Արմինե Առաքելյանի նկատմամբ բռնություն կիրառողներին պատասխանատվության ենթարկելու պահանջով բողոք է ներկայացվել ՀՀ Գլխավոր դատախազություն
18:26, January 20, 2017 | Նորություններ, Սեփական լրատվություն
Արմինե Առաքելյանի ներկայացուցիչ, ՀՔԱ Վանաձորի գրասենյակի փաստաբան Արայիկ Զալյանը բողոքարկել է ոստիկանների կողմից Արմինե Առաքելյանին ապօրինաբար և բռնությունների կիրառմամբ հոգեբուժական հաստատություն տեղափոխելու և հոգեբուժական հաստատությունում բռնության ենթարկելու գործով քրեական հետապնդում չիրականացնելու՝ քննչական մարմնի որոշումը:
Հիշեցնենք, որ ՀՀ ՔԿ Երևան քաղաքի ՔՎ Էրեբունի և Նուբարաշեն վարչական շրջանների քննչական բաժնի ավագ քննիչ Գ. Մաթևոսյանը 2016 թ. դեկտեմբերի 29-ի որոշմամբ հոգեբուժական հաստատության աշխատակիցների բռնի գործողությունները օրինաչափ էր համարել: Իսկ Ա. Առաքելյանի ներկայացուցչի՝ իրավապահների գործողություններին իրավական գնահատական տալու և այդ հիմքով գործը ՀՀ Հատուկ քննչական ծառայություն ուղարկելու միջնորդությունների վերաբերյալ հայտնել, որ գործն ուղարկվել է Էրեբունի և Նուբարաշեն վարչական շրջանների դատախազություն՝ այն ՀՀ ՀՔԾ ուղարկելու հարցը քննարկելու նպատակով:
Նշենք, որ ներկայացված երկու միջնորդություններից առաջինն անպատասխան էր թողնվել, իսկ երկրորդի լուծումը հետաձգելու որոշմամբ, որին անդրադարձել ենք մեր նախորդ հրապարակումներում, մասնավորապես, նշվել էր՝ «կատարվում են ապացույցների հավաքմանն ուղղված քննչական աշխատանքներ, ուստի միջնորդության մեջ նշված հանգամանքներն ամբողջությամբ պարզելուց, մի շարք անհրաժեշտ այլ քննչական գործողություններ կատարելուց հետո միայն հնարավոր կլինի լուծել սույն միջնորդությունը»:
Այդուհանդերձ՝ այն քննարկելու նպատակով Դատախազություն ուղարկելու որոշում կայացվել է միայն հիմա: Սրանով քննչական մարմինը ակնհայտ անգործություն է ցուցաբերել:
Ինչ վերաբերում է քրեական գործի շրջանակում իրականացված հարցաքննություններին, ապա հատկանշական է, որ գործ ունենալով իրարամերժ ցուցմունքների հետ՝ քննչական մարմինը դրանք գնահատել է միակողմանիորեն՝ արժանահավատ համարելով միայն հոգեբուժական հաստատության աշխատակիցների և իրավապահների ցուցմունքները:
Քրեական հետապնդում չիրականացնելու վերաբերյալ որոշման դեմ բողոքով տուժող կողմը պահանջել է նաև պարտավորեցնել վարույթն իրականացնող մարմնին՝ որոշում կայացնել իրավապահների գործողություններին իրավական գնահատական տալու և այն ՀՀ ՀՔԾ ուղարկելու միջնորդության վերաբերյալ: