0 8000 12 11

2009 թ. նոյեմբեր և դեկտեմբեր ամիսներին Հելսինկյան Քաղաքացիական Ասամբլեայի Վանաձորի գրասենյակի Ալավերդու, Տաշիրի, Ստեփանավանի, Սպիտակի ներկայացուցչություններ իրավական խորհրդատվություն ստանալու համար դիմել են 8 քաղաքացիներ:

Այսպես, քաղաքացիները դիմել են հետևյալ հարցերով.

Տաշիր

Քաղաքացիական դատավարության իրավունք

1.  2009 թ. հունիսի 29-ին ՀՀ Լոռու մարզի Տաշիրի թիվ 2 միջնակարգ դպրոցի տնօրենի թիվ 19 հրամանի համաձայն` քաղաքացին ազատվել է աշխատանքից: Ազատման հրամանում տնօրենն իր կողմից իրականացված գործողությունները որակել է և ազատումը հիմնավորել է ՀՀ աշխատանքային օրենսգրքի 221-րդ հոդվածի 1-ին մասի 3-րդ ենթակետով: Համաձայն չլինելով աշխատանքից ազատման հրամանի հետ քաղաքացին դիմում է ներկայացրել ՀՀ կրթության և գիտության նախարարություն: Ի պատասխան դիմումի` 2009 թվականի հուլիսի 13-18-ը ՀՀ կրթության պետական տեսչության կողմից Տաշիրի թիվ 2 միջնակարգ դպրոցում իրականացվել է ուսումնասիրություն:

Ուսումնասիրության արդյունքում պարզվել է, որ ՀՀ աշխատանքային օրենսգրքի 221-րդ հոդվածի 1-ին մասը նման ենթակետ չունի: ՀՀ կրթության և գիտության նախարարությունից հանձնարարվել է անվավեր ճանաչել աշխատանքից ազատելու հրամանը:
2009 թ. օգոստոսի 4-ին ՀՀ Լոռու մարզի Տաշիրի թիվ 2 դպրոցի տնօրենի թիվ 24 հրամանի համաձայն` քաղաքացին վերականգնվել է նախկին աշխատանքում:

2009 թ. հոկտեմբերի 1-ին ՀՀ Լոռու մարզի Տաշիրի թիվ 2 միջնակարգ դպրոցի տնօրենի թիվ 19 հրամանի համաձայն` նորից ազատվել է աշխատանքից: Աշխատանքից ազատումը հիմնավորվել է ՀՀ աշխատանքային օրենսգիրքի 113-րդ հոդվածի  1-ին կետի 7-րդ ենթակետով /աշխատողի նկատմամբ վստահությունը կորցնելու դեպքում/, որի համար հիմք են հանդիսացել ՀՀ Լոռու մարզպետարանի կրթության, մշակույթի և սպորտի վարչության առաջատար մասնագետի կողմից իրականացված ուսումնասիրության արդյունքները:

Նշված ուսումնասիրությունը, սակայն, իրականացվել է առանց քաղաքացու մասնակցության, ուսումնասիրության արդյունքում կազմված արձանագրությանը նա չի ծանոթացվել:

Քաղաքացու համար 2009 թ. դեկտեմբերին հայց է պատրաստվել ՀՀ վարչական դատարան` ընդդեմ ՀՀ Լոռու մարզպետարանի կրթության մշակույթի և սպորտի վարչության “ՀՀ Լոռու մարզպետարանի կրթության, մշակույթի և սպորտի վարչության կողմից կազմված տեղեկանքը, ՀՀ Լոռու մարզի Տաշիրի թիվ 2 միջնակարգ դպրոցի տնօրենի հրամանը անվավեր ճանաչելու”  պահանջի մասին:

2009 թ. դեկտեմբերի 8-ին ՀՀ վարչական դատարանը հայցադիմումի վարույթ ընդունելը մերժել է` պատճառաբանելով, որ հայցը Վարչական դատարանին ընդդատյա չէ:
2009 թ. նույն պահանջով հայցադիմում է ներկայացվել ՀՀ Լոռու մարզի ընդհանուր իրավասության դատարան:

2010 թ. հունվարի 13-ին ՀՀ Լոռու մարզի ընդհանուր իրավասության դատարանը  որոշում է կայացրել հայցադիմումը վերադարձնելու մասին` հիմնավորելով, որ հայցը ընդդատյա է ՀՀ վարչական դատարանին:

2010 թ. հունվարին նույն պահանջով հայցադիմում է ներկայացվել Վարչական և ՀՀ Լոռու մարզի ընդհանուր իրավասության դատարաններ: Վարչական դատարանի հայցին կցվել է Լոռու մարզի ընդհանուր իրավասության դատարանի որոշումը` հայցադիմումը վերադարձնելու մասին, իսկ ՀՀ Լոռու մարզի ընդհանուր իրավասության դատարանի հայցադիմումին` ՀՀ վարչական դատարանի կողմից կայացված որոշման պատճենը:
2010 թ. հունվարի 26-ին ՀՀ Լոռու մարզի ընդհանուր իրավասության դատարանը որոշում է կայացրել հայցադիմումը` ՀՀ Լոռու մարզի Տաշիրի թիվ 2 միջնակարգ դպրոցի տնօրենի հրամանը անվավեր ճանաչելու պահանջի մասով վարույթ ընդունելու, իսկ ՀՀ Լոռու մարզպետարանի, մշակույթի և սպորտի վարչության կողմից կազմված տեղեկանքը անվավեր ճանաչելու պահանջի մասով վերադարձրել է:

2010 թ. հունվարի 25-ին ՀՀ վարչական դատարանը հայցադիմումի վարույթ ընդունելը նորից մերժել է` պատճառաբանելով, որ հայցը ընդդատյա է ՀՀ ընդհանուր իրավասության դատարաններին:

2010 թ. փետրվարի 2-ին կազմվել է վերաքննիչ բողոք` ՀՀ վարչական դատարանի 2010 թվականի հունվարի 25-ի հայցադիմումը վարույթ ընդունելը մերժելու որոշման դեմ:

2. Քաղաքացին չվճարված աշխատավարձի բռնագանձման պահանջով հայց է ներկայացրել դատարան, դատը հետաձգվել է՝ գործի հանգամանքները պարզելու նպատակով: Քաղաքացին ցանկանում է իմանալ՝ արդյոք դատարանը կարող է հետաձգել դատական նիստը:

Քաղաքացուն բացատրվել է, որ դատարանը գործի ճիշտ քննության համար իրավունք ունի ուսումնասիրել և քննել ցանկացած նյութ, որն առնչվում է գործին, ինչի պատճառով դատական նիստը իրավունք ունի հետաձգելու:

Ստեփանավան

Ընտանեկան իրավունք

3. Քաղաքացու խնդիրը կայանում է նրանում, որ նրա ամուսինը նրան դուրս է արել բնակարանից և չի թողնում տեսակցել երեխաներին: Քաղաքացին ինչպե՞ս կարող է վերականգնել իր` երեխաներին տեսակցելու իրավունքը:

Քաղաքացուն խորհուրդ է տրվել դիմել դատարան:

4. Քաղաքացին ինչպե՞ս կարող է ամուսնալուծվել ամուսնու կողմից համաձայնության բացակայության դեպքում, և բաժանել համատեղ ամուսնության ընթացքում ձեռքբերված գույքը:

Քաղաքացուն խորհուրդ է տրվել ամուսնալուծության և գույքի բաժանման հայցադիմում ներկայացնել դատարան:

Սեփականության իրավունք

5. Քաղաքացին նոտարական վավերացմամբ փոխառության պայմանագրով գումար է տվել, ունի ստացական, սակայն պայմանագրով սահմանված ժամկետում գումարը չի վերադարձվել: Քաղաքացին ինչպե՞ս կարող է ետ ստանալ իր գումարը:

Քաղաքացու համար պատրաստվել է հայցադիմում` ուղղված դատարան` գումարի բռնագանձման պահանջով:

6. Ինչպե՞ս կարելի է ընդունել ժառանգությունը:

Անհրաժեշտ է վեցամսյա ժամկետում դիմել նոտարական գրասենյակ, ստանալ ժառանգության վկայական, այն ներկայացնել ՀՀ անշարժ գույքի գրանցման պետական կադաստրի կոմիտե` սեփականության իրավունքի գրանցման համար:

Սպիտակ

Սեփականության իրավունք

7. Գույքի մասնավորեցման ծրագրի արդյունքում գյուղացուն սեփականության իրավունքով անցել է հողատարածք, որի մի մասն ապօրինի կարգով զավթել է իր հարևանը և դրա նկատմամբ գրանցել իր սեփականության իրավունքը: Քաղաքացին դիմել է գյուղապետարան` տեղեկանքի ձեռքբերման խնդրանքով, որ այդ հողատարածքը պատկանում է իրեն, սակայն գյուղապետարանը մերժել է: Քաղաքացին ինչպե՞ս կարող է հետ վերադարձնել զավթած հողատարածքը:

Կազմակերպության կողմից գրություն է պատրաստվել` ուղղված գյուղապետարան: Գյուղապետարանը պատասխան գրություն չի ներկայացրել այդ հողատարածքը քաղաքացուն պատկանելու վերաբերյալ:

Տեղեկատվության իրավունք

8. Քաղաքացին ինչպե՞ս կարող է տեղեկատվություն ստանալ Անշարժ գույքի կադաստրի պետական կոմիտեից:

Քաղաքացուն բացատրվել է տեղեկատվության հարցում պատրաստելու ձևը և կազմվել է համապատասխան տեղեկատվության ստանալու գրավոր հարցումը` ուղղված Անշարժ գույքի կադաստրի պետական կոմիտեին: