Ինչ էլ որ արվում է, արվում է Սերժ Սարգսյան՝ որպես սուպերվարչապետ ծրագրի իրականացման համար
10:09, November 9, 2017 | Այլ լրատվամիջոցներ, Նորություններ
Նախորդ շաբաթ Ազգային ժողովում փոխոստիկանապետ Վարդան Եղիազարյանը ներկայացրեց ոստիկանության զարգացման ծրագիրը: Նա նշեց, որ խորհրդարանական կառավարման լիարժեք մոդելի անցման պարագայում իրենք ենթադրում են ոստիկանության ենթակայություն վարչապետին, ինչը ԱԺ «Ելք» խմբակցության պատգամավոր Էդմոն Մարուքյանն աննախադեպ բացահայտում որակեց, քանի որ նոր Սահմանադրությամբ կառավարությանն առընթեր մարմիններ չեն լինելու, և բոլորը հաշվետու են լինելու խորհրդարանին: Հայաստանի Հելսինկյան կոմիտեի նախագահ, իրավապաշտպան Ավետիք Իշխանյանի գնահատմամբ՝ եթե ոստիկանությունը լինի վարչապետին կից, անընդունելի է, ինչպես՝ այսօրվա վիճակն է անընդունելի:
«Նրանք պետք է լինեն նախարարություն և լինեն կառավարության անդամ, իսկ վարչապետին կից ընդհանրապես որևէ կառույց չպետք է լինի: Եթե վարչապետին կից կառույց կա, դա միայն կարող է լինել խորհրդակցական մարմին, բայց ոչ երբեք գործադիր իշխանություն՝ վարչապետին կից: Դա ընդհանրապես որևէ ձևով պառլամենտական համակարգին բացարձակապես հարիր չէ: Դա նշանակում է ունենալ միապետ-վարչապետ, ոչ թե կառավարության ղեկավար»,- ասաց Ավետիք Իշխանյանը: Եթե ոստիկանությունը և ԱԱԾ-ն նախարարություններ չեն դառնալու և չեն մտնելու կառավարության կազմ որպես նախարարություններ և լինելու են վարչապետին կից, սա ևս մեկ անգամ ապացուցելու է պսևդոպառլամենտական համակարգը Հայաստանում: Իրավապաշտպանը համոզված է, որ այս ամենը Սերժ Սարգսյանն իր համար է անելու՝ վերահսկելու իրավիճակը: Սա հակասում է խորհրդարանական համակարգին, սա լինում է միապետություն՝ նախագահի փոխարեն վարչապետի համազգեստով:
Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը նշեց, որ խորհրդարանական համակարգի պարագայում կառավարության դերը բարձրանում է, և ոստիկանությունը պետք է ներառվի գործադիր իշխանության կառուցվածքում, ոչ թե անմիջապես վարչապետի հսկողության ներքո: 2005 թվականին Ռոբերտ Քոչարյանի ժամանակ իրականացված սահմանադրական փոփոխություններով ԱԱԾ-ն, ոստիկանությունը հանվեցին կառավարության կազմից և դարձան կառավարությանն առընթեր մարմիններ և ԱԺ-ին հաշվետվությամբ հանդես չէին գալիս, իսկ հիմա ոչ թե նախագահի ենթակայությունից պետք է անցում կատարեն վարչապետի ենթակայության, այլ կառավարության կազմում որպես նախարարություն հանդես գան, ինչպես եղել է մինչև 2005 թվականը:
«Տվյալ դեպքում, երբ ոստիկանությունը ենթարկվում է վարչապետին, վարչապետի կողմից ապօրինի կամ ոչ իրավաչափ հրամանների նկատմամբ պառլամենտական վերահսկողությունը թուլանում է: Թե՛ ոստիկանության, թե՛ ԱԱԾ-ի նկատմամբ պառլամենտական վերահսկողություն պետք է լինի, որպեսզի վարչապետի կողմից այդ մարմինների նկատմամբ բացարձակ վերահսկողության ինստիտուտը մեղմվի»,- ասաց իրավապաշտպանը՝ հավելելով՝ հակառակ դեպքում կստացվի, որ անուններն են փոխվում՝ նախագահի փոխարեն վարչապետ, բայց շարունակվում է մնալ որպես գործադիր իշխանության ղեկավարի անմիջական հսկողության ներքո գտնվող մարմին, բայց ոչ թե պառլամենտական վերահսկողության տակ գտնվող մարմին:
Եթե ոստիկանությունը քիչ թե շատ մտահոգ լիներ իրենց կառույցի դերի բարձրացմամբ, ապա, ըստ Արթուր Սաքունցի, պետք է առաջարկեր որպես կառավարության միավոր ներգրավելու:
«Քանի որ ունենք այսպես կոչված կայուն քաղաքական մեծամասնություն և ագրեսիվ լսող մեծամասնություն, ապա, ցավոք սրտի, նույնիսկ կառավարության կազմում ներգրավելու դեպքում որևէ երաշխիք չկա, որ պառլամենտական հսկողությունն արդյունավետ կլինի, որովհետև պառլամենտական մեծամասնությունը ոչ թե ինքն է վերահսկողություն իրականացնող, այլ վերահսկողության տակ գտնվում է գործադիր իշխանության ներքո՝ հանձինս ներկա նախագահի և ապագա վարչապետի, այնպես որ փոփոխություն չի լինելու, բայց օրենսդրական մակարդակում պետք է լինի կառավարության կազմում»,- հավելեց Արթուր Սաքունցը:
Սերժ Սարգսյանը այս բոլոր ջանքերը գործադրում է ոչ թե ուրիշի, այլ հենց իր համար, քանի որ, ըստ Արթուր Սաքունցի, նա ունի իր անձնական իշխանությունը պահելու խնդիր, ինչ էլ որ արվում է, արվում է Սերժ Սարգսյան՝ որպես ՀՀ սուպերվարչապետ ծրագրի իրականացման համար: