0 8000 12 11

2016 թ. հոկտեմբերի 25-ին ՀՀ Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում քննվեց 2016 թվականի հուլիսի 19-ին Երևան քաղաքի Մ.Խորենացի փողոցին հարող` Գլինկայի և Որմնադիրների փողոցների հատման վայրում ՀՀ Ոստիկանության աշխատակիցների նկատմամբ ՀՀ Քրեական օրենսգրքի 316-րդ հոդվածի 2-րդ մասի իմաստով բռնություն կիրառելու՝ վերջիններիս ուղղությամբ քարեր և այլ առարկաներ նետելու մեղադրանքով 2016թ. սեպտեմբերի 2-ին երկու ամսով կալանավորված Հրաչյա Բոյաջյանի կալանքի ժամկետը ևս երկու ամսով երկարաձգելու վերաբերյալ ՀՀ Քննչական կոմիտեի Երևան քաղաքի քննչական վարչության ավագ քննիչ Գ. Մադոյանի միջնորդությունը:

Այն հիմնավորվել էր նշանակված դատահոգեբուժական և դատահոգեբանական համալիր ստացիոնար փորձաքննությունների եզրակացություններն ստանալու և դեպքի հանգամանքերի պարզմանն ուղղված  այլ քննչական և դատավարական գործողություններ կատարելու անհրաժեշտությամբ:

Դատական նիստի ընթացքում Հրաչյա Բոյաջյանի պաշտպան, ՀՔԱ Վանաձորի գրասենյակի փաստաբան Արայիկ Զալյանի կողմից վերոնշյալ միջնորդության դեմ բանավոր առարկություն ներկայացվեց, որով վերջինս հիմնավորումներ ներկայացրեց իր պաշտպանյալի գործողություններին ոչ ճիշտ և անհիմն իրավական գնահատական տալու վերաբերյալ:

Մասնավորապես՝ նշեց, որ ցուցարարները, որոնց մեջ է եղել նաև Հրաչյա Բոյաջյանը, բողոքի ակցիա են իրականացրել՝ դժգոհություն արտահայտելով իրենց թաղամասում գազամատակարաման, ջրամատակարարման, էլեկտրաէներգիայի մատակարարման և երթուղային տրանսպորտի աշխատանքը դադարեցնելու առնչությամբ: Այդ ընթացքում ոստիկանները փորձել են իրենց ամրակցված զենքերով վախի մթնոլորտ ստեղծել ցուցարարների շրջանում, հնչեցրել սեռական բնույթի հայհոյանքներ, ինչն էլ զայրացրել է ցուցարարներին, և նրանք վիրավորված սկսել են քարեր նետել ոստիկանների ուղղությամբ, միևնույն ժամանակ՝ Հր. Բոյաջյանը, ունենալով հսկիչ անցագրային կետով հսկվող տարածք մուտք գործելու հնարավորություն, մուտք չի գործել այնտեղ և հեռացել է: Դրանից հետևում է, որ նրա գործողությունները չեն առնչվել իշխանության ներկայացուցիչների կողմից իրենց ծառայողական պարտականությունները կատարելուն, հետևաբար՝ դրանցում բացակայում են ՀՀ Քրեական օրենսգրքի 316-րդ հոդվածի 2-րդ մասով (Իշխանության ներկայացուցչի նկատմամբ կյանքի կամ առողջության համար վտանգավոր բռնությունը՝ կապված նրանց կողմից իրենց ծառայողական պարտականությունները կատարելու հետ) նախատեսված հանցակազմի հատկանիշները:

Ավելին՝ անձի կալանավորումը օրինական և հիմնավորված համարելու համար  պարտադիր պայման է հանցագործություն կատարած լինելու  հիմնավոր կասկածը, ինչը կարող է հիմնավորվել միայն կասկածվող անձի կատարած         գործողությունների վերաբերյալ համապատասխան տեղեկություններով, փաստերով կամ ապացույցներով, իսկ այդպիսիք դատարան չեն ներկայացվել :

Սրանով Ա. Զալյանը միջնորդեց նախ մերժել ներկայացված միջնորդությունը, իսկ այն բավարարելու դեպքում կիրառել այլընտրանքային խափանման միջոց գրավ՝ 1.000.000 ՀՀ դրամի չափով:

Հրապարակված որոշմամբ, սակայն, Դատարանը բավարարեց քննիչի վերոնշյալ միջնորդությունը՝ Հր. Բոյաջյանի կալանքի ժամկետը երկարաձգելով ևս երկու ամսով:

Դատարանի որոշման դեմ Հր. Բոյաջյանի պաշտպան Ա․ Զալյանի կողմից կներկայացվի վերաքննիչ բողոք: