ՀՔԱ Վանաձորի գրասենյակը դիմել է ՀՀ ՀՔԾ ԼՂՀ-ում հարուցված քրեական գործի քննությունը ՀՀ-ում շարունակելու խնդրանքով
17:45, March 19, 2014 | Նորություններ, Սեփական լրատվություն | Ոստիկանություն
Ինչպես արդեն տեղեկացրել էինք ՀՔԱ Վանաձորի գրասենյակը Կարեն Գևորգյանի ազատության և անձեռնմխելիության իրավունքի խախտման վերաբերյալ հանցագործության մասին հաղորդում էր ներկայացրել ՀՀ գլխավոր դատախազին: Հաղորդման հիման վրա 2014թ-ին մարտի 12-ին ՀՀ ՀՔԾ-ում հարուցվել էր քրեական գործ: Մինչ այդ մարտի 1-ին ԼՂՀ ոստիկանությունում կայացվել է որոշում, որի համաձայն Կարեն Գևորգյանը ԼՂՀ քրեական օրենսգրքի 360-րդ հոդվածի 1-ին մասի հատկանիշներով մեղադրվում է հանցագործության մեջ: Հարկ է ևս մեկ անգամ նշել, որ այս հոդվածը բացարձակապես կապ չունի այն հանցագործության հետ, որը վերագրվում է Կ. Գևորգյանին:
2014-ի մարտի 17-ին Կարեն Գևորգյանը կազմակերպությանը հայտնել էր, որ ԼՂՀ քննչական վարչությունից զանգահարել են և իրեն կանչել հարցաքննության: Մինչ այդ Կ. Գևորգյանը նույն քննչական վարչության աշխատակիցների կողմից փետրվարի 18-ից 22-ն ընկած ժամանակահատվածում ապօրինի ազատազրկված է եղել և ֆիզիկական ու հոգեբանական ճնշումների ներքո նրանից ցուցմունք է վերցվվել:
Կազմակերպությունը մտահոգվելով Կարեն Գևորգյանի նկատմամբ ԼՂՀ իրավապահ մարմինների կողմից ճնշումների և ոտնձգությունների հնարավոր կիրառումից նույն օրը ՀՀ ՀՔԾ պետ Վ. Շահինյանին գրություն է ուղարկել խնդրանքով ապահովել Կ. Գևորգյանի անվտանգությունը որպես նրա իրավունքների պաշտպանության երաշխիք, կամ նրա նկատմամբ հարուցված քրեական գործի քննությունը տեղափոխել ՀՀ: