«Ամոթ համարեցի ոստիկանի ուսադիրը կրելը ու դուրս եկա, իսկ Վ. Գասպարյանը՝ էնքան արյուն է թափված ձեռքերին, որ ինչքան էլ աղոթի, չի մաքրվելու»
09:23, April 18, 2013 | Նորություններ | Ոստիկանություն
«Ես իրոք ոստիկանի ուսադիրները կրել եմ պատշաճ ձևով և եղել եմ մեր պետականության կայացման ակունքներում: Ափսոս ճակատագիրը ու իշխանությունները այնպես վարվեցին, որ ամեն ինչ խախտվեց: Ես տեսա, որ օրենքը ոտնահարեցին իշխանությունները իմ առջև և ես հիասթափված հրաժեշտ տվեցի ոստիկանական համազգեստին»,- ԳԱԼԱ-ի հետ զրույցում պատմում է նախկին ոստիկան, կոչումով կապիտան Մովսես Խաչատրյանը, ով ջրծաղիկի հետևանքով 2011-ին մահացած զինծառայող Հայկ Խաչատրյանի հայրն է և իր ամբողջ կյանքը նվիրել է ոստիկանությունում ծառայելուն: Սակայն Մովսես Խաչատրյանի խոսքերով՝ ճակատագրի բերումով բախվելով իրականությանը և տեսնելով իրավապահ համակարգի սնանկությունը՝ հիասթափվում է իշխանություններից ու ռեժիմին ծառայող ուժայիններից ու մեկ տարի առաջ՝ 2012 թ-ի խորհրդարանական ընտրություններից հետո գրում է զեկուցագիր ու սեփական կամքով լքում աշխատանքը: Այսօր նա ԳԱԼԱ-ի հետ զրույցում շնորհավորեց նախկին գործընկերներին և ասաց. «Մաղթում եմ իմ գործընկերներին, որ մարդկանց ծառայեն և ոչ թե բռնապետական ռեժիմին, կամ կլանին: Այսօր մեր ոստիկանությունը, ինքս էլ անձամբ ապրիլի 9-ին Երևանում եմ եղել, տեսել եմ, որ կանգնած է կլանի առաջ որպես կամակատար: Բայց հույս ունեմ, որ ոստիկանությունը կփոխվի. համենայնդեպս այդ համակարգի աշխատողների մեծ մասը ժողովրդի ծոցից ելած է, և ասեմ ձեզ՝ իրենք ատում են համակարգը: Իրենք՝ 95 տոկոսը, ուղղակի ուսերին կռած այդ պագոնների զոռի՞ն ասեմ, թե՞ վերևից եկող հրամանով՝ կատարում են հրահանգներ: Ես իրանց միջից եմ եղել և գիտեմ»:
Մովսես Խաչատրյանը Շիրակի մարզի Սպանդարյան գյուղի բնակիչ է: Նա համակարգում աշխատել է և սպասարկել Արթիկն ու հարակից գյուղերը: «Ես ինչի՞ համար հրաժեշտ տվեցի իմ պաշտոնին, նաև մեկ բանի համար. ո՞ւմ գնամ ասեմ՝ ուղարկիր թող բանակ ծառայի տղադ, երբ ես ուղարկեցի, և նա չվերադարձավ…»:
Մովսես Խաչատրյանը որդու մահից հետո անդադար նամակներ է հասցեագրել Սերժ Սարգսյանին՝ պահանջելով պատժել զինծառայող որդու մահվան իրական մեղավորներին: Նա մի քանի անգամ հիշեցրել է իր նամակներում «Հավատանք և փոխենք» կարգախոսը և պահանջել փոխել համակարգը: Նա ասում է, որ զեկուցագիր է գրել սեփական ձեռքով, երբ զգացել է, որ այլևս չի կարող սպասարկել ռեժիմին:
«Ես հասկացա, որ նաև նամակս խփել է մեխին, ու անմիջապես զեկուցագիր գրեցի՝ հետաքրքիր բնույթի, որ անարդարությունների հետ կապված ու երկրում տիրող անօրինականության պատճառով հրաժարվում եմ կրել իմ պագոնները ուսերիս, ամոթ եմ համարում ոստիկանի ուսադիրը, դրա համար հրաժարվում եմ աշխատանքից: Մարզային ոստիկանությունում կանչեցին, խնդրեցին փոխել, սովորական զեկուցագիր դարձնել, թե իբր այլ աշխատանքի անցնելու համար խնդրում եմ, որ ինձ ուղարկեն թոշակի: Ես հրաժարվեցի»:
Մովսես Խաչատրյանի խոսքերով՝ զեկուցագիրը զարմանալի արագությամբ հապճեպորեն ի գիտություն են ընդունել ու մեկ շաբաթում ազատման հրաման տվել:
«Շատ արագ, հապճեպորեն Վովա Գասպարյանը մեկ շաբաթում ազատման հրամանս տվեց: Ես համակարգում եմ եղել, դեռ նման հապճեպ հրաման չեմ տեսել: Դրա համար զեկուցագրի կոպիան վերցրի, վրան ոչ մի մակագրություն էլ չկար, մի երկու բան էին ընդգծել՝ «ապօրինություն», «անարդարություն» բառերի տակ, ու ազատման հրաման էր տվել: Իրա ուսերին շատ բան է նստած, գիտեք՝ որքան արյուն է խմել այդ Վովա Գասպարյանը: Նա, բնական է, որ պիտի ազատվեր ինձ պես մարդկանցից… Ես որդի էի կորցրել, բայց ինքը այնքան արագորեն ազատվեց ինձանից»:
Ոստիկանության կապիտանը անդրադարձավ նաև ՀՀ ոստիկանապետի վերջին շրջանի աղոթքին հայ հանրության հետ և նաև այսօր արած հայտարարությանը, թե Երևանի ոստիկանապետի հրաժարականի հարցում կար Տիրոջ կամքը: «Առանց Տիրոջ կամքի անգամ տերևը ծառից ներքև չի ընկնում»,- ասել էր ՀՀ ոստիկանապետը: Իսկ Մովսես Խաչատրյանը ասաց. «Իրա ձեռքերին այնքան արյուն կա, որ ինչքան էլ աղոթի էս կյանքում, որ փրկվի դժոխքից, չի մաքրվելու, ես հայտարարում եմ, և այդպես էլ նշեք»:
Աղբյուրը` http://www.galatv.am/news/view/vova-gasparyan-movses-khachatryan.html