Վանաձորում ժամեր առաջ մեկնարկած բողոքի գործողությունների մասնակիցներին Ոստիկանությունը փորձում է բերման ենթարկել:

Ոստիկանությունը փորձում է բերման ենթարկել ինչպես բողոքի քայլերթի, այնպես էլ ավտոերթի մասնակիցներին:

Բերման ենթարկված անձինք կարող են դիմել ՀՔԱ Վանաձորի գրասենյակ իրավական աջակցություն ստանալու նպատակով:

Թեժ գիծ 0 8000 12 11

Հեռ. 0322 4 22 68

094 04 22 68

0322 7 22 68

077 34 22 68

 

Այսօր՝ 2018 թվականի ապրիլի 11-ին, Ֆեյսբուք սոցիալական ցանցում գրանցված Մաքս Վարժապետյանի անձնական էջից տեղեկացանք, որ նրան Արաբկիրի զինկոմիսարիատում այսօր առաձնացրել են սենյակում, նրանից վերցրել են հեռախոսը, սպառնացել են, որ անձնական տվյալները կվերցնեն: Ավելին՝ առանձին սենյակ տեղափոխելուց հետո Մաքս Վարժապետյանին վիրավորել են՝ ասելով, որ «իր եւ իր ընկերոջ նմաններին պետք է վառել, փրթել, քանի որ նրանք ազգին հակառակ և ի վնաս են ծառայում» եւ միայն դրանից հետո են թույլ տվել դուրս գալ սենյակից: Մաքս Վարժապետյանը զինկոմիսարիատ է գնացել իր ընկերոջ հետ՝ նրան ուղեկցելու համար: Նրա ընկերը ներկայացել է զինկոմիսարիատ՝ հայտնելու համար իր սեռական կողմնորոշման ու գենդերային ինքնության մասին:

Մինչ այդ՝ 2018 թվականի ապրիլի 9-ին, երբ նրա ընկերը կանչվել է զինվորական կոմիսարիատ, նա ընկերոջը կրկին ուղեկցել է այնտեղ:  Զինկոմիսարիատի աշխատակիցը, առանց ներկայանալու՝ պահանջել է նրանից հանձնել անձնական իրերը և անձնագիրը: Այնուհետեւ զինկոմիսարիատի աշխատակիցները նրան եւ ընկերոջը սկսել են ծաղրել եւ ի պատասխան քաղաքացու հարցին, թե որ կանոնակարգի համաձայն պետք է անձնական իրերը հանձնվեն, նրանց ասել են. «ախպերս կասկածելի եք թվում, համ էլ սա հասարակական վայր ա։ Չորեքշաբթի կգաս հարցերիդ կպատասխանենք»: Բացի դրանից՝ ծաղրելով հարցրել են. «էդ սումկեքիդ մեջ ռումբ ե՞ք բերել, որ տրաքացնեք մե՞զ, տեռորիստ ե՞ք։ Հըլը սաղ հանձնեք նոր մտեք ստուգվելու»:
Իսկ քաղաքացի Մաքս Վարժապետյանը նշված հարցն ուղղել է զինկոմիսարիատի աշխատակիցներին, քանի որ նկատել է, որ մյուս բոլոր քաղաքացիները ազատ մուտք են գործել զինկոմիսարիատ, եւ ոչ ոք չի վերցրել նրանց անձնական իրերը:

ՀՔԱ Վանաձորի գրասենյակը դատապարտում է նման վերաբերմունքը Մաքս Վարժապետյանի նկատմամբ եւ գտնում է, որ զինկոմիսարիատի աշխատակիցների նման գործողությունները հակասում են.

1. ՀՀ Սահմանադրության 6-րդ հոդվածի պահանջներին, համաձայն որի՝ «Պետական և տեղական ինքնակառավարման մարմիններն ու պաշտոնատար անձինք իրավասու են կատարելու միայն այնպիսի գործողություններ, որոնց համար լիազորված են Սահմանադրությամբ կամ օրենքներով:

2. ՀՀ Սահմանադրության 3-րդ հոդվածի 2-րդ մասի պահանջներին, համաձայն որի՝ Հայաստանի Հանրապետությունում մարդը բարձրագույն արժեք է: Մարդու անօտարելի արժանապատվությունն իր իրավունքների և ազատությունների անքակտելի հիմքն է:

3. ՀՀ Սահմանադրության 29-րդ հոդվածի պահանջներին, համաձայն որի՝ «Խտրականությունը, կախված սեռից, ռասայից, մաշկի գույնից, էթնիկ կամ սոցիալական ծագումից, գենետիկական հատկանիշներից, լեզվից, կրոնից, աշխարհայացքից, քաղաքական կամ այլ հայացքներից, ազգային փոքրամասնությանը պատկանելությունից, գույքային վիճակից, ծնունդից, հաշմանդամությունից, տարիքից կամ անձնական կամ սոցիալական բնույթի այլ հանգամանքներից, արգելվում է»:  

Հարկ ենք համարում  հիշեցնել, որ

1. Զինվորական ծառայության և զինծառայողի կարգավիճակի մասին ՀՀ օրենքի 4-րդ հոդվածի համաձայն՝ Զինվորական ծառայության կազմակերպման սկզբունքներից է զինծառայողների պատվի և արժանապատվության նկատմամբ հարգանքն ու խտրականության արգելումը

2. Մարդու և քաղաքացու հիմնական իրավունքների և ազատությունների հարգումն ու պաշտպանությունը հանրային իշխանության պարտականություններն են

3. Անհատական տվյալների մասին ՀՀ օրենքի համաձայն՝ «Անհատական տվյալները հավաքվում և մշակվում են օրինական ձևով

4. Անհատական տվյալները հավաքվում են հստակ սահմանված կամ հայտարարված օրինական նպատակների համար և չեն կարող օգտագործվել այլ նպատակներով՝ բացառությամբ օրենսդրությամբ սահմանված դեպքերի

5. Արգելվում է այնպիսի անհատական տվյալների հավաքումը և մշակումը, որոնք անհրաժեշտ չեն տվյալների մշակման նպատակի իրականացման համար (…)»

6. ՀՀ Քրեական դատավարության  օրենսգրքի 7-րդ հոդվածի համաձայն՝ ոչ ոք չի կարող քրեական գործով ձերբակալվել, խուզարկվել, կալանավորվել, դատապարտվել, ենթարկվել բերման և դատավարական հարկադրանքի այլ միջոցների, ինչպես նաև իրավունքների ու ազատությունների այլ սահմանափակումների այլ կերպ, քան օրենքով սահմանված հիմքերով և կարգով: Նույն օրենսգրքի համաձայն՝ «Անձի խուզարկությունը և քննումը, ինչպես նաև (…) անձնական ազատությունը սահմանափակող այլ դատավարական գործողություններ կատարվում են քրեական դատավարության օրենսգրքով նախատեսված դեպքերում և կարգով:

Պահանջում ենք ՀՀ Պաշտպանության նախարարությունից, ՀՀ Քննչական կոմիտեից եւ ՀՀ Գլխավոր դատախազությունից՝ քննության առարկա դարձնել Արաբկիրի զինկոմիսարիատի աշխատակիցների վարքագիծը եւ նրանց ենթարկել համարժեք պատասխանատվության:

ՀՔԱ Վանաձորի գրասենյակ

11.04.2018 թ.

Ներբեռնել

 2018թ. մարտի 31-ին ՀՀ Գլխավոր դատախազության ՀԿԳ քննության վարչության դատախազ Տ. Ենոքյանի կողմից հարուցվել է քրեական գործ ՀՀ Քրեական օրենսգրքի 325-րդ հոդվածի 1-ին մասով և 329-րդ հոդվածի 1-ին մասով (փաստաթղթերի կեղծում և պետական սահմանի ապօրինի հատում) և մեղադրանք է առաջադրվել Ուկրաինայի քաղաքացի Բոգդան Արկադիի Կալյուսկուն (նույն ինքը՝ ՌԴ նախկին քաղաքացի Մաքսիմ Արկադիի Բայդակ):

2018թ. ապրիլի 1-ին Երևան քաղաքի ընդհանուր իրավասության դատարանը՝ նախագահությամբ դատավոր Կ. Ֆարխոյանի, բավարարելով ՀՀ Քննչական կոմիտեի ՀԿԳ քննության գլխավոր վարչության ՀԿԳ քննիչ Ռ. Ավագյանի միջնորդությունը, Կալյուսկու նկատմամբ կիրառել է կալանք 2 ամիս ժամկետով:

2018թ. մարտի 27-ին Ուկրաինայի քաղաքացի Բոգդան Կալյուսկին (նույն ինքը՝ ՌԴ նախկին քաղաքացի Մաքսիմ Արկադիի Բայդակ) ժամանել է Հայաստան Կիև-Երևան PS 613 չվերթով՝ անցնելով և Ուկրաինայի, և Հայաստանի Հանրապետության սահմանային անցակետերով. այսինքն անցել է պատշաճ ստուգում և նրա անձը հաստատող փաստաթուղթը համարվել է օրինական: Բոգդան Կալյուսկին 2018թ. մարտի 30-ին՝ ժամը 15:30-ին, PS 614 շվերթով պետք է վերադառնար Կիև: Նա այդ օրը վերստին անցել է բոլոր ստուգումները և միայն թռիչքի սրահում նրան են մոտեցել ՀՀ Ազգային անվտանգության աշխատակիցները և բերման են ենթարկել թռիչքի սրահից՝ հայտնելով որ նա գտնվում է միջազգային հետախուզման մեջ:

Կալյուսկու ձերբակալման որոշումը կայացվել է 2018թ. մարտի 31-ի առավոտյան 5:30-ին: Այսինքն՝ Կալյուսկին առնվազն 14 ժամ ապօրինի գտնվել է  անազատության մեջ:

Ուկրաինայի քաղաքացի Բոգդան Արկադիի Կալյուսկու (նույն ինքը՝ ՌԴ նախկին քաղաքացի Մաքսիմ Արկադիի Բայդակ) նկատմամբ դեռևս 2013թ. սեպտեմբերի 13-ին ՌԴ Սանկտ Պետերբուրգ քաղաքի Ֆրունզենսկի ՆԳԳՎ-ի կողմից հարուցվել է քրեական գործ ՌԴ քրեական օրենսգրքի 2052 հոդվածի 2-ին մասով (ահաբեկչական գործունեության իրականացման հանրային կոչեր կամ ահաբեկչության հանրային արդարացում՝ որոնք կատարվել են մասսայական տեղեկատվության միջոցների օգտագործմամբ): Նշված քրեական հետապնդման անհիմն լինելու վերաբերյալ իրենց գնահատականներն են տվել Նորվեգիայի Հելսինկյան կոմիտեն և Ռուսաստանի Մեմորիալ իրավապաշտպանական կենտրոնը՝ գտնելով, որ հետապնդումը կրոնական ազատությունների և քաղաքական հայացքների սահմանափակում է, և Կալյուսկին (Բայդակը) պետք է ապաստան ստանա ժողովրդավարական երկրում, որտեղ կարող է ազատորեն արտահայտել իր կրոնական համոզմունքներն ու քաղաքական հայացքները, և ՌԴ-ին նրա արտահանձնումը մարդու իրավունքների նորմերի խախտում կհանդիսանա:

Հարկ է նշել, որ Բոգդան Կալյուսկին իր ուկրաինական անձնագրով ճամփորդել է տարբեր երկրներում և ոչ մի տեղ չի ունեցել անձնագրի հետ կապված խնդիրներ: Ըստ այդմ՝ ՀՀ իրավապահ մարմինների կողմից Բոգդան Կալյուսկու նկատմամբ հարուցված քրեական գործը փաստաթղթերի կեղծման և ՀՀ պետական սահմանը ապօրինի հատելու հիմքով հիմնավորված չէ: Կալյուսկին ևս իրեն մեղավոր չի ճանաչում մեղսագրվող հանցանքում:

Բոգդան Կալյուսկու նկատմամբ դատարանի որոշման նկարագրական մասում նշվում է ՌԴ իրավապահ մարմինների կողմից նրա նկատմամբ հարուցված քրեական գործի և միջազգային հետախուզման մասին, սակայն նրա նկատմամբ խափանման միջոցը հիմնավորվում է ՀՀ-ում հարուցված վերոնշյալ քրեական գործով:

ՀՔԱ Վանաձորի գրասենյակը մտահոգված է, որ միջազգային հետախուզման հիմնավորմամբ Ուկրաինայի քաղաքացի Բոգդան Կալյուսկին կարող է արտահանձնվել Ռուսաստանի Դաշնությանը:

Հաշվի առնելով ՌԴ քաղաքացիական ակտիվիստների և ընդդիմադիրների նկատմամբ հետապնդումները և բռնությունները, այդ թվում՝ ՌԴ քրեակատաորղական հիմնարկներում նրանց նկատմամբ անմարդկային վերաբերմունքի փաստերը և ակնհայտ համարելով ՌԴ կողմից Բ. Կալյուսկու (Մ. Բայդակի) նկատմամբ հարուցված քրեական հետապնդման քաղաքական ենթատեքստը՝  գտնում ենք որ ՀՀ իշխանությունների կողմից Ուկրաինայի քաղաքացի Բոգդան Արկադիի Կալյուսկու (նույն ինքը՝ ՌԴ նախկին քաղաքացի Մաքսիմ Արկադիի Բայդակ) հնարավոր արտահանձնումը Ռուսաստանի Դաշնությանը կհանգեցնի ՀՀ իշխանությունների կողմից նրա՝ Մարդու իրավունքների եվրոպական կոնվենցիայի 3-րդ և 5-րդ հոդվածով երաշխավորված իրավունքների խախտմանը:

Ելնելով վերը շարադրածից՝ պահանջում ենք ՀՀ իշխանություններից՝ զերծ մնալ Ուկրաինայի քաղաքացի Բոգդան Կալյուսկուն Ռուսաստանի Դաշնությանը հանձնելու որևէ մտադրությունից, անհապաղ դադարեցնել նրա նկատմամբ ապօրինի քրեական հետապնդումը և թույլատրել նրա անարգել ելքը ՀՀ տարածքից՝ երրորդ երկիր:

Ներբեռնել

Հելսինկյան քաղաքացիական ասամբլեայի Վանաձորի գրասենյակ

Հայտարարությանը միացել են

Ղազախստանի Մարդու իրավունքների և օրենքի գերակայության միջազգային բյուրո

Բարիս Զվոզսկաուի Բելառուսի Մարդու իրավունքների տուն

Իրավական քաղաքականության հետազոտությունների կենտրոն (Ղազախստան)

«Հելսինկյան Ասոցիացիա» իրավապաշտպան ՀԿ (Հայաստան)

Ադրբեջանի մարդու իրավունքների կենտրոն

Պրոմո ԼԵՔՍ (Մոլդովա)

Իրավունքների պաշտպանություն առանց սահմանների (Հայաստան)

 ՀՔԱ Վանաձորի գրասենյակի աշխատակազմը և Կազմակերպության խորհուրդը մտահոգված են «Սասնա ծռեր» խմբի համակիրների կողմից Ֆեյսբուք սոցիալական ցանցում կազմակերպության աշխատակից Վարդինե Գրիգորյանին ուղղված վիրավորանքների փաստերով: Մեր գործընկերը երկար տարիներ պայքարում է քաղաքական և քաղաքացիական իրավունքների համար, միջազգային կառույցներում ներկայացնում է Հայաստանի հանրային տրամադրություններն ու պահանջները, այդ թվում՝ պաշտպանում է քաղբանտարկյալների շահերը:  

Այսօրինակ գործունեության համար նա և ՀՔԱ Վանաձորի գրասենյակը բազմիցս վարկաբեկվել են իշխանությունը չարաշահողների, կոռուպցիոներների, քաղաքական վերնախավի շահերը սպասարկելու նպատակով սպանություններ և բռնարարքներ իրականացնողների կողմից: Մեզ համար վրդովեցուցիչ է, որ այս արատավոր ցանկին միանում են Հայաստանում ժողովրդի իշխանության հաստատման հռչակյալ ջատագովներ՝ ներկայիս ոչ ժողովրդավարական իշխանությունների նման փորձելով խոչընդոտել մարդու իրավունքների և ազատությունների իրացմանը:

Այս պարագայում Վարդինե Գրիգորյանի՝ կարծիքի արտահայտման իրավունքի իրացումն ուղղված է եղել «Սասնա ծռեր» խմբի անդամ Արայիկ Խանդոյանի՝ կանանց արժանապատվությունը նվաստացնող, նրանց նկատմամբ խտրական արտահայտությունները և դրանք ողջունելը քննադատելուն: Ցանկանում ենք ընդգծել, որ տղամարդուն վիրավորելու նպատակով նրան որպես իգական սեռի ներկայացուցիչ դիմելը  խտրական, նվաստացուցիչ և անհարգալից վերաբերմունք է բոլոր կանանց նկատմամբ, որը դատապարտելի է անկախ նրանից, թե ում կողմից է հնչեցվել և ում է ուղղված: Իրավապաշտպանության էությունն է հենց բարձրաձայնել նման խախտումների մասին:

ՀՔԱ Վանաձորի գրասենյակը հավատարիմ է կարծիքի արտահայտման իրավունքի սկզբունքներին, այդ թվում՝ ամենասուր գնահատականների ներկայացմամբ, միաժամանակ գտնում ենք, որ այն չպետք է վերածվի ատելության խոսքի: Մարդու իրավունքների պաշտպանությամբ զբաղվող անձանց թիրախավորումը, նրանց նկատմամբ բացասական վերաբերմունքը, ատելության խոսքը ոչ միայն խոցելի են դարձնում այդ անձանց, այլև նվազեցնում են մարդու իրավունքների պաշտպանության հնարավորություններն ու այդ իրավունքների նկատմամբ հարգանքը։

Վարդինե Գրիգորյանը և մեր կազմակերպությունը ստացել են աջակցության և քաջալերանքի բազմաթիվ խոսքեր: Բոլորին կոչ ենք անում զերծ մնալ Վարդինեին վիրավորողներին ծաղրելուց, նրանց ֆիզիկական կամ մտավոր հատկանիշների մասին դատողություններ անելուց, գրագիտության և դաստիարակության մասին որակումներից:

Մենք բազմիցս համոզվել ենք, որ Վարդինե Գրիգորյանն ի զորու է պաշտպանելու իր և մյուսների (հատուկ նշենք՝ նաև իրեն քննադատողների և պիտակավորողների) իրավունքները ավելի անախորժ հանգամանքներում, բայց ավելորդ չենք համարում նշել, որ անվերապահորեն զորակցում ենք նրան:

ՀՔԱ Վանաձորի գրասենյակի աշխատակազմ և Կազմակերպության խորհուրդ

2017 թ. դեկտեմբերի 14-ին ՀՀ Ազգային անվտանգության ծառայությունը հայտարարություն է տարածել այն մասին, որ ԱՄՆ քաղաքացի, ազգությամբ հայ Ռ. Քուրքյանը Ֆեյսբուքյան կեղծ էջի միջոցով Հայաստանի Հանրապետության իրավապահ և այլ պաշտոնատար անձանց նկատմամբ բռնություն գործադրելու, պայթյուններ, հրկիզումներ իրականացնելու և այդ եղանակով համընդհանուր վախի մթնոլորտ ձևավորելու ուղղակի կոչեր է արել: Համաձայն ԱԱԾ հայտարարության՝ Ռ. Քուրքյանը իր իբր հանցավոր գործունեության մեջ է ներգրավել Հայաստանում և դրա սահմաններից դուրս բնակվող ազգությամբ հայերի և նրանց միջոցով նախապատրաստել ահաբեկչական գործողությունների իրականացում՝ ՀՀ տարածքում:

Վերջինիս նկատմամբ հետախուզում է հայտարարվել:

Հելսինկյան Քաղաքացիական Ասամբլեայի Վանաձորի գրասենյակը տեղեկություններ է ստացել, որ այս գործով քաղաքացիներ են հրավիրվում Ազգային անվտանգության ծառայություն՝ հարցաքննության:

Դիմում ենք բոլոր նրանց, ովքեր հրավիրվել են ԱԱԾ կամ տեղեկություններ ունեն ԱԱԾ հարցաքննության հրավիրվածների վերաբերյալ, Ձեր իրավունքների վերաբերյալ իրավական խորհրդատվության անհրաժեշտության դեպքում  կարող եք դիմել  ՀՔԱ Վանաձորի գրասենյակ՝ զանգահարելով  0322 4 22 68, 094 04 22 68, 010 53 61 72 հեռախոսահամարներով և 0 8000 12 11 անվճար թեժ գծին (երկուշաբթի-ուրբաթ օրերին ժամը 09:30-ից մինչև ժամը 18:30, շաբաթ օրը՝ ժամը 10:00-ից մինչև ժամը 15:00), ինչպես նաև՝ գրել hcav@hcav էլ. փոստի հասցեին:

Ցանկության դեպքում  դեպքում երաշխավորում ենք անձի գաղտնիությունը:

©Eva Jašková

©Eva Jašková

Հելսինկյան Քաղաքացիական Ասամբլեայի Վանաձորի գրասենյակը հրավիրում է մասնակցելու «Ազատության խոսքը» խորագրով միջոցառման, որի ընթացքում կներկայացվի թատերախաղ՝ ոգեշնչված քաղաքական հայացքների համար բանտարկված գրողների տեքստերից և Ջեք Լոնդոնի «Զսպաշապիկը» վեպից։

Թատերախաղը ստեղծվել է Թալ Ալ-Մալլուհիի (Սիրիա), Ֆարաջ Ահմադ Բիրքդարի (Սիրիա), Սեպիդեհ Ջոդայրիի (Իրան) և հանրահայտ գրող Ջեք Լոնդոնի տեքստերի համադրումից:

Միջոցառումն իրականցվում է ՀՔԱ Վանաձորի գրասենյակում Եվրոպական կամավորական ծառայության կամավոր Էվա Յաշկովայի նախաձեռնությամբ։

Սպասում ենք ձեզ 2017 թ․ դեկտեմբերի 14-ին՝ ժամը 17:00֊ին, Վանաձորի «Ջազ» սրճարանում։

Միջոցառման ընթացքում նախատեսվում է նաև անհայտ կորածների խնդրի թեմայով Էվա Յաշկովայի հեղինակած նկարների ցուցահանդեսը։

Թատերախաղից հետո մենք հրավիրում ենք Ձեզ միանալու մեզ՝ խնդրագրեր գրելու՝ ի պաշտպանություն այն գրողների, ովքեր դիմակայում են մարդու հիմնարար ազատության՝ ազատ արտահայտման իրավունքի ճնշմանը, և իրենց՝ տեղեկատվության տարածման իրավունքի դեմ ոտնձգությանը:

Ձեզ հետ կարող եք բերել նաև գրքեր՝ քրեակատարողական հիմնարկների գրադարանների համար։ Ողջունելի են հատկապես օտար լեզուներով գրքերը։

Տեղեկատվություն թատերախաղի համար օգտագործված տեքստերի հեղինակներ մասին

Թալ Ալ-Մալլուհի [Սիրիա]

Կարգավիճակը՝ բանտարկված

Սիրիացի ուսանող, բանաստեղծ և բլոգեր, ով կալանավորվել է 2007թ.-ի դեկտեմբերին և Դամասկոսի պետական անվտանգության դատարանի կողմից դատապարտվել 5 տարվա ազատազրկման «օտար պետությանը տեղեկատվություն տրամադրելու համար»: Թեև նրա ազատազրկման ժամկետն արդեն սպառվել է, նա ազատ չի արձակվել, և կարծիք կա, որ նրան դեռ պահում են սիրիական իշխանությունները՝ առանց արտաքին աշխարհի հետ կապի: Դատավճիռը հիմնավորող ոչ մի ապացույց չի ներկայացվել, և հավանական է, որ նրան թիրախավորել են նրա բլոգի գրառումների բովանդակության համար, ներառյալ բանաստեղծություններն ու սոցիալական մեկնաբանությունը՝ նվիրված այն խնդիրներին, ինչպիսին է պաղեստինցիների վիճակը, ինչպես նաև ազատության, խաղաղության և հանդուրժողականության կոչերը: Նա արաբական աշխարհում հայտնի է որպես «խղճի ամենաերիտասարդ բանտարկյալը»:

Ֆարաջ Ահմադ Բիրքդար [Սիրիա]

Կարգավիճակը՝ ազատ արձակված

Ֆարաջ Ահմադ Բիրքդարը սիրիացի լրագրող է և բանաստեղծ, ով ավելի քան տասներեք տարի բանտարկված է եղել իր մտքերն ազատ արտահայտելու և ոչ բռնի քաղաքական գործունեության ոլորտում աշխատանք ծավալելու համար: Նա բանտարկվել է 1987թ.-ին՝ արգելված Հիզբ ալ-՛Ամալ ալ-Շույու՛ին՝ Կոմունիստական գործունեության կուսակցությանն անդամակցելու կասկածանքով և կալաքի տակ է մնացել 7 տարի՝ առանց որևէ մեղադրանքի կամ դատավարության: Երբ 1993թ.-ին մեղադրանքները վերջապես ներկայացվեցին, 15 տարի ավելացվեց նրա ազատազրկման ժամկետին: Քրեակատարողական հիմնարկում եղած ժամանակ Բիրքդարին հաջողվել է բանաստեղծությունների ժողովածու ստեղծել («Թևերը տարածած աղավնի»)՝ չնայած թղթի և գրչի բացակայությանը: Այժմ նա ապրում և ստեղծագործում է Շվեդիայում:

Սեպիդեհ Ջոդեյրի [Իրան]

Կարգավիճակը՝ արտաքսված

Սեպիդեհ Ջոդեյրին իրանցի բանաստեղծ է, ով թարգմանել է Ժուլի Մարոյի «Կապույտը ամենաջերմ գույնն է» վեպը ֆրանսերենից պարսկերեն: Գրքում առկա համասեռականության թեմայի պատճառով նրան հայտարարեցին պերսոնա նոն գրատա՝ «անցանկալի անձ» Իրանում՝ արգելելով նրան մնալ հայրենիքում և ստիպելով ապրել արտաքսման մեջ: Այս հանգամանքներում նրա աշխատանքը խիստ գրաքննության է ենթարկվել և անգամ արգելվել Իրանի Իսլամական Հանրապետությունում: Այժմ նա ապրում և ստեղծագործում է Վաշինգտոնում (Կոլումբիայի շրջանում):

Ըստ Մարդու իրավունքների համընդհանուր հռչակագրի 19-րդ հոդվածի՝ «Յուրաքանչյուր ոք համոզմունքների ազատության և դրանք անկաշկանդ արտահայտելու իրավունք ունի. այս իրավունքը ներառում է համոզմունքներին անարգել հավատարիմ մնալու, տեղեկատվություն ու գաղափարներ որոնելու, ստանալու և լրատվության ցանկացած միջոցներով տարածելու ազատությունը` անկախ պետական սահմաններից»:

prison library-hayeren

Ամեն տարի նոյեմբերի 15-ին նշվում է բանտարկված գրողների օրը՝ հարգանքի տուրք մատուցելու այն գրողներին, լրագրողներին և բոլոր նրանց, ովքեր ապօրինաբար զրկվել են ազատությունից, ենթարկվել հարձակման կամ ոտնձգության իրենց ազատ արտահայտման իրավունքի ճնշմանը դիմադրելու համար: Բանտարկված գրողների օրը, որ առաջին անգամ նշվել է PEN-ի՝ Բանտարկված գրողների միջազգային հանձնաժողովի նախաձեռնությամբ, նպաստում է գրական մշակույթի զարգացմանն ու ազատ արտահայտման իրավունքի իրացմանը: Այն ուշադրություն է հրավիրում հետապնդվող ու բանտարկված անհատների նկատմամբ՝ ամեն տարի 5 դեպք ընտրելով և պատմելով այդ գրողների կամ լրագրողների ճնշման մասին: Բացի սրանից՝ խրախուսվում է հասարակության աջակցությունը կամ նվիրատվության, կամ ընտրված գրողների կառավարությանն ուղղված նամակների միջոցով:

Հելսինկյան Քաղաքացիական Ասամբլեայի Վանաձորի գրասենյակը հրավիրում է բոլորին այցելելու մեզ նոյեմբերի 16-ից դեկտեմբերի 1-ը, ժամը 17:00-ին՝ նամակներ գրելու՝ ի պաշտպանություն այն գրողների և լրագրողների, ովքեր ընտրվել են այս տարվա Բանտարկված գրողների օրվա համար: Այս տարվա գրողների ցանկը ներառում է՝

  • Սեզարիո Ալեխանդրո Ֆելիքս Պադիլլա Ֆիգերոա– Հոնդուրաս
  • Նգույեն Նգոկ Նհու Քույնհ – Վիետնամ
  • Ռամոն Էսոնո Էբալե, նույն ինքը՝ Խամոն ի Կեսո – Հասարակածային Գվինեա
  • Ռազան Զետունե – Սիրիա
  • Զեհրա Դոգան – Թուրքիա

Եթե ժամանակ չունեք մեր գրասենյակն այցելելու, մի անհանգստացեք: Քայլեր ձեռնարկեք այստեղ՝
http://www.pen-international.org/newsitems/take-action-day-of-the-imprisoned-writer-2017/

Քանի որ այս օրը նաև շեշտում է գրականության կարևորությունն ու ազդեցությունը, Հելսինկյան Քաղաքացիական Ասամբլեայի Վանաձորի գրասենյակը որոշեց օգտվել դրանից՝ հայտարարելով, որ սկսում է քրեակատարողական հիմնարկների գրադարանների համար գրքերի հավաքագրում: Լինելով մարդու իրավունքների ու խաղաղասիրության հարցերով զբաղվող կազմակերպություն՝ ՀՔԱՎ-ը պարբերաբար մշտադիտարկում է իրականացնում կիսափակ և փակ ուղղիչ հիմնարկներում, այդ թվում նաև՝ կալանքի վայրերում: Մշտադիտարկման ժամանակ կազմակերպությունը հայտնաբերեց, որ քրեակատարողական հիմնարկների գրադարաններում բազմատեսակ գրքերի պակաս կա, գրադարաններում կա միայն հին գրականություն ու օտարալեզու գրքեր գրեթե չկան: Ընտրանին բարելավելու նպատակով նախաձեռնվեց գրքերի հավաքագրման ու օտար լեզուներով վեպերի հավաքագրման գաղափարը, որպեսզի դրանցով համալրվեն քրեակատարողական հիմնարկների գրադարանները: Կազմակերպությունը փնտրում է գրքեր օտար լեզուներով՝ վրացերեն, անգլերեն, պարսկերեն և այլն: Հավաքագրման համար նախատեսված արկղեր են տեղադրված Հելսինկյան Քաղաքացիական Ասամբլեայի Վանաձորի գրասենյակում (ք. Վանաձոր, Տիգրան Մեծի 53), ինչպես նաև ՀՔԱ Վանաձորի գրասենյակի Երևանի ներկայացուցչությունում (ք. Երևան, Մաշտոցի 3, բն. 21):

Եթե ունեք գրքեր, որոնք կարող եք տրամադրել քրեակատարաողական հիմնարկների գրադարաններին, խնդրում ենք կապվել մեզ հետ

nyeganyan@hcav.am (Նարինե Եգանյան) էլ. փոստի հասցեով, եթե խոսում եք հայերեն

7piaseven@gmail.com (Փիա Ուինթըր) և felzumka@gmail.com (Էվա Յաշկովա) էլ. փոստի հասցեներով, եթե խոսում եք անգլերեն

Մանրամասներն՝ ԱՅՍՏԵՂ

Գևորգ ՍաֆարյանԵրեկ երեկոյան ահազանգ է ստացվել այն մասին, որ իր քաղաքակական հայացքների համար դատապարտված, «Նոր Հայաստան» քաղաքական միավորման անդամ Գևորգ Սաֆարյանը Նուբարաշեն ՔԿՀ-ի իր խցակիցների կողմից ծեծի է ենթարկվել:

Գևորգ Սաֆարյանը ձերբակալվել է 2016 թ. հունվարի 1-ին՝ ոստիկանության ներկայացուցչի նկատմամբ բռնություն կատարելու մեղադրանքով այն բանից հետո, երբ փորձել են Երևանի Ազատության հրապարակում տոնածառ տեղադրել, ինչին ոստիկանները կոպտորեն խոչընդոտել են: Բերման ենթարկված 4 անձանցից ձերբակալվել է միայն Գ. Սաֆարյանը և 2017 թ. հունվարի 16-ին դատապարտվել 2 տարվա ազատազրկման:

Նրա նկատմամբ ինչպես քրեակատարաողական հիմնարկում, այնպես էլ դատարանի շենքում բռնության դեպքեր արձանագրվել են նաև նախկինում:

ՀՔԱ Վանաձորի գրասենյակը խստորեն դատապարտում է Գ. Սաֆարյանի նկատմամբ բռնության գործադրումը և հայտարարում, որ նրա կյանքին կամ առողջությանը վնաս հասցնելու դեպքում ողջ պատասխանատվությունը կրում են ՀՀ իշխանությունները:

Զորակոչիկների իրավունքների պաշտպանության նպատակով ՀՔԱ Վանաձորի գրասենյակը 2017 թվականի ձմեռային զորակոչի ընթացքում կշարունակի զորակոչիկներին եւ նրանց հարազատներին տրամադրել իրավական աջակցություն՝ իրավաբանական խորհրդատվություն, օրենսդրական դրույթների պարզաբանում, անհրաժեշտ փաստաթղթերի կազմում, հարցումների իրականացում, դատական կարգով պիտանիության վերաբերյալ որոշման բողոքարկում եւ այլն:

Կազմակերպություն կարող են դիմել նաեւ այն բոլոր զորակոչիկները, ովքեր ունեն առողջական խնդիրներ եւ համաձայն չեն բժշկական հանձնաժողովների կողմից իրենց առողջական վիճակի վերաբերյալ կայացված որոշումների հետ: Անհամաձայնության դեպքում Կազմակերպությունը կապահովի  բժիշկ-փորձագետի  կողմից նրանց առողջական վիճակի բժշկական հետազոտության արդյունքների մասին տվյալների ուսումնասիրությունը եւ համապատասխան եզրակացության տրամադրումը, որի հիման վրա զորակոչիկները կարող են վիճարկել զինծառայությանը իրենց պիտանի ճանաչելու օրինականության հարցը:

Անվճար իրավական աջակցություն ստանալու համար կարող եք դիմել ՀՔԱ Վանաձորի գրասենյակ (հասցե՝ ք. Վանաձոր, Տիգրան Մեծի 59) ամեն օր՝ ժամը 9:30-ից -18:30, կամ զանգահարելով ՀՔԱ Վանաձորի գրասենյակի Խաղաղասիրական ծրագրերի համակարգող Արմինե Սադիկյանին /0322/ 4 22 68 հեռախոսահամարին կամ 0 8000 12 11 անվճար թեժ հեռախոսագծին, ինչպես նաեւ գրելով asadikyan@hcav.am  էլեկտրոնային փոստի հասցեով:

2017 թ. մայիսի 24-ին ՀՀ իրավապահ մարմինները հայտարարեցին քրեական հեղինակություն հանդիսացող Դոն Պիպոյի (Արթուր Ասատրյանի) մահափորձը կանխելու մասին: Ավելի ուշ դեպքի առթիվ հարուցված քրեական գործի շրջանակում սպանությունը նախապատրաստելու մեղադրանքով կալանավորվեց Արկադի Քոչինյանը:

Օրեր առաջ ՀՔԱ Վանաձորի գրասենյակը ահազանգ է ստացել այն մասին, որ Նուբարաշեն ՔԿՀ-ում պահվող Արկադի Քոչինյանը ՔԿՀ-ի առավել ապահով մասից տեղափոխվել է այլ մաս, որտեղ նրա կյանքին և առողջությանը լուրջ վտանգ է սպառնում:

Այս մասին հայտնել է նաև armlur.am լրատվական կայքը՝ «Դոն Պիպոյի գործով կալանավորվածը տեղափոխվել է. որտեղ է նա գտնվում» հրապարակման մեջ: Դրանում նշվում է, որ Արկադի Քոչինյանին մենախցից տեղափոխել են ընդհանուր խուց: Ավելի վաղ դա կանխելու համար կալանավորը նաև հացադուլի էր դիմել:

Ստացված տեղեկատվության հիման վրա ՀՔԱ Վանաձորի գրասենյակը 2017թ. հոկտեմբերի 6-ին գրությամբ դիմել է ՀՀ արդարադատության նախարար Դավիթ Հարությունյանին ՝ Արկադի Քոչինյանի կյանքի ու առողջության պաշտպանության համար անհապաղ անհրաժեշտ քայլեր ձեռնարկելու և վերջինիս անվտանգությունն ապահովելու հարցով:

ՀՀ Արդարադատության նախարարությունից դեռևս չեն արձագանքել, սակայն Արկադի Քոչինյանի ծնողները նույն խնդրի մասին արդեն երկրորդ անգամ են ահազանգում ՀՔԱ Վանաձորի գրասենյակ: Վերջիններս հայտնում են, որ նա գտնվում է վատ վիճակում, նրա կյանքին ու առողջությանը վտանգ է սպառնում, որը կարող է տեղի ունենալ նույնիսկ ժամերի ընթացքում:

Նշենք, որ օրեր առաջ ահազանգերի հետքերով կալանավայր այցելած ՀՀ ԱՆ քրեակատարողական հիմնարկներում և մարմիններում  հասարակական վերահսկողություն իրականացնող հասարական դիտորդների խմբին չեն թույլատրել հանդիպել Արկադի Քոչինյանի հետ՝ պատճառաբանելով, որ քննիչի կողմից նրա հետ տեսակցությունների սահմանափակման մասին որոշում է կայացվել:

ՀՔԱ Վանաձորի գրասենյակը պահանջում է անհապաղ քայլեր ձեռնարկել Նուբարաշեն ՔԿՀ կալանավոր Արկադի Քոչինյանի անվտանգությունն ապահովելու ուղղությամբ:

Եթե Արկադի Քոչինյանը սպանվի, կամ ինքնասպանվի, կամ կատարի նման փորձ, կամ ինքնավնասում, ապա ողջ պատասխանատվությունը կրելու է ՀՀ Արդարադատության նախարարությունը, ՀՀ ԱՆ Քրեակատարողական վարչության և Նուբարաշեն ՔԿՀ ղեկավարությունը:

ՀՔԱ Վանաձորի գրասենյակը խստորեն դատապարտում է 2017 թվականի սեպտեմբերի 28-ի երեկոյան «Լոռի» հեռուստաընկերության գլխավոր խմբագիր Նարինե Ավետիսյանի նկատմամբ բռնության փաստը: Այն կատարվել է հորդառատ անձրևի պայմաններում ասֆալտապատման աշխատանքների իրականացման գործողությունը Նարինե Ավետիսյանի կողմից նկարահանելու ժամանակ՝ ասֆալտապատման աշխատանքներ իրականացնող «Շինպլյուս» շինարարական կազմակերպության ղեկավար Տիգրան Նազարյանի և նրա աշխատակիցների կողմից, որոնք ֆիզիկական ուժի գործադրմամբ խլել են նկարահանման նպատակով օգտագործվող բջջային հեռախոսը՝ Նարինե Ավետիսյանին գցելով գետնին: Նշենք, որ սա արդեն 5-րդ դեպքն է, երբ Նարինե Ավետիսյանը ենթարկվում է բռնության իր լրագրողական գործունեության իրականացման ընթացքում: Նախորդ բոլոր չորս բռնության դեպքերով հարուցված քրեական գործերի արդյունքում մեղավորները չեն բացահայտվել և պատասխանատվության չեն ենթարկվել: Արձանագրենք, որ դեպքի վայրում հայտնաբերված՝ Նարինե Ավետիսյանի բջջային հեռախոսից ջնջված են նրա կողմից կատարված նկարահանումները և տեսագրությունները:

Քրեական գործով տուժող ճանաչված Նարինե Ավետիսյանի շահերի պաշտպանությունն իրականացնում են ՀՔԱ Վանաձորի գրասենյակի աշխատակիցները:

Սույնով հայտնում ենք, որ այս անգամ բավարար են փաստերը և հանգամանքները՝ բացահայտելու և պատասխանատվության ենթարկելու լրագրողի մասնագիտական գործունեությունը խոչընդոտած անձանց, որն ուղեկցվել է ֆիզիկական բռնությամբ, գույքի հափշտակմամբ և լրագրողական նյութերի ոչնչացմամբ: Միաժամանակ հայտնենք, որ Նարինե Ավետիսյանը քրեական գործի շրջանակներում իր բացատրություններում ներկայացրել է ոչ միայն իր գործունեությունը խոչընդոտելու դեպքը, այլ նաև կարևորել է հանրային ռեսուրսների անարդյունավետ օգտագործման դեպքով քննություն կատարելու անհրաժեշտությունը: 

ՀՔԱ Վանաձորի գրասենյակը հետամուտ է լինելու բռնություններ իրականացրած անձանց պատասխանատվության ենթարկելու և Նարինե Ավետիսյանի կողմից բարձրացված խնդիրներով քննություն իրականացնելու հարցում:

Կարևորում ենք ՀՀ Գլխավոր դատախազության, ՀՀ Քննչական կոմիտեի, ՀՀ Մարդու իրավունքների պաշտպանի կողմից արձագանքները «Լոռի» հեռուստաընկերության գլխավոր խմբագիր Նարինե Ավետիսյանի նկատմամբ բռնության փաստի վերաբերյալ և ակնկալում ենք նրանց կողմից իրենց գործառույթների ամբողջական իրականացում:

Միաժամանակ գտնում ենք, որ նախորդ ժամանահատվածում լրագրողների նկատմամբ շարունակական բռնության փաստերը և նրանցով ոչ արդյունավետ քննությունը վկայում են իշխանությունների ոչ համարժեք և անպատասխանատու մոտեցման մասին, որոնք հանդիսացել են անպատժելիության մթնոլորտի ձևավորման պատճառ: 

30.09.2017

Հելսինկյան Քաղաքացիական Ասամբլեայի Վանաձորի գրասենյակ

Հայտարարությունը ներբեռնել այստեղ

 

2017թ. հուլիսի 26-ին ՀՀ Ազգային ժողովի պատգամավոր Արփինե Հովհաննիսյանը օրենսդրական նախաձեռնության կարգով ՀՀ Կառավարություն է ներկայացրել «ՀՀ քրեական դատավարության օրենսգրքում լրացում կատարելու մասին» ՀՀ օրենքի նախագիծ (այսուհետ՝ Օրենքի նախագիծ)՝ սուտ մատնության վերաբերյալ քրեական գործ հարուցելու կարգի մասին։

2017թ. սեպտեմբերի 7-ին ՀՀ Կառավարության նիստի օրակարգում առաջադրված Օրենքի նախագիծը ՀՀ Կառավարության արձանագրային որոշմամբ թողնվել է առանց քննարկման, հետևյալ հիմնավորմամբ՝ «նկատի ունենալով, ՀՀ դատարանների կողմից Օրենքի նախագծի կարգավորման առարկայի քննումը, և ՀՀ Վճռաբեկ դատարանի կողմից սպասվող նախադեպային որոշման կայացումը»:

Հելսինկյան Քաղաքացիական Ասամբլեային Վանաձորի գրասենյակի կողմից կատարված իրավական վերլուծությունը ցույց է տվել, որ ՀՀ գործող քրեական դատավարության օրենսգրքում առկա է իրավական բաց սուտ մատնության հիմքով քրեական գործերի հարուցման և քննման ժամանակ։ Ներկայացվող օրենսդրական փոփոխությունը միտված է լրացնել այդ բացը և կարգավորել այն խնդիրները, որոնք մինչ այժմ անբաժանելի են իրավակիրառ  պրակտիկայից։

ՀՀ Կառավարության կողմից Օրենքի նախագծի քննարկումից հրաժարվելու հիմնավորումը իրավական տեսանկյունից անընդունելի է այն պատճառաբանությամբ, որ օրենսդրական բացերի լրացման և օրենսդրության փոփոխման սահմանադրաիրավական պարտավորությունը դրված է ոչ թե ՀՀ վճռաբեկ դատարանի, այլ պատգամավորների, ՀՀ Ազգային ժողովի խմբակցությունների և ՀՀ Կառավարության վրա, որոնք մարդու իրավունքների հարգման, ապահովման և պաշտպանության համար պետք է սահմանեն այնպիսի պայմաններ, որոնք ժանանակին կարող են իրականացվել։

Արդարացված չէ սպասել ՀՀ Վճռաբեկ դատարանի ենթադրյալ նախադեպային որոշմանը, երբ շարունակվում են խախտվել մարդու իրավունքները և հիմնարար ազատությունները։ Ավելին, հայտնի չի կարող լինել նաև այն, որ ՀՀ Վճռաբեկ դատարանի ենթադրյալ նախադեպային որոշումը լրացնելու է առկա իրավական բացը։

Հելսինկյան Քաղաքացիական Ասամբլեային Վանաձորի գրասենյակը ՀՀ Կառավարության կողմից սուտ մատնության վերաբերյալ քրեական գործ հարուցելու կարգի մասին Օրենքի նախագիծը չընդունելու հիմնավորումը գնահատում է որպես ՀՀ Կառավարության կողմից իր սահմանադրաիրավական պարտավորության կատարումից հրաժարում, որով խախտվում է մարդու իրավունքները և հիմնարար ազատությունները հարգելու և դատական իշխանության անկախության սկզբունքը։

Ներբեռնել՝ ԱՅՍՏԵՂ

08 սեպտեմբերի 2017թ.

 Վանաձոր

Իրադարձությունների արխիվ
Հրապարակումների արխիվ
Միջոցառումների արխիվ
April 2019
M T W T F S S
« Sep    
1234567
891011121314
15161718192021
22232425262728
2930