«Բաղրամյան 26-ը դեռ որոշում չի կայացրել՝ ինչ անել Շանթ Հարությունյանի եւ իր ընկերների հետ»
05:52, January 9, 2014 | Այլ լրատվամիջոցներ, Նորություններ | Արդար դատաքննության իրավունք | Քաղբանտարկյալներ
«Ասպարեզը» Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցից հետաքրքրվեց, թե իր կարծիքով, Հայաստանում քաղբանտարկյալներ գոյություն ունե՞ն, թե՞ ոչ: Ա.Սաքունցի պարզաբանմամբ, մեր երկրում քաղբանտարկյալներ կան եւ Շ.Հարությունյանի ու իր ընկերների նկատմամբ քրեական հետապնդումը բացարձակ որեւէ հիմք չունի:
«Դա սադրիչների՝ ոստիկանության կողմից կառավարվող անձանց՝ քաղաքացիական հագուստով ոստիկանության աշխատակիցների սադրանքի հետեւանքով ստեղծված իրավիճակում խժդժության պատկերի հիման վրա իմիտացիայի ստեղծում էր, որ, իբր թե, Շանթը խախտել է հասարակական կարգը, ոստիկանների նկատմամբ բռնություն գործադրել: Իրականությանը չհամապատասխանող փաստերի հիմա վրա Շանթի եւ իր ընկերների նկատմամբ քրեական գործ են հարուցել, ինչը քաղաքական հետապնդում է: Նրանց նկատմամբ քննչական մարմինների գործողությունները եւս քաղաքական հետապնդման տրամաբանական շարունակությունն են»,-պարզաբանեց զրուցակիցս:
Ա.Սաքունցը նշեց, որ մենք 2014 թվական մուտք գործեցինք՝ ունենալով արդեն 14 քաղբանտարկյալ,ինչը լուրջ մարտահրավեր է մեր հանրության համար, քանի որ իշխանություններն այդպիսով իրենց վերաբերմունքն են արտահայտում մարդկանց նկատմամբ, հատկապես՝ Շ.Հարությունյանի, ով հրապարակային իր բողոքն արտահայտեց Հայաստանի՝ Մաքսային միությանն անդամակցելու Սերժ Սարգսյանի միանձնյա որոշման դեմ: «Արդեն 15 օր է՝ Շ.Հարությունյանը գտնվում է հյուծված վիճակում: Ես իրեն տեսել եմ, չնայած Շանթի տրամադրությունը, կամքը եւ վճռականությունը տեղն են, բայց առողջական վիճակը լավ չէ, չնայած, առայժմ իր ոտքերով կարողանում է տեղաշարժվել: Քննչական մարմինները արգելանք են դրել, որպեսզի Շանթի հարազատները հնարավորություն չունենան իրեն տեսակցել: Շանթի ընկերները՝ Վահեն եւ Լիպարիտն էլ արդեն 9-10 օր է, ինչ հացադուլի մեջ են գտնվում»:
Ա.Սաքունցին հարցրեցի, թե իր կարծիքով, ինչու՞ մինչեւ հիմա չեն հրապարակվում Շ.Հարությունյանի դատաբժշկական փորձաքննության արդյունքները, քանի որ իշխանության ներկայացուցիչները պնդում էին, թե իբր Շանթը հոգեկան հիվանդ է: «Բաղրամյան 26-ը դեռեւս վերջնական որոշում չի կայացրել, թե քրեական հետապնդումն ի՞նչ ընթացքով պետք է իրականացվի, այսինքն՝ ի՞նչ անեն Շ.Հարությունյանի եւ իր ընկերների հետ: Իրավական հիմքերի բացակայության պամաններում պետք է հորինեն: Դատաբժշկական փորձաքննությունն ունի էական նշանակություն, քանի որ եթե մասնագետներին թողնվեր, որ նրանք եզրակացություն կազմեն, ապա նրանք պետք է միանշանակ եզարակացնեն, որ Շ.Հարությունյանը ողջամիտ է, իր գոծողությունները գիտակցել է եւ այդ պարագայում դատական գործընթացները կվերածվեին քաղաքական քննարկումների, երբ մարդիկ իրենց տեսակետները կհայտնեին, գնահատականներ կներկայացնեին ոչ միայն դատարանին, այլեւ՝ հանրությանը: Իշխանությունը քայլ է կատարել մեկուսացնելու Շանթին քաղաքական գործունեությունից, բայց հետագա քայլերի մասին չի մտածել: Շանթն ընդհանրապես հոգեկանի հետ կապված խնդիրներ չունի: 2008 թվականի մարտի 1-ի դեպքերի ժամանակ էլ նա այդ առումով խնդիրներ չի ունեցել»,-պարզաբանեց Ա.Սաքունցը:
Աղբյուրը՝ http://www.asparez.am/news-hy/baxramyan_26__der_voroshum_chi_kayacrel-hy/#more-39682