«Ո՛չ, Սաքունցը ներողություն չի խնդրի»
06:59, June 10, 2013 | Նորություններ | Երեխաների իրավունքներ, Հավաքների և միավորումների ազատություն | Տեղական ժողովրդավարություն
Մի քանի լրատվական կայքեր հրապարակեցին վանաձորցիների բաց նամակը՝ հասցեագրված Ռուբեն Հայրապետյանին, որը պարունակում էր նաեւ մեղադրանքներ՝ հասցեագրված ՀՔԱ Վանաձորի գրասենյակի ղեկավար Արթուր Սաքունցին: Համաձայն բաց նամակի՝ այն, որ Վանաձորը այսօր ֆուտբոլի նորմալ մարզադաշտ չունի, խանգարողն ու «մեղավորը» Արթուր Սաքունցն է, ով հայց է ներկայացրել Վանաձորի ավագանու այն որոշումը, համաձայն որի որոշել են տարածք նվիրաբերել, որ Ռուբեն Հայրապետյանն, իր խոստման համաձայն, մարզադաշտ կառուցի Վանաձորում: Եւ գլխավորը, որ նամակով պահանջում են, որ Արթուր Սաքունցը ներողություն խնդրի վանաձորցիներից եւ պատանի ֆուտբոլիստներից:
Հավելենք նաեւ, որ նմանատիպ բովանդակությամբ բողոքի ցույց է կազմակերպվել Վանաձորում՝ մանուկների, պատանիների եւ մարզիչների մասնակցությամբ:
ԳԱԼԱ-ն այս թեմայով զրուցել է ՀՔԱ Վանաձորի գրասենյակի ղեկավար Արթուր Սաքունցի հետ:
-Պարոն Սաքունց, ինչպե՞ս եք վերաբերվում այն մեղադրանքներին, որ դուք խանգարել եք Վանաձորում կառուցել ֆուտբոլի մարզադաշտ:
-Խոսքը կարող է վերաբերվել համայնքային սեփականություն հանդիսացող յուրաքանչյուր գույքի տնօրինմանը եւ բուն էությունը մեր մոտեցման այն է, որ համայնքային սեփականություն հանդիսացող գույքը չի կարող նվիրատվությամբ օտարվել, որովհետեւ օրենքով նման կարգավորում կամ իրացման նման ձեւ չկա:Այսինքն՝ համայնքային սեփականության գույքը կարող է օտարվել աճուրդով կամ տրամադրվի անվարձահատույց օգտագործման՝ որոշ համայնքային նշանակության խնդիրներ լուծելու համար: Տվյալ դեպքում սա հանդիսացել է ֆուտբոլի մարզադաշտը, վաղը չէ մյուս օրը կարող է հանդիսանալ մշակութային օջախ, ամեն մի դեպքում, եթե կլինի ոչ իրավաչափ, ոչ օրինական փաստ տնօրինման, մենք բողոքարկելու ենք: Եւ ասեմ, որ յուրաքանչյուր հասարակական կազմակերպություն եւ քաղաքացի իրավունք ունի դիմելու դատարան, դա օրինաչափ է, եւ դատարանը, եթե գտներ, որ օրինաչափ , իրավական չէ, հիմքեր չլինեին, մեր հայցը ընդհանրապես չէին ընդունի վարույթ:
-Այսինքն՝ ավագանին որոշել է, որ համայնքային սեփականության գույքը նվիրաբերո՞ւմ է:
-Այո, ընդ որում, մինչեւ այդ ավագանու վերջնական որոշման կայացումը, եղել է եւս մեկ ավագանու նիստ, որտեղ որոշվել է նվիրատվություն, պարզապես չի կարող լինել: Ես անձամբ՝ որպես համայնքի բնակիչ, մասնակցել եմ: Ես ասել եմ, որ մեր կազմակերպությունը բողոքարկելու է եւ ոչ ավագանու նիստերի ժամանակ, եւ ոչ էլ դատական նիստերի ժամանակ հանրային նման բողոք չի եղել: Հիմա, երբ որ առաջին ատյանի դատարանից մինչեւ վճռաբեկ դատարան հայցը մերժվել է եւ այդ ամբողջ պրոցեսի ընթացքում ոչ մի բողոք չի եղել, եւ մեր հայցը մերժելով՝ ավագանու որոշումն է ուժի մեջ մտել, հիմա նոր սկսել են բողոքե՞լ: Բողոքը հիմա դառնում է անիմաստ, քանի որ հիմա մենք չենք կարող ուղղակի խոչընդոտել: Ես չեմ փող դնողը եւ վերակառուցողը:
-Այսինքն՝ ինչու հիմա որոշեցին բողոքել ձեր կազմակերպության գործողությունների դեմ, եւ ովքեր են կազմակերպիչները:
-Սա ես համարում եմ ակնհայտ ուղղորդված, չեմ կարող ասել՝ ում կողմից. եւ՛ քաղաքապետը կարող է ուղղորդել, ե՛ւ նաեւ Ֆուտբոլի ֆեդերացիան կարող է դա անել: Էն կառույցները, որոնք դժգոհ են մնացել մեր կազմակերպությունից, կարող են ուղղորդել: Նրանք իրենց բողոքի համար օգտագործում են երեխաներին: Մենք ողջունում ենք երեխաների մասնակցությունը, եւ նրանց կողմից իրենց իրավունքների պաշտպանության համար պայքարում են, բայց զարմանալի է, որ շատ ավելի կոպիտ խախտումներ են լինում ոստիկանության բաժանմունքներում, պետական, տեղական ինքնակառավարման մարմինների կողմից… այդ ժամանակ այդ երեխաները չեն երեւում, չէ՞ որ նրանք ավելի կենսական նշանակության հարցեր ունեն. սննդի, բնակության, իրենց ծնողները աշխատանքի խնդիր ունեն: Ակնհայտորեն ուղղորդում է: Մեր գործունեությունից դժգոհ են նրանք, որոնք կոռուպցիայի մեջ են թաղված, օլիգարխիկ համակարգի ներկայացուցիչներ են, եւ եթե մտածել են, որ նման գործողություններով մեզ պիտի ստիպեն հրաժարվել մեր գործունեությունից, ապա նրանք չարաչար սխալվում են: Նրանք պահանջում են, որ Սաքունցը ներողություն խնդրի: Իհարկե, ուզում են զուգահեռներ անցկացնել, որ քաղաքապետը՝ Սամվել Դարբինյանը, ներողություն է խնդրել, ուզում են, որ հիմա էլ Սաքունցը խնդրի, բայց ես ներողություն խնդրելու հարց չունեմ: Բացի այդ, դիմել է կազմակերպությունը, ներողություն պետք է խնդրեն բոլոր այն պետական կառույցները, որոնք կոռուպցիայի մեջ են թաղված, որ իրենց կոռուպցիոն գործունեության հետեւանքում տուժում են երեխաները: