Ապրիլի 21, 2018

Այսօր ժամը 14:15-ի դրությամբ ԹԻՀԿ ծրագրերի համակարգող, քաղաքագետ, «Մերժիր Սերժին» նախաձեռնության անդամ Արմեն Գրիգորյանը բերման է ենթարկվել ՀՀ հատուկ քննչական ծառայություն և ձերբակալվել ՀՀ քրեական օրենսգրքի 225-րդ հոդվածի (Զանգվածային անկարգությունները) 1-ին և 2-րդ մասերով և 225․1-րդ հոդվածի (Oրենքով սահմանված կարգի խախտմամբ հավաք կազմակերպելը և անցկացնելը) 1-ին մասով նախատեսված արարքներ կատարելու կասկածանքով։ Մեզ հասած տեղեկությունների համաձայն՝ ԹԻՀԿ գործընկեր, Ժուռնալիստների «Ասպարեզ» ակումբ ՀԿ խորհրդի նախագահ Լևոն Բարսեղյանը ևս այսօր ժամը 17:20-ի սահմաններում բերման է ենթարկվել Գյումրիի կայարանից և տեղափոխվում է Հատուկ Քննչական ծառայություն: Այս լուրը հաստատել է նաև ՀՀ ոստիկանությունը, սակայն ժամը 20:30-ի դրությամբ որևէ տեղեկություն չկա նրա գտնվելու վայրի մասին:

«Թրանսփարենսի Ինթերնեշնլ հակակուռուպցիոն կենտրոն» հասարակական կազմակերպության (ԹԻՀԿ) կառավարման խորհուրդը խստորեն դատապարտում է Արմեն Գրիգորյանին և Լևոն Բարսեղյանին ազատությունից զրկելու գործողությունների ոչ իրավաչափությունը և մտահոգություն հայտնում, որ այս եղանակով իշխանությունները փորձում են թուլացնել վերջին օրերին ծավալվող աննախադեպ բողոքի ցույցերը։ ՀՀ ոստիկանության բիրտ արձագանքն անընդունելի է և խիստ դատապարտելի։

ՀՀ Սահմանադրության 44-րդ հոդվածով երաշխավորված խաղաղ հավաքներին մասնակցությունն ու կազմակերպումը հանդիսանում է յուրաքանչյուր անձի հիմնարար իրավունքը, որն այս օրերին անհիմն ոտնահարվում է ոստիկանության, իսկ երբեմն՝ առանց համարանիշների ավտոմեքենաներով քաղաքացիական հագուստով անհայտ անձանց կողմից՝ ուղեկցվելով վայրենի ծեծերով և ոստիկանական բաժանմունքներ զանգվածաբար բերման ենթարկելով։ Բռնություններով լի այս գործողությունները կիրառվում են նաև անչափահաս անձանց նկատմամբ։ Վերը նշված անօրինականություններին անմիջական մասնակցություն են ունենում քրեաօլիգարխիկ համակարգի վառ ներկայացուցիչները, այդ թվում՝ ներկայիս և նախկին ԱԺ պատգամավորներ, որոնց վերաբերյալ տեսանյութերով ողողված է ողջ մամուլը։

Հաշվի առնելով վերը նշվածը՝ ՀՀ իշխանություններից պահանջում ենք.

  • անհապաղ ազատ արձակել Արմեն Գրիգորյանին, Լևոն Բարսեղյանին և մյուս ձերբակալվածներին,
  • դադարեցնել անհարկի բերման ենթարկումները և բռնությունները խաղաղ ցույցի մասնակիցների նկատմամբ։

Թրանսփարենսի Ինթերնեշնլ հակակուռուպցիոն կենտրոնի կառավարման խորհուրդ

 ՎԱՐՇԱՎԱ, 2018թ.-ի ապրիլի 19 – ԵԱՀԿ Ժողովրդավարական հաստատությունների և մարդու իրավունքների գրասենյակի (ԺՀՄԻԳ) տնօրեն Ինգիբորգ Սոլրուն Գիսլադոտիրն այսօր կոչ է արել Հայաստանի իշխանություններին պաշտպանել և ապահովել խաղաղ հավաքների ազատության իրավունքը երկրում, մինչ բողոքիցույցերը շարունակվում են այնտեղ:
«Բոլոր մարդիկ ունեն իրենց կարծիքը բողոքի խաղաղ ցույցերով արտահայտելու հիմնարար իրավունք», ասել է ԺՀՄԻԳ տնօրենը: «Իրավապահ մարմինները ոչմիայն պետք է զերծ մնան խաղաղ հավաքների ազատության իրավունքը խոչընդոտելուց, այլև պարտավոր են նպաստել այդ իրավունքի իրացմանը: Սա ներառում էցանկացած խոչընդոտներից, ինչպիսիք են գործակալ-սադրիչները կամ հակացուցարարները, մասնակիցների ապահովության և անվտանգության ապահովումը»:
Նշելով Հայաստանի իշխանությունների առաջարկն ընդդիմության հետ երկխոսության մեջ ներգրավվելու վերաբերյալ՝ Գիսլադոտիրը մտահոգություն է հայտնելՀայաստանի ոստիկանության կողմից խաղաղ ցուցարարների՝ այդ թվում անչափահասների նկատմամբ ուժի անհամաչափ կիրառման դեպքերի, ինչպես նաևԵրևանում և այլ քաղաքներում մասսայական ձերբակալման վերաբերյալ:
«Իշխանությունները պետք է ապահովեն, որ հանրային անվտանգությունն ապահովելու ցանկացած միջոց իրավաչափ է, անհրաժեշտ և համաչափ և ուղղված չէտարբերվող կարծիքները լռեցնելուն», ասել է Գիսլադոտիրը:

www.osce.org

Բեռլին, 14.03.2018

2018թ.-ի մարտի 13-ին Ռուսաստանի Դաշնության Արդարադատության նախարարությունը «անցանկալի կազմակերպություններ» ճանաչեց ընտրություններին դիտորդական առաքելություն իրականացնող անկախ կազմակերպություններից բաղկացած քաղաքացիական հասարակության ցանց Ժողովրդավարական ընտրությունների եվրոպական հարթակը (EPDE) և դրա լիտվական անդամ Ընտրությունների վերաբերյալ հետազոտությունների միջազգային կենտրոնը (IESC):

Ստեֆանի Շիֆերը, ով Ժողովրդավարական ընտրությունների եվրոպական հարթակի խորհրդի անդամ է, մեկնաբանում է, «Մենք  բողոքում ենք «անցանկալի կազմակերպություններ»-ի ցանկում ընդգրկվելու և մեր ցանցի ընդհանուր քրեականացման ու վարկաբեկման դեմ:  Մենք պահանջում ենք, որ Ռուսաստանի Արդարադատության նախարարությունը հրաժարվի այս միջոցից:

«Անցանկալի կազմակերպությունների» մասին օրենքով, որն ընդունվել է 2015թ.-ին, ռուսական կառավարությունը փորձում է քրեականացնել ժողովրդավարական շարժումների միջազգային համագործակցությունը: Ցանկում ընդգրկված միջազգային կազմակերպությունների աշխատակիցներին և Ռուսաստանի Դաշնությունում նրանց գործընկերներին կարող է սպառնալ մինչև 6 տարվա ազատազրկում, Ռուսաստան մուտք գործելու արգելք և բազմաթիվ այլ պատժամիջոցներ իրենց համագործակցությունը շարունակելու համար:

Գերմանիայի կառավարությունը քննադատել է այս օրենքը 2015թ.-ին որպես «Ռուսաստանում էական նշանակություն ունեցող քաղաքացիական հասարակությանը մեկուսացնելու և վարկաբեկելու միջոց», որն էլ ավելի է մեծացնում «Ռուսաստանի քաղաքացիական հասարակությունում արդեն գոյություն ունեցող անվստահության ու վախի զգացումը»:

Ժողովրդավարական ընտրությունների եվրոպական հարթակը ընտրություններին դիտորդական առաքելություն իրականացնող կազմակերպությունների դաշինք է, որը հիմնվել է 2012թ.-ին Արևելյան գործընկերության երկրներում, Ռուսաստանի Դաշնությունում և Եվրոպայում քաղաքացիների՝ ընտրությունների դիտարկմանն աջակցելու և ժողովրդավարական ընտրական գործընթացներին նպաստելու նպատակով:

EPDE-ի մասին հավելյալ տեղեկություն կարելի է ստանալ այստեղ՝ www.epde.org

Թարգմանությունը՝ ՀՔԱ Վանաձորի գրասենյակի

Artur Sakunts (center) participating in a meeting with journalists in Yerevan, May 15, 2017.  © 2017 azatutyun.am (RFE/RL)

Արթուր Սաքունց (կենտրոնում): Լրագրողների հետ հանդիպման ժամանակ, Երևանում, 15.05.2017: © 2017 azatutyun.am (RFE/RL)

Բեռլին. այսօր «Հյումըն ռայթս ուոթչ» (Human Rights Watch) իրավապաշտպան կազմակերպությունը հայտնել է, որ Հայաստանում  հայտնի իրավապաշտպանի հասցեին մահվան սպառնալիքներ են հնչեցվել: Իշխանությունները պետք է անհապաղ հետաքննեն Ֆեյսբուք սոցիալական ցանցում իրավապաշտպանի էջին տեղ գտած սպառնալիքները և ապահովեն նրան անհրաժեշտ պաշտպանությամբ:

Հելսինկյան Քաղաքացիական Ասամբլեայի Վանաձորի գրասենյակի (ՀՔԱ Վանաձորի գրասենյակ) նախագահ Արթուր Սաքունցը հայտնել է, որ 2017թ. հունիսի 2-ին Ֆեյսբուք սոցիալական ցանցի մի օգտատեր Սաքունցի ֆեյսբուքյան էջում թողած մեկնաբանության մեջ սպառնացել է սպանել նրան: Սպառնալիքը հայտնվել է ի պատասխան նույն օրը Սաքունցի ֆեյսբուքյան էջում տեղադրված հրապարակման, որտեղ իրավապաշտպանը քննադատել է Հայաստանի կառավարությանը: Մահվան սպառնալիքին հաջորդել է ևս մեկ սպառնալիք Ֆեյսբուք ցանցի մեկ այլ օգտատիրոջից: ՀՔԱ Վանաձորի գրասենյակը Հայաստանի առաջատար իրավապաշտպան կազմակերպություններից է:

«Հայաստանի իշխանությունները պետք է անհապաղ կատարեն Արթուր Սաքունցին հասցեագրված մահվան սպառնալիքը հետաքննելու և նրան անհրաժեշտ պաշտպանությամբ ապահովելու իրենց պարտավորությունները» ասել է «Հյումըն ռայթս ուոթչ» իրավապաշտպան կազմակերպության Եվրոպայի և Կենտրոնական Ասիայի գծով ղեկավարի տեղակալ Ջեյն Բյուքենենը. «Ոչ ոք չպետք է վախենա մահից Կառավարությանը հրապարակավ քննադատելու համար»:

Աշոտ Ավանեսյան անունով օգտատիրոջ հունիսի 2-ի ֆեյսբուքյան գրառման մեջ ասվում է հետևյալը. «Սաքունց, ես քեզ սպանելու եմ… քո նման [դավաճանների] գլուխը կտրել է պետք: Ամեն վայրկյան սպասիր ինձ: Ես հետևից կրակողներից չեմ. կրակելու եմ դեմից, 2-3 մետրից, 9մմ տրամաչափի փամփուշտով: Սպասիր ինձ, Սաքունց»: Ավանեսյանի գրառումից հետո Ֆեյսբուք սոցիալական ցանցի ևս մեկ օգտատեր՝ Արթուր Ղազարյան անունով, նույնպես սպառնացել է Սաքունցին՝ նշելով. «Երկիրը պետք է մաքրել նրանից»:

Հունիսի 5-ին Սաքունցը մահվան սպառնալիքի մասին հաղորդում է ներկայացրել Գլխավոր դատախազություն, որը ներկայումս ուսումնասիրում է այն՝ պարզելու, թե արդյո՞ք քրեական հետաքննություն սկսելու համար հիմքերն առկա են, թե ոչ:

«Հյումըն ռայթս ուոթչ» իրավապաշտպան կազմակերպության հետ զրույցում Սաքունցը հայտնել է, որ նախկինում էլ է ստացել սպառնալիքներ, սակայն հունիսի 2-ի սպառնալիքը մտահոգության տեղիք է տալիս, քանի որ այս դեպքում խիստ հստակ նշվել է սպառնալիքը կյանքի կոչելու եղանակը, անգամ փամփուշտի տրամաչափը:

Հայաստանի մարդու իրավունքների պաշտպանը նույնպես մտահոգություն է հայտնել սպառնալիքների կապակցությամբ և կոչ արել նախաձեռնել քննություն:

1998 թվականից գործող ՀՔԱ Վանաձորի գրասենյակը գտնվում է Հայաստանի` մեծությամբ երրորդ քաղաք Վանաձորում: Կազմակերպությունը իրավաբանական օգնություն է տրամադրում մարդու իրավունքների խախտումներից տուժած անձանց, քաղաքականության վերաբերյալ առաջարկներ է ներկայացնում կառավարությանը, իրականացնում է ընտրությունների մշտադիտարկում և խաղաղասիրական գործունեություն:

Фото Freedom & Homeland Foundation.Մի քանի օր առաջ, ոմն Աշոտ Ավանեսյան, իրավապաշտպան Արթուր Սաքունցի հասցեին հանդես է եկել մերկապարանոց սպառնալիքներով։ Պարոն Սաքունցը իրավապահ համակարգին ներկայացրել է համապատասխան հայտարարություն։ Սակայն մինչ այսօր այդ համակարգը ոչ մի քայլեր չի ձեռնարկել ահաբեկչական հայտարարություն տարածողին հայտնաբերելու ուղղությամբ ( չկա ոչ մի հայտարարություն այդ մասին)։

«Ազատություն և Հայրենիք» հիմնադրամը խիստ անհանգստացած է բացեիբաց ահաբեկչության այս փաստը արագ և լուրջ չքննելու իրավապահների անլուրջ վերաբերմունքից։

Հիմնադրամը իր լիակատար  աջակցությունն է հայտնում պարոն Սաքունցին և նրա կողքին է իր ողջ անձնակազմով։ Հուսով ենք, որ փողոցային խաղաղ ակցիաների մասնակիցներին արագ հայտնաբերող և բերման ենթարկող մարմինները  նույն հմտությամբ կգտնեն ու պատասխանատվության կկանչեն  Աշոտ Ավանեսյան կոչվողին կամ այդ անվան տակ թաքնվողին։

«Ազատություն և Հայրենիք» հիմնադրամ

9999Սույն թվականի օգոստոսի 30-ին Մոսկվայի Շերեմետեւո օդանավակայանում Ռուսաստանի Դաշնության սահմանապահների կողմից ձերբակալվել է Հայաստանի քաղաքացիական հասարակության ակտիվ եւ փորձառու ներկայացուցիչ, ՀՀ Գերագույն Խորհրդի նախկին պատգամավոր եւ ՀՀ արտգործնախարարի նախկին խորհրդական, Գլոբալիզացիայի եւ տարածաշրջանային համագործակցության վերլուծական կենտրոնի խորհրդի նախագահ Ստեփան Գրիգորյանը: 10 ժամ մեկուսացված պահելուց հետո, որի ընթացքում նրանից խլվել էր իր անձնագիրը, նրան վտարել են Ռուսաստանից Հայաստան: Ընդ որում, նրա հանդեպ նման վերաբերմունքը սահմանապահները հիմնավորվել են այն հանգամանքով, որ իրեն արգելված է մուտք գործել Ռուսաստանի Դաշնության տարածք՝ մինչեւ 2030թ. «Ռուսաստանի Դաշնության տարածք մուտք գործելու կարգի վերաբերյալ» ՌԴ դաշնային օրենքի 26 եւ 27 հոդվածների հիման վրա: Մասնավորապես  26 հոդվածի 9-րդ կետի հիման վրա՝ «Այն օտարերկրյա քաղաքացիների վտարման մասին, որոնք մասնակցում են Ռուսաստանի տարածքում անցանկալի միջազգային կազմակերպությունների գործունեությանը»: Ավելի ուշ, սակայն, պարզվեց, որ համաձայն Ռուսաստանի դաշնային միգրացիոն ծառայության կայքի՝ Ստեփան Գրիգորյանը իրավունք ունի առանց որեւէ սահմանափակման մուտք գործել Ռուսաստանի Դաշնության տարածք:

Մենք համարում ենք, որ Ռուսաստանի իշխանությունների անհիմն եւ հակաիրավական գործողությունները, որոնք սահմանափակում են Հայաստանի Հանրապետության քաղաքացու ազատ տեղաշարժի իրավունքը, քաղաքական դրդապատճառներ ունեն, քանի որ Գլոբալիզացիայի եւ տարածաշրջանային համագործակցության վերլուծական կենտրոնը, որի ղեկավարն է Ստեփան Գրիգորյանը, ակտիվորեն համագործակցում է եվրոպական ոչ կառավարական կազմակերպությունների հետ եւ չի թաքցնում, որ հայ ժողովրդի ապագան տեսնում է ժողովրդավարական արժեքների վրա հենվող եվրոպական երկրների ընտանիքում: Պետք է նաեւ նշել, որ Հայաստանի եւ ՌԴ-ի միջեւ գործում է առանց մուտքի արտոնագրի ռեժիմ: Այդ իսկ պատճառով Հայաստանում կասկած է առաջացել, որ ՌԴ-ն ունի ՀՀ անցանկալի քաղաքացիների «սանկցիոն ցուցակ»: Վերջապես, Ստեփան Գրիգորյանը որեւէ գործունեություն չի ծավալում Ռուսաստանի Դաշնությունում եւ այդ երկիր մի քանի ժամով մտնելու իր նպատակը զուտ անձնական բնույթ ուներ (այցելություն հանգուցյալ հոր շիրիմին): Պատժամիջոց կիրառելով Ստեփան Գրիգորյանի հանդեպ, վերջինի՝ Հայաստանում եւ երրորդ երկրներում գործունեության համար, ՌԴ իշխանությունները փաստորեն միջամտել են Հայաստանի եւ այն երկրների ներքին գործերի մեջ, որտեղ Ստեփան Գրիգորյանը օրինական գործունեությամբ է զբաղված:

Հայտարարությունն ամբողջությամբ՝ այստեղ

ԽոսափողՀաշմանդամություն ունեցող անձանց իրավունքների հարցերով ՄԱԿ-ի կոմիտեն փակ ճեպազրույց ունեցավ հայաստանյան կազմակերպությունների հետ։ Կոմիտեի աշխատանքային խումբը լսեց հաշմանդամություն ունեցող անձանց հարցերով զբաղվող կազմակերպությունների մտահոգությունները և առաջարկները։

Հիշեցնենք, որ ՀՀ Կառավարությունը Հաշմանդամություն ունեցող անձանց իրավունքների մասին կոնվենցիան վավերացրել է 2010 թվականին, իսկ դրա իրականացման վերաբերյալ կառավարության ներկայացրած առաջին զեկույցը կոմիտեն կդիտարկի 2017-ին: Մինչ այդ, հասարակական կազմակերպությունների կողմից մշակվել և Կոմիտեին էր ուղարկվել հիմնախնդիրների ցանկը` հարցադրումներ ուղղելով Հայաստանի Հանրապետության Կառավարությանը։ Բացի հաշմանդամություն ունեցող անձանց կազմակերպություններից, նման ցանկ ներկայացրել են նաև Հելսինկյան քաղաքացիական ասամբլեայի Վանաձորի գրասենյակը և ՀՀ մարդու իրավունքների պաշտպանը։

Սեպտեմբերի 5-ին տեղի ունեցած փակ ճեպազրույցի նպատակը ևս մեկ անգամ քաղաքացիական հասարակության ներկայացուցիչների հիմնախնդիրների մասին խոսելու հնարավորություն տալն էր՝ հիմնախնդիրների ցանկը վերջնականացնելու և այն կառավարությանը ներկայացնելու նպատակով։

Հաշմանդամություն-ունեցող-անձանց-իրավունքների-հարցերով-փորձագետներ

Ճեպազրույցին Հայաստանը ներկայացնում էին Զարուհի Բաթոյանը («Հաշմանդամություն ունեցող անձանց շահերի պաշտպանության ազգային դաշինք» ԻԱՄ), Կարինե Գրիգորյանը («Ագաթ» ՀԿ), Սուսաննա Թադևոսյանը («Հույսի կամուրջ» ՀԿ), Անի Ասատրյանը («Ունիսոն» ՀԿ), Մուշեղ Հովսեփյանը («Դիսըբիլիթի ինֆո» ՀԿ), Մարիետա Թեմուրյանը և Վարդինե Գրիգորյանը (Հելսինկյան քաղաքացիական ասամբլեայի Վանաձորի գրասենյակ), Տաթևիկ Խաչատրյանը (ՄԻՊ գրասենյակ):

Ներկայացվեցին հաշմանդամություն ունեցող կանանց և երեխաներին, կրթությանը, աշխատանքին, հոգեբանասոցիալական հաշմանդամություն ունեցող անձանց նկատմամբ խտրականությանը, մատչելիությանը և կոնվենցիայի ներպետական կիրարկման վերաբերյալ հիմնախնդիրները։ Ներկաները խոսեցին նաև օրենսդրական բացերի, կառավարության տարբեր որոշումների մասին, որոնք խտրականություն են պարունակում հաշմանդամություն ունեցող անձանց նկատմամբ տարբեր ոլորտներում: 20-րոպեանոց ներկայացումներից հետո Կոմիտեի անդամները հարցեր ուղղեցին ՀԿ ներկայացուցիչներին։ Դրանք հիմնականում վերաբերում էին ապաինստիտուցիոնալացմանը, երեխաների շրջանում աղքատության վերացմանը, մատչելիությանը, ինչպես նաև հաշմանդամություն ունեցող անձանց մասնակցությանը հասարակական և քաղաքական կյանքին։

Այս գործընթացը սկիզբ էր առել Հաշմանդամություն ունեցող անձանց միջազգային միության կողմից։ Միության փորձագետները Հայաստան էին ժամանել հուլիսին՝ հաշմանդամություն ունեցող անձանց կազմակերպությունների կարողությունները զարգացնելու։

Կոմիտեի կողմից հիմնախնդիրների ցանկի ներկայացումից երկու ամիս անց` 2016-ի նոյեմբերին, ՀՀ Կառավարությունը պետք է պատասխանի հարցերին:

disabilityinfo.am

Հայաստանի Հանրապետության նախագահ Սերժ Սարգսյանին

Հայաստանի Հանրապետության Ազգային ժողովի նախագահ Գալուստ Սահակյանին

Հայաստանի Հանրապետության ոստիկանության պետ Վլադիմիր Գասպարյանին

Հայաստանի Հանրապետության գլխավոր դատախազ Գեւորգ Կոստանյանին

Հայաստանի Հանրապետության օմբուդսմեն Արման Թաթոյանին

 

Արեւելյան գործընկերության Քաղաքացիական հասարակության ֆորումի

Ղեկավար կոմիտեի համանախագահների

ՀԱՅՏԱՐԱՐՈՒԹՅՈՒՆԸ 

Հայաստանում վերջին զարգացումների վերաբերյալ

30 հուլիսի 2016

Մենք դատապարտում ենք 2016թ. հուլիսի 29-ի լույս 30-ի գիշերը Երեւանում տեղի ունեցած ցույցերի ժամանակ մեր գործընկեր Հովսեփ Խուրշուդյանի՝ Արեւելյան գործընկերության Քաղաքացիական հասարկության ֆորումի Ղեկավար կոմիտեի հարգված անդամի ձերբակալությունը եւ պահանջում անհապաղ ազատ արձակել նրան, ինչպես նաեւ վերջին օրերին ոստիկանության կողմից ձերբակալված բոլոր մարդկանց: Հայաստանի քաղաքացիներն ունեն բոլոր իրավունքները՝ հանուն իրենց հայացքների ցույցեր անելու, մինչդեռ ոստիկանության հարձակումները ցուցարարների վրա մեծացնում են հետագա արյունահեղության վտանգը: Սա նվազեցնում է իշխանավորների եւ ժողովրդի միջեւ երկխոսության կայացման հնարավորությունները, որը ներկայիս իրավիճակը հանգուցալուծելու միակ ճանապարհն է:

Վերջին ցույցերի ժամանակ քաղաքացիական հագուստով ոստիկանների վայրագ հարձակումները իրենց մասնագիտական գործունեությունը իրականացնող ԶԼՄ ներկայացուցիչների վրա նույնպես պետք է դատապարտվեն՝ որպես մամուլի ազատության սկզբունքի խախտում:

Մենք գնահատում ենք այն փաստը, որ Քաղաքացիական հասարակության ֆորումի մեր մյուս գործընկերը՝ Լեւոն Բարսեղյանը, արդեն ազատ է արձակվել իշխանությունների կողմից, ինչը թույլ է տալիս ենթադրել, որ այս լարված վիճակի խաղաղ հանգուցալուծումը հնարավոր է:

Մենք գնահատում ենք նաեւ Հայաստանի մարդու իրավունքների պաշտպանի ներկայիս ջանքերը, որը փաստագրում է մարդու իրավունքների առկա խախտումները, ինչպես նաեւ այն փաստը, որ ՀՀ գլխավոր դատախազությունը հետաքննություններ է սկսել պաշտոնյաների հնարավոր հանցագործությունների կապակցությամբ՝ լրատվամիջոցների ներկայացուցիչների եւ այլոց նկատմամբ:

Քշիշտոֆ Բոբինսկի

Վլադ Վիալիչկա

Արեւելյան գործընկերության Քաղաքացիական հասարակության ֆորումի

Ղեկավար կոմիտեի համանախագահներ

ՀԱՅՏԱՐԱՐՈՒԹՅՈՒՆ

23.06.2016

Երեւան

Այսօր լրանում է 2015 թվականի հունիսի 23-ին Երեւանի Բաղրամյան պողոտայում տեղի ունեցած՝ էլեկտրաէներգիայի թանկացման դեմ խաղաղ բողոքի ակցիան իշխանությունների կողմից բիրտ ուժի կիրառմամբ ցրելու մեկ տարին։ Այդ իրադարձությունների ժամանակ ֆիզիկական բռնության ենթարկվեցին նաեւ 13 լրագրող եւ օպերատոր, խոչընդոտվեց տարբեր ԶԼՄ-ների 24 աշխատակիցների օրինական մասնագիտական գործունեությունը։

Ոստիկանական ստորաբաժանումների այս գործողությունները նպատակաուղղված բնույթ էին կրում, ինչի ապացույցներն են լրագրողների նկարահանող սարքերը միտումնավոր ջարդելու, դրանց հիշողության քարտերը ապօրինի առգրավելու, լրատվամիջոցների աշխատակիցներին տարբեր բաժիններ բերման ենթարկելու, տեսագրություններն ու լուսանկարները ոչնչացնելու բազմաթիվ փաստերը։

Տասը օր հետո կլրանա նաեւ այս դեպքերով հարուցված քրեական գործի մեկ տարին։ Համաձայն Խոսքի ազատության պաշտպանության կոմիտեի հարցմանն ի պատասխան Հատուկ քննչական ծառայության տրամադրած տեղեկությունների՝ այն երկարաձգվել է մինչեւ ս. թ. օգոստոսի 17-ը։ Նախաքննության ընթացքում հարցաքննվել են ԶԼՄ-ների 25 ներկայացուցիչներ, որոնցից 21-ը տուժող են ճանաչվել։

Սակայն զավեշտալին այն է, որ մինչեւ օրս գործով չկա եւ ոչ մի մեղադրյալ կամ կասկածյալ։ Եվ դա այն դեպքում, երբ համացանցը ողողված է տեսանյութերով, որտեղ բացահայտ երեւում է, թե ովքեր են վայրագություններ իրականացնողները։ Այս ամենը վկայում է քրեական գործը ձեւական վարելու եւ այն կոծկելու միտումի մասին։

Մենք՝ ներքոստորագրյալներս, կրկին արտահայտելով մեր վրդովմունքը 2015 թվականի հունիսի 23-ին իրավապահ մարմինների գործողությունների վերաբերյալ, վերահաստատում ենք իշխանություններին ուղղված մեր պահանջները. անաչառ եւ պատասխանատու վերաբերմունք ցուցաբերել հարուցված քրեական գործի նկատմամբ եւ պատասխանատվության ենթարկել բոլոր մեղավորներին՝ անկախ զբաղեցրած պաշտոններից։

ԽՈՍՔԻ ԱԶԱՏՈՒԹՅԱՆ ՊԱՇՏՊԱՆՈՒԹՅԱՆ ԿՈՄԻՏԵ

ԵՐԵՎԱՆԻ ՄԱՄՈՒԼԻ ԱԿՈՒՄԲ

ՄԵԴԻԱ ՆԱԽԱՁԵՌՆՈՒԹՅՈՒՆՆԵՐԻ ԿԵՆՏՐՈՆ (ՆԱԽԿԻՆ «ԻՆՏԵՐՆՅՈՒՍ»)

ԼՐԱԳՐՈՂՆԵՐԻ «ԱՍՊԱՐԵԶ» ԱԿՈՒՄԲ

ԲԱԶՄԱԿՈՂՄԱՆԻ ՏԵՂԵԿԱՏՎՈՒԹԱՆ ԻՆՍՏԻՏՈՒՏ -ՀԱՅԱՍՏԱՆ

«ԼՐԱԳՐՈՂՆԵՐ ՀԱՆՈՒՆ ԱՊԱԳԱՅԻ» ՀԿ

«ԼՐԱԳՐՈՂՆԵՐ ՀԱՆՈՒՆ ՄԱՐԴՈՒ ԻՐԱՎՈՒՆՔՆԵՐԻ» ՀԿ

ԳՈՐԻՍԻ ՄԱՄՈՒԼԻ ԱԿՈՒՄԲ

Հայտարարություն

25 ապրիլի 2016 թ.,

Երեւան

 

Ապրիլի 22-ին Երեւանի Բաղրամյան պողոտայում ոստիկանները կրկին բռնություն են կիրառել ու խոչընդոտել ԶԼՄ ներկայացուցիչների օրինական մասնագիտական գործունեությունը։ Այս անգամ թիրախ են դարձել «1in.am» լրատվական կայքի օպերատորներ Նարեկ Բարսեղյանը եւ Սեւակ Սողոմոնյանը, որոնք  լուսաբանում էին  «Մենք ենք տերը մեր երկրի» քաղաքացիական նախաձեռնության երթը դեպի նախագահական նստավայր։

Հարձակման հետեւանքով վնասվել են «1in.am»-ի նկարահանող տեսախցիկը, ուղիղ եթեր ապահովող սարքը, ինչպես նաեւ խմբագրությանը պատկանող հեռախոսը: Իսկ օպերատորներին բիրտ ուժի գործադրմամբ նստեցրել են ոստիկանական մեքենա՝ սահմանափակելով տեղաշարժը եւ խոչընդոտելով նրանց գործունեությունը։ Այս ամենից «1in.am»-ի աշխատակիցներին չի պաշտպանել նույնիսկ ներկայանալն ու խմբագրության վկայական ցույց տալը։

Ապրիլի 24-ին Ծիծեռնակաբերդի հուշահամալիրում լրագրողները ՀՀ ոստիկանապետ Վլադիմիր Գասպարյանից պարզաբանումներ պահանջեցին վերոհիշյալ դեպքերի վերաբերյալ՝ նշելով, որ ոստիկանությունն իր ձեռագիրը չի փոխում։ Ոստիկանապետը նախ հակադարձեց. «Դուք դեղնում եք, գունաթափվում եք…», ապա «1in.am»-ի թղթակից Սիրանույշ Պապյանի դիտարկմանը, թե մենք չենք տեսնում ձեր բարեփոխումները, արձագանքեց բարձրաստիճան պաշտոնյային անհարիր խոսքերով. «Ես էլ քո մեջ կին չեմ տեսնում…»:

Մենք՝ ներքոստորագրյալ կազմակերպություններս, արտահայտելով մեր վրդովմունքը վերոհիշյալ դեպքերի առնչությամբ, պահանջում ենք.

-ՀՀ ոստիկանապետ Վլադիմիր Գասպարյանից՝ միջոցներ ձեռնարկել «1in.am»-ին պատճառված վնասը փոխհատուցելու համար, հրապարակային ներողություն խնդրել լրագրող Սիրանույշ Պապյանից եւ այսուհետ թույլ չտալ վիրավորական արտահայտություններ լրագրողների հասցեին,

-ՀՀ դատախազությունից՝ ընդունել սույն հայտարարությունը որպես հաղորդում հանցագործության մասին եւ պատասխանատվության ենթարկել վերոհիշյալ իրադարձությունների ժամանակ իրենց լիազորությունները չարաշահած ոստիկաններին։

ԽՈՍՔԻ ԱԶԱՏՈՒԹՅԱՆ ՊԱՇՏՊԱՆՈՒԹՅԱՆ ԿՈՄԻՏԵ

ԵՐԵՎԱՆԻ ՄԱՄՈՒԼԻ ԱԿՈՒՄԲ

ՄԵԴԻԱ ՆԱԽԱՁԵՌՆՈՒԹՅՈՒՆՆԵՐԻ ԿԵՆՏՐՈՆ (ՆԱԽԿԻՆ «ԻՆՏԵՐՆՅՈՒՍ»)

ԼՐԱԳՐՈՂՆԵՐԻ «ԱՍՊԱՐԵԶ» ԱԿՈՒՄԲ

ԲԱԶՄԱԿՈՂՄԱՆԻ ՏԵՂԵԿԱՏՎՈՒԹԱՆ ԻՆՍՏԻՏՈՒՏ – ՀԱՅԱՍՏԱՆ

«ԼՐԱԳՐՈՂՆԵՐ ՀԱՆՈՒՆ ԱՊԱԳԱՅԻ» ՀԿ

«ԼՐԱԳՐՈՂՆԵՐ ՀԱՆՈՒՆ ՄԱՐԴՈՒ ԻՐԱՎՈՒՆՔՆԵՐԻ» ՀԿ

ԳՈՐԻՍԻ ՄԱՄՈՒԼԻ ԱԿՈՒՄԲ

Եվրոպական խորհրդի նախագահ Դոնալդ Տուսկին
Եվրոպական հանձնաժողովի փոխնախագահ, ԵՄ արտաքին գործերի և անվտանգության քաղաքականության հարցերով գերագույն ներկայացուցիչ Ֆեդերիկա Մոգերինիին
Եվրոպական հանձնաժողովի նախագահ Ժան-Կլոդ Յունկերին
Եվրոպական հանձնաժողովի ընդլայնման և հարևանության քաղաքականության հարցերով եվրոպական հանձնակատար Յոհաննես Հաննին
Եվրոպական խորհրդարանի նախագահ Մարտին Շուլցին
ԵՄ անդամ երկրների արտաքին գործերի նախարարներին
Արեւելյան գործընկերության երկրների արտաքին գործերի նախարարներին

20 ապրիլի 2016թ.

 

Արևելյան գործընկերության Քաղաքացիական հասարակության ֆորումի Ղեկավար կոմիտեի հայտարարությունը

Հայոց ցեղասպանության վերաբերյալ

Արևելյան գործընկերության Քաղաքացիական հասարակության ֆորումի ղեկավար կոմիտեն իր հարգանքի տուրքն է մատուցում եւ դատապարտում է հայ ժողովրդի ցեղասպանությունը՝ 2016թ. ապրիլի 24-ին դրա իրականացման տարելիցի 101-ամյակի նախաշեմին:

Օսմանյան կայսրության կառավարության իրականացրած Հայոց ցեղասպանությունը հանգեցրեց ոչ միայն 1,5 միլիոն մարդկային զոհերի և ավելի քան կես միլիոն մարդկանց տեղահանության, այլև հայկական ժառանգության, կենսաձևի և արևմտյան մշակույթում նրա ներդրած հսկայական ավանդի ոչնչացման: Ցեղասպանության ենթարկվեցին նաև Պոնտոսի հույները, ասորիները և եզդիները:

Չդատապարտելով 20-րդ դարի առաջին ցեղասպանությունը և չպատժելով դրա կազմակերպիչներին և իրականացնողներին՝ մարդկությունը հետագայում բախվեց ցեղասպանությունների պրակտիկայի շարունակությանը «Հոլոդոմորի» ժամանակ և այլուր:

Մի շարք, այդ թվում եվրոպական, երկրներ միացել են Հայոց ցեղասպանության ճանաչմանը և դատապարտմանը: Անցած տարի Հռոմի պապ Ֆրանցիսկոսը բնորոշեց այն որպես 20-րդ դարի առաջին ցեղասպանություն և դարի երեք ծանրագույն հանցագործություններից մեկը: Մեկ անգամ չէ, որ Եվրոպական խորհրդարանը միաձայն ճանաչել և դատապարտել է Հայոց ցեղասպանությունը:

Թուրքիան Եվրոպայի խորհրդի անդամ պետություն է և ըստ այդմ պետք է լիարժեքորեն կատարի դրանից բխող բոլոր պարտավորությունները: Սա հաշվի առնելով՝ Ղեկավար կոմիտեն հորդորում է Թուրքիային իր միջազգային պարտավորություններին և իր ձգտած եվրոպական ինքնությանը համապատասխան միջոցներ ձեռնարկել և աշխատել հանուն ճշմարտության միջոցով հաշտեցման:

Մենք նաև կոչ ենք անում Թուրքիայի կառավարությանը հարգել և ամբողջությամբ իրականացնել իր ստանձնած  իրավական պարտավորությունները՝ ներառյալ մշակութային ժառանգության պաշտպանության վերաբերյալ դրույթները, մասնավորապես՝ բարեխղճորեն իրականացնել նախորդ դարում ոչնչացված կամ վնասված հայկական և այլ մշակութային ժառանգությունների համընդգրկուն գույքագրում:

Ղեկավար կոմիտեն հորդորում է Եվրոպական միությանը և նրա Հանձնաժողովին, Խորհրդին և Խորհրդարանին, ինչպես նաև Եվրոպայի խորհրդին գնահատել Թուրքիայի ստանձնած հանձնառությունների և պարտավորությունների կատարման ընթացքը:

ԱլԳ ՔՀՖ Ղեկավար կոմիտեն հորդորում է նաև Արևելյան գործընկերության երկրներին քննարկել Հայոց ցեղասպանության ճանաչման հարցը:

Արևելյան գործընկերության Քաղաքացիական հասարակության ֆորումի ղեկավար կոմիտեի անդամներ

 

դեմ՝ Ավազ Հասանով, Ադրբեջանի ազգային համակարգող

ձեռնպահ՝ Լաշա Տուգուշի, Վրաստանի ազգային համակարգող

2016թ.-ի ապրիլի 1-ից 2-ի գիշերը Հայաստանի և Ադրբեջանի միջև Լեռնային Ղարաբաղի շուրջ ծագած հակամարտությունը վերաճեց տարածաշրջանային պատերազմի «շփման գծում» լայնածավալ ռազմական գործողությունների իրականացման հետևանքով: Այսպես կոչված «սառեցված հակամարտությունը», որը տեղական համայնքների համար երբեք էլ «սառեցված» չի եղել, վաղուց արդեն ռազմական արդյունաբերական համալիրի ու արնատենչ  ԶԼՄ-ների հերթական թիրախն էր:

Դաժան բախումների հետևանքով բազմաթիվ զինվորներ, խաղաղ բնակիչներ, ներառյալ՝ երեխաներ, սպանվեցին և վիրավորվեցին` հիշեցնելով, որ «շփման գծի» հետևում մարդիկ են, համայնքներ, ողբերգական կենսափորձ և ճակատագրեր:

Պատերազմը առնականության արտահայտման և հայրիշխանության վերարտադրման միջոց է: Պատերազմը բռնության կիրառման հանդեպ մենաշնորհ ունեցող տղամարդակենտրոն պետականության դրսևորումն է:  Այն սնուցվում է կապիտալիստական հարաբերությունների միջոցով և իրագործվում մարդկանց կյանքերի հաշվին:  

Մենք կարծում ենք, որ պատերազմը հնարավոր է կանխել ռադիկալ հակամիլիտարիստական ֆեմինիստական գաղափարախոսության ու քննադատական մտքի զարգացման շնորհիվ:

Պատերազմը շահութաբեր է էլիտաների և կորպորացիաների համար

Տարեկան կտրվածքով համընդհանուր ռազմական ծախսերն ամբողջ աշխարհում կազմում են ավելի քան 1.7 տրիլիոն ԱՄՆ դոլլար: Մեկ տարվա այդ ծախսը բավական կլիներ վերացնելու աղքատությունը, ապահովելու համընդհանուր կրթություն ու առողջապահական համակարգ մոլորակի բոլոր բնակիչների համար:

Միայն 2015թ.-ին Ադրբեջանի ռազմական ծախսերը կազմել են 3.021 միլիարդ դոլլար, իսկ Հայաստանը ծախսել է 447 միլիոն դոլլար: Եթե այդ գումարները ներդրվեին ոչ թե բռնությունների կիրառման, այլ խաղաղաշինական գործընթացներում, ղարաբաղյան կոնֆլիկտը վաղուց կունենար իր խաղաղ հանգուցալուծումը՝ առանց մարդկային զոհերի:

Ղարաբաղի շուրջ պատերազմական իրավիճակը հանգեցրել է լոկալ և տարածաշրջանային մակարդակներում ծայրահեղ ազգայնականության, ատելության ու գենդերային/ռազմական դերերի սուր բևեռացման: Այս ամենը մեր տարածաշրջանի մարդկանց հեռացնում ու տարանջատում է միմյանցից՝ քաղաքացիների ուշադրությունը շեղելով ծանր սոցիալ-տնտեսական համակարգային խնդիրներից և բռնարար ու կոռումպացված կառավարություններից:

Պատերազմը լեգիտիմացնում է ավտորիտար համակարգը

Ղարաբաղում ընթացող պատերազմական գործողությունները հնարավորություն են տալիս Հայաստանի Հանրապետության ու Ադրբեջանի ոչ լեգիտիմ իշխանություններին գործի դնել քարոզչական մեքենաներ՝ մարդկանց պահելով կոռումպացված, քաղաքացիներին բռնությունների ենթարկող, սեփական հանրությունների դեմ զորքեր հանող, այլակարծություն արտահայտող քաղաքա(ցի)ական գործիչներին քաղբանտարկյալներ դարձնող իշխանությանների ձեռքում:

Երկու հարևան հանրապետություններում ստեղծված արտակարգ ռազմական իրավիճակներն ինքնաբերաբար լեգիտիմացնում են անօրեն իշխանության պարագլուխների մարտական գործողությունները: Երբեմնի հանցագործ իշխանական ներկայացուցիչները վերածվում են ազգային հերոսների, իսկ այլակարծություն արտահայտողները՝ ազգի թշնամիների և դավաճանների: Մինչդեռ աղքատ, ռեսուրսներ չունեցող, իրավազուրկ ու մարգինալացված ընտանիքների զինվորները զոհվում են, նրանց սպանված մարմինները խեղվում են՝ դառնալով մարդակեր բռնապետությունների ու կորպորացիաների ձեռքում գտնվող անշունչ գործիքներ:

Պատերազմը լեգիտիմացնում է ազգայնականությունը

Ազգայնականությունը պետական գաղափարախոսական մեքենա է, որն օգտագործվում է բռնապետության վերահաստատման ու կապիտալիստական հարաբերությունների օգտագործման նպատակով: Ազգայնականությունը ծառայում է որպես լավագույն միջոց մարդկանց համախմբելու «թշնամու» դեմ՝ ներպետական-տնտեսական ճգնաժամի, աճող ընդդիմության, պառակտման ու այլախոհության պայմաններում:

Ազգայնականությունը նաև գենդերացված է, և ենթադրում է ագրեսիվ, տիրող ու պաշտպանող առնականության և պասիվ, ենթարկվող ու աջակցող կանացիության դրսևորում: Ազգայնականությունն ու հայրիշխանությունը գործում են փոխկապակցված՝ ապահովելով կանանց տոտալ բացակայությունը որոշումների կայացման գործընթացներից, իսկ ներգրավվածության դեպքում միայն հայրիշխանության և ռազմա-ազգայնական տեսակետից գործելու հնարավորությամբ:

Պատերազմն իրականացվում է քարոզչության ներքո

Մեզ պարտադրվում են տեղեկատվության ստացման ուղղորդված աղբյուրներ: Զանգվածային լրատվական միջոցները հեղեղված են քարոզչություն պարունակող իրարամերժ տեղեկություններով: Պատերազմի պարագայում անհրաժեշտ տեղեկատվություն ստանալու մեր իրավունքը ամբողջապես խախտվում է պատերազմը ղեկավարող ինստիտուտների կողմից: Նախկինում քարոզչություն համարվող տեղեկատվական աղբյուրները դառնում են «ճշմարտությունն» արտաբերող միակ ռեսուրսները: Իսկ այլակարծություն ունեցող և իշխանությունների կողմից նախօրոք սահմանված օրակարգից շեղում պահանջող քաղաքացիների ձայները շարունակաբար լռեցվում են: Զանգվածային լրատվամիջոցները կառուցում են պատերազմի վերաբերյալ միֆեր` խրախուսելով ֆունդամենտալիստական և կրոնական այն պնդումներն իբրև պատերազմն ու բռնությունն անհրաժեշտ և նույնիսկ խրախուսվող երևույթներ են:

Այս ահագնացող հակամարտությունը, ինչպես և ցանկացած զինված հակամարտություն, ունի իր պատճառներն ու հետևանքները: Սակայն պատճառներն արհեստականորեն ստեղծված, կառուցված ու ռեժիմների կողմից մշտապես վերարտադրվող «թշնամու» կերպարները կամ իշխող (մասնավորապես արևմտյան, ռուսական և թուրքական) մեդիայի կողմից թելադրվող էթնիկ, ազգային ու կրոնական ինքնությունների տարբերությունները չեն:

Պատերազմը շարունակվում է մենաշնորհային խաղաղության գործընթացների ներքո

Ղարաբաղա-ադրբեջանական ռազմական կոնֆլիկտի խաղաղաշինական գործընթացները կրել են ֆորմալ բնույթ և իրականացվել են բացառապես իշխանության օղակներում գտնվող տղամարդկանց կողմից: Խաղաղությունը նույնականացվում է պատերազմի բացակայության ու ռազմականության միջոցով հաստատված պետական անվտանգության հետ: Սա նշանակում է, որ ոչ միայն պատերազմը, այլ նաև դե ֆակտո խաղաղությունը դիտվում է միայն միլիտարիստական և հայրիշխանական համակարգերի պրիզմայում: Հետևաբար, քանի դեռ հայրիշխանական ու ռազմականացման համակարգերը չեն խարխլվել, կոնֆլիկտի իրական խաղաղ հանգուցալուծումը թվում է հեռահար նպատակ:

Մենք կարծում ենք, որ պատերազմը, որպես հայրիշխանության դրսևորում, կարող է դադարեցվել ճնշումների ու ռազմականացման դեմ ուղղված տարածաշրջանային գործողությունների միջոցով, ռադիկալ ֆեմինիզմի և սոլիդարության գաղափարախոսությունը կրող շարժումների, ոչ բռնի քաղաքացիական անհնազանդության ու հանրային քննադատական մտքի զարգացման շնորհիվ՝ Լեռային Ղարաբաղի, Հայաստանի ու Ադրբեջանի բնակիչների ամենօրյա ճակատագրերը մեր սրտերում պահպանելու և մեր օրակարգերում ընդգրկելու պայմաններում:

Ի համերաշխություն՝

Ղարաբաղյան կոնֆլիկտի խաղաղ կարգավորման շուրջ միավորված անանուն ֆեմինիստներ Հարավային Կովկասից և Կենտրոնական Ասիայից:

Ապրիլ 12, 2016

Իրադարձությունների արխիվ
Հրապարակումների արխիվ
Միջոցառումների արխիվ
April 2019
M T W T F S S
« Sep    
1234567
891011121314
15161718192021
22232425262728
2930