0 8000 12 11

2014 թ. մարտի 7-ին ՀՀ Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում վերսկսվեց Լիա Միսակյանի մահվան դեպքի առթիվ, Լիլիթ Վարդանյանի և Զարինե Այվազյանի նկատմամբ հարուցված քրեական գործով դատաքննությունը: Դատաքննության ընթացքում հարցաքննվեցին տուժողի իրավահաջորդ,Գեորգի Միսակյանը` Լ. Միսակյանի հայրը, այնուհետև գործում որպես վկա ներգրավված Լիա Միսակյանի մայրը՝ Աշխեն Բաբայանը:

Վերջիններս պատմելով դեպքի մանրամասները հայտնեցին, որ 2012 թ. դեկտեմբերի 31-ին երեխայի վիճակը վատացել է, շտապօգնություն են կանչել և  տեղափոխել «Արաբկիր» ԲԿ: «Արաբկիր» ԲԿ-ում երեխային ընդունել է բոքսային բաժանմունքի մանկաբույժ, օրվա հերթապահ Լիլիթ Վարդանյանը: Վերջինս, Ա. Բաբայանից տեղեկանալով Լիա Միսակյանի հիվանդության մասին, լսել է երեխայի թոքերը և ստուգել կոկորդը: Մանկաբույժը հայտնել է, որ երեխայի թոքերը մաքուր են, կոկորդը թեթև կարմրած է, ախտորշել է վիրուսային վիճակ: Ջերմությունը չափելուց հետո երեխային տեղափոխել են հիվանդասենյակ, որտեղ նրան կաթիլային են միացրել և ջերմիջեցնող դեղորայք տվել: Նույն օրը երեխայից արյան հետազոտության նշում են վերցրել: Բժշկուհի Լ.Վարդանյանը գիշերային հերթապահության ժամանակ այցելել է Լ. Միսակյանի հիվանդասենյակ, հետաքրքրվել առողջական վիճակով:

Հաջորդ օրը՝ 2013 թ. հունվարի 1-ին, հերթափոխն ընդունել է Զարինե Այվազյանը, ով երեխայի վիճակի մասին տեղեկանալու համար խոսել է Ա. Բաբայանի հետ հիվանդասենյակի դռան մոտ, չի հետազոտել երեխային, իսկ կոկորդի կարմրության վերաբերյալ ծնողի անհանգստությանն ի պատսխան ուղղակի հայտնել է, որ «դա վիրուսային ֆոն է, կանցնի, բուժման համար անհրաժեշտ բոլոր միջոցները երեխային փոխանցվում են կաթիլայինի միջոցով»:

Հունվարի 1-ին նախորդ օրը հանձնած արյան անալիզի արդյունքները չեն ստացվել, սակայն Լ.Միսակյանի ծնողներին բուժքույրը տեղեկացել է, որ երեխայի արյան անալիզը ցույց է տվել, որ լեյկոցիտների քանակը նորմայից քիչ է: Երեկոյան երեխան արդեն սկսել է դժվարությամբ շնչել, սնունդ չի կարողացել ընդունել, ջուր կարողացել է խմել ներարկիչի միջոցով: Երեխայի մոտ սկսվել են փսխոցներ: Ամբողջ օրվա ընթացքւմ հերթապահ բժշկուհին այլևս չի այցելել հիվանդասենյակ, չի զննել հիվանդին:

2013 թ. հունվարի 2-ին հերթապահությունն ընդունել է բժշկուհի Իրինա Մամյանը, ով, տեսնելով արյան անալիզի պատասխանները, ասել է, որ լեյկոցիտների քանակը ցածր է և նշանակել կրկնակի հետազոտություն: Կատարվել է երեխայի թոքերի ռենտգեն, որից պարզվել է, որ երեխայի մոտ առկա է աջ թոքի բորբոքում, կոկորդի հետազոտությունից հետո պարզվել է, որ երեխայի մոտ թարախային պրոցես կա, որից հետո մաքրել են կոկորդը: Բժշկուհի Ի. Մամյանը նշանակել է հակաբակտերիալ դեղամիջոց: Թթվածին ընդունելուց հետո Լ.Միսակյանը ավելի թույլ է զգացել, ծնողները փորձել են կերակրել երեխային, սակայն նա չի կարողացել ուտել: Այնուհետև նրա շուրթերը կապտել են, բիբերը լայնացել են, բժշկին կանչելուց հետո երեխային տեղափոխել են վերակենդանացման բաժանմունք, որտեղ էլ երկու ժամ անց, ինչպես հայտնել է ծնողներին բժիշկը, գրանցվել է սրտի կանգ և երեխայի կյանքը փրկել չի հաջողվել:

Վկաների հարցաքննությունից հետո կողմերը հնարավորություն ունեցան իրենց հարցերն ուղղել նրանց և ստանալ պատասխաններ: Պաշտպանների միջնորդեցին դատարանին ընթերցել Գ. Միսակյանի և Ա. Բաբայանի նախաքննական ցուցմունքները, գտնելով, որ կան հակասություններ նախաքննության ժամանակ տրված ցուցմունքների հետ:

Տուժողի իրավահաջորդի ներկայացուցչի և մեղադրողի պնդմամբ նման հակասություններ չկային: Այնուամենայնիվ դատարանը բավարարեց պաշտպանների միջնորդությունը:

Տուժողի իրավահաջորդ Գ. Միսակյանը և գործով վկա Ա. Բաբայանը հայտնեցին, որ նախաքննության ընթացքում ցուցմունքները իրենք են գրել և ճիշտ է, իսկ դատաքննության ընթացքում տրված ցուցմունքները հանդիսանում են լրացուցիչ տեղեկատվություն:

Աշխատանքային օրվա ավարտի պատճառով դատական նիստը հետաձգեց, հաջորդ դատական նիստը տեղի կունենա 2014 թ. մարտի 24-ին, ժամը 11:00-ին, որի ընթացքում կհարցաքննվեն գործով ներգրավված մյուս վկաները:

Այս մասին այլ նյութեր՝ http://iravaban.net/53056.html

http://www.armtimes.com/hy/read/49060

http://www.aravot.am/2014/03/07/438380/

http://news.am/arm/news/197741.html