Ախթալայի ԼՀԿ-ի երկրորդ պոչամբարը կառուցվում է առանց համայնքի բնակչության կարծիքը հաշվի առնելու
18:33, January 30, 2015 | Նորություններ, Սեփական լրատվություն | Անձնական և ընտանեկան կյանքը հարգելու իրավունք
Լոռու մարզի Ճոճկան և Տավուշի մարզի Մեծ Այրում գյուղերի սահմանում է գտնվում Ախթալայի լեռնահարստացման կոմբինատի պոչամբարը, որը վտանգավոր գործոնների առաջացման պատճառ է հանդիսանում համայնքների բնակիչների համար, թե՛ առողջապահական, թե՛ գյուղատնտեսական ոլորտներում:
ՀՀ Տարածքային կառավարման և արտակարգ իրավիճակների նախարարությանը կից հանձնաժողովը դրական եզրակացություն է տվել Ճոճկան և Մեծ Այրում գյուղերի սահմանում Ախթալայի լեռնահարստացման կոմբինատի նոր պոչամբար կառուցելու համար: Դա արվել է առանց համայնքի բնակիչների կարծիքը հաշվի առնելու՝ առանց նրանց հետ քննարկումներ իրականացնելու:
Այդ պատճառով, նոր պոչամբարի կառուցմամբ երկու համայնքների բնակիչները կանգնած են բնապահպանական նոր խնդրի առջև։
2015թ․ հունվարի 29-ին Մեծ Այրումի գյուղապետարանում համայնքի ավագանու անդամ, «Համայնքային համախմբման և աջակցության կենտրոն» ՀԿ-ի տնօրեն Օլեգ Դուրգարյանի առաջարկով կազմակերպել էր հանրային քննարկում՝ պոչամբարի կառւցման նպատակով հողի հատկացման վերաբերյալ: Ինչպես մեզ հետ զրույցում նշեց Օ. Դուրգարյանը, կառավարության որոշումների վերաբերյալ որևէ իրազեկում չի իրականացվել, իսկ ընդունված որոշումները արդյոք օրինական են՝ թե ոչ, ստուգված են արդյոք իրավական և սոցիալական կողմերը` պարզ չէ: Նա նշեց, որ ավագանին միայն տեղեկացվել է, որ պետք է նիստ գումարի և որոշում կայացնի հողերի կարգի փոփոխման վերաբերյալ, որպեսզի հետագայում այդ հողերը հատկացվեն կոմբինատին:
Հանրային քննարկման արդյունքում որոշվեց թույլատրել փորձաքննություններ իրականացնել պոչամբարի կառուցման համար նախատեսված վայրում, որի արդյունքների հիման վրա կկայացվի վերջնական եզրակացություն պոչամբարի կառուցման համար հողահատկացման վերաբերյալ:
Ախթալայի լեռնահարստացման կոմբինատի արտաքին կապերի բաժնի պետ Գագիկ Շահնազարյանը, ով ներկա էր Մեծ Այրումի գյուղապետարանում կազմակերպված հանրային քննարկմանը, գյուղացիներին ներկայացրեց պոչամբարի կառուցման նպատակները և հետագայում համայնքի բնակիչներին տրվող հնարավորությունները, ինչպես նաև կարևորեց պոչամբարի գոյության կարևորությունը: Նա զարմանալիորեն նշեց, որ պոչամբարը որևէ առողջապահական վտանգ չի ներկայացնում և մինչ այժմ իրականացված բժշկական հետազոտությունների արդյունքում պարզվել է, որ բնակիչների առողջությանը որևէ վնաս չի հասցվում: Ինչպես պնդեց նա, նոր պոչամբարի կառուցումը հնարավորթյուն կտա փակել ներկայիս գործող պոչամբարը, որն առավել մոտ է գտնվում Մեծ Այրում գյուղին և նորը կկառուցվի համայնքից մոտ 2կՄ հեռավորության վրա: Ըստ O. Դուրգարյանի, համայնքի բնակիչների համար որևէ երաշխիքներ չեն ներկայացվում, նաև համայնքի խնդիրները լուծելու համար մշակված որևէ նախագիծ:
ՀՔԱ Վանաձորի գրասենյակը հետամուտ է լինեու Մեծ Այրում համայնքի բնակիչների առողջ միջավայրում ապրելու իրավունքի պաշտպանության գործում։
Մանրամասները տեսանյությում՝