ամեն կերպ փորձում է գործին արագ լուծում տալ, և ինչպես փաստաբանն էր նշել դատավորին ներկայացված ինքնաբացարկի մասին միջնորդությունում՝ դատավորը ամեն կերպ փորձելու է մինչ ապրիլի 2-ը հրապարակել վճիռ:
Այս մասին նաև վկայում է այն փաստը, որ ընդամենը 2 օրվա մեջ դատավոր Ա. Մկոյանը հապճեպ կերպով նշանակեց 3 դատական նիստ՝ իր այդ գործողությամբ ակնհայտ մտադրություն ունենալով 3 անգամ «բացակա նշանակել» փաստաբան Արա Զաքարյանին:
Այսօրվա՝ 2015 թ. մարտի 27-ի ընթացքում դատավոր Ա. Մկոյանը նշանակեց 2 դատական նիստ՝ 2 ժամ ընդմիջմամբ և ամբաստանյալ Տիգրան Մելիքյանից պահանջեց տեղյակ պահել իր փաստաբանին նիստի օրվա և ժամի վերաբերյալ, սակայն դատարանը պետք է ինքը դատական նիստի վերաբերյալ իրականացնի պատշաճ ծանուցում և ոչ թե ամբաստանյալը կամ մեկ ուրիշը: Դատավորը այս հարցում ևս ցուցաբերեց բացահայտ կողմնակալ վերաբերմունք:
Դատավոր Ա. Մկոյանը հայտարարեց, որ ամբաստանյալի փաստաբանն արդեն 3 դատական նիստի չի ներկայացել և դատավորը կարող է վարչական վարույթ հարուցել փաստաբանի նկատմամբ, սակայն նա որոշեց փաստաբանին ևս մեկ հնարավորություն ընձեռել և ևս մեկ դատական նիստ նշանակեց:
Հաջորդ դատական նիստը տեղի կունենա սույն թվականի մարտի 30-ին՝ ժամը 11:00-ին:
Դատական նիստի ժամանակ դատավոր Մկոյանը առանց պատշաճ պարզաբանման խոչընդոտեց դատական նիստը ձայնագրել ցանկացող լրագրողի գործունեությանը, թույլ չտալով ձայնագրել դատական նիստի ընթացքը: Նիստից հետո դատավորը հարցեր ուղղեց լրագրողին և հայտարարեց, որ լրագրողն առանց դատավորի թույլտվության իրավունք չուներ ձայնագրել դռնբաց դատական նիստը:
Նշենք, որ դատական նիստին ձայանագրություն կատարելու կամ չկատարելու կարգը ՀՀ քրեական դատավարության օրենսգրքով սահմանված չէ, սակայն որևէ դրույթ չի արգելում դռնբաց դատական նիստում ձայնագրություն կատարել: ՀՀ Սահմանադրության 42-րդ հոդվածի 2-րդ մասը սահմանում է՝ յուրաքանչյուր ոք ազատ է կատարելու այն, ինչն արգելված չէ օրենքով և չի խախտում այլոց իրավունքները և ազատությունները: Ոչ ոք չի կարող կրել պարտականություններ, որոնք սահմանված չեն օրենքով: