0 8000 12 11

2013 թ. հունիսի 19-ին ՀՀ Լոռու մարզի ընդհանուր իրավասության դատարանում տեղի ունեցավ ՀՔԱ Վանաձորի գրասենյակի ներկայացուցչի հարձակման գործով բողոքի քննությունն ընդդեմ ՀՀ ոստիկանության ՔԳՎ ԼՄ քննչական բաժնի:

Հիշեցնենք, որ նախորդ նիստի ժամանակ ՀՔԱ Վանաձորի գրասենյակի ներկայացուցիչ Կ. Թումանյանը ներկայացրել էր կազմակերպության բողոքը, իսկ պատասխանող կողմը` միջնորդություն, որտեղ նշել էր, որ լրացուցիչ ժամանակ է խնդրում` նյութերին ծանոթանալու և իր դիրքորոշումը ներկայացնելու համար:

Նիստի ժամանակ, ներկայացնելով իր պատասխանը, դատախազի տեղակալ Մ. Մովսիսյանը հիշեցրեց, որ ՀՔԱ Վանաձորի գրասենյակի նախագահ Ա Սաքունցը հաղորդում էր ներկայացրել, որտեղ նշված էր գույքը վնասելու և կազմակերպության աշխատակցին մարմնական վնասվածք պատճառելու վերաբերյալ, ինչի համար քննիչը նյութեր էր նախապատրաստել, սակայն հանցակազմի բացակայության պատճառով` քրեական գործ չէր հարուցվել:

Կազմակերպության ներկայացուցիչ Կ. Թումանյանի այն հարցին, թե նախաքննության ժամանակ քննիչն ինչո՞ւ ուշադրություն չի դարձրել քրեական օրենսգրքի 162-րդ հոդվածին («Այնպիսի կրոնական կամ հասարակական միավորում կազմելը կամ ղեկավարելը, որի գործունեությունը զուգորդված է անձանց առողջությանը վնաս պատճառելով կամ անձանց այլ իրավունքների դեմ ոտնձգություններով, ինչպես նաև անձանց իրենց քաղաքացիական պարտականություններից հրաժարվելուն դրդելով՝ պատժվում է տուգանքով՝ նվազագույն աշխատավարձի երկուհարյուրապատիկից չորսհարյուրապատիկի չափով, կամ կալանքով՝ առավելագույնը երեք ամիս ժամկետով»), Մ. Մովսիսյանը պարզաբանեց, որ քննիչը չէր կարող իր որոշումը կայացնելու ժամանակ անդրադառնալ բոլոր հոդվածներին:

Պատասխանող կողմը հայտնեց նաև, որ հարձակումը նախօրոք պլանավորված չէր, իսկ ստորագրահավաքը կազմակերպվել էր համպատրաստից` հավաքի ընթացքում:

ՀՔԱ Վանաձորի գրասենյակի ներկայացուցիչ Կ. Թումանյանն առարկեց` նշելով, որ միջադեպը պլանավորված է եղել, և այդ մասին վկայում է կազմակերպության կողմից դատարան ներկայացրած տեսաձայնասկավառակը:

Դատարանը, նյութերին ծանոթանալու համար, նոր դատական նիստ նշանակվեց 2013 թ. հունիսի 28-ին` ժամը 12:00-ին: