0 8000 12 11

Հելսինկյան Քաղաքացիական Ասամբլեայի Վանաձորի գրասենյակը շարունակում է զբաղվել քննչական ապօրինի գործողություններից տուժած Փնջիկ Թերոյանի իրավունքների պաշտպանությամբ:

Հիշեցնենք, որ վերջինս 2012 թ. ապրիլի 4-ին հանցագործության մասին հաղորդում է ներկայացրել ՀՀ Ոստիկանություն: Հաղորդման հիման վրա ՀՀ Ոստիկանության Լոռու մարզի քննչական բաժնի Վանաձոր քաղաքի Տարոնի քննչական բաժանմունքում հարուցվել էր քրեական գործ: Իրականացված քննչական գործողությունների ժամանակ քննիչի կողմից թույլ էին տրվել մի շարք խախտումներ: Մասնավորապես՝ քննչական գործողություններում որպես ընթերականեր ընդգրկվել են ոստիկանության աշխատակից և անձինք, որոնց ինքնությունը և բնակության վայրը անհայտ է:

Դեպքի վերաբերյալ ներկայացված դիմումի հիման վրա ՀՀ Հատուկ քննչական ծառայությունում 2014 թ. սեպտեմբերի 16-ին որոշում է կայացվել քրեական գործի հարուցումը մերժելու մասին՝ հանցակազմի բացակայության հիմքով:

Վերոնշյալ որոշումը Փնջիկ Թերոյանի և նրա ներկայացուցիչ, ՀՔԱ Վանաձորի գրասենյակի նախագահ Արթուր Սաքունցի կողմից բողոքարկվել է նախ վերադասության, ապա դատական կարգով:

ՀՀ Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի կողմից բողոքը մերժելուց հետո Փ. Թերոյանի և վերջինիս ներկայացուցիչ Ա. Սաքունցի կողմից ներկայացվել է վերաքննիչ բողոք:

ՀՀ Վերաքննիչ քրեական դատարանը 2015 թ. հուլիսի 15-ի որոշմամբ բեկանել է Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 2015 թ. մայիսի 19-ի որոշումը՝ վերացնելով ՀՀ ՀՔԾ ՀԿԳ ավագ քննիչ Ա. Մինասյանի 2014 թ. դեկտեմբերի 26-ի քրեական հետապնդում չիրականացնելու և քրեական գործով վարույթը կարճելու մասին որոշումը:

ՀՀ Վերաքննիչ քրեական դատարանի 2015 թ. հուլիսի 15-ի որոշման դեմ ՀՀ գլխավոր դատախազի տեղակալ Հր. Բադալյանի կողմից վճռաբեկ բողոք է ներկայացվել, որը ՀՀ Վճռաբեկ դատարանը վարույթ է ընդունել և քննության կառնի 2016 թ. մարտի 30-ին: