Գրիշա Խաչատուրովի մասին նամակին Սաքունցն ընթացք է տվել` այն ուղղելով ՊՆախարար Սեյրան Օհանյանին
06:49, July 21, 2012 | Նորություններ | Զինված ուժերԳրիշա Խաչատուրովի մասին նամակին Սաքունցն ընթացք է տվել` այն ուղղելով ՊՆախարար Սեյրան Օհանյանին: Այս մասին «Առաջին լրատվական»-ի հետ զրույցում ասաց Հելսինկյան քաղաքացիական ասամբլեայի Վանաձորի գրասենյակի նախագահ, իրավապաշտպան Արթուր Սաքունցը` խոսելով նամակի ճակատագրից:
Նա նշեց, որ նամակն ուղղել է ՀՀ ՊՆախարար Սեյրան Օհանյանին, որ նամակի ուղղությամբ քննություն անցկացվի, գործն ուսումնասիրվի և հրապարակվի: «Չգիտեմ՝ այդ ուղղությամբ քննություն գնում է, թե ոչ, բայց մենք նամակով դիմել ենք»,- հստակեցրեց Արթուր Սաքունցը:
Հիշեցնենք, որ 2012թ. հուլիսի 19-ին Հելսինկյան քաղաքացիական ասամբլեայի Վանաձորի գրասենյակի նախագահ Արթուր Սաքունցն իր անձնական էլեկտրոնային փոստով ստացել էր լատինատառ նամակ, որում նամակի հեղինակն ասում է, որ բանակում ծառայում է մոտ 20 տարի, վերջին 10 տարին՝ 3-րդ բանակային կորպուսի զորամասերից մեկում: Նամակի հեղինակը պատմում է, թե ինչպես է կորպուսի շտաբի պետ նշանակված Գրիշա Խաչատուրովը վարում իր ծառայությունը: «Կորպուսում ստեղծել ա շատ լարված վիճակ, քրֆում ա, բոլորին անպատվում ա, գործից ոչ մի բան չի հասկանում, մենակ հավայի ղժժում ա: Սա տասնյակ սպաների համար ամենօրյա ցավ է», – նկատել էր նամակի հեղինակը, որը չէր ներկայացել: