Կեղտոտ քարով դեղերը ջարդում էին, լցնում բերանս. տիկին Ժուլետան տանը չի մնում, որ նորից չհայտնվի հոգեբուժարանում
17:29, February 19, 2014 | Այլ լրատվամիջոցներԵրեւանի Սվազյան փողոցի 12 հասցեում եղբոր ընտանիքի հետ բնակվող Ժուլետա Ամարիկյանը պնդում է, որ եղբայրը փորձում է իր ծնողներից ժառանգություն ստացած տունը վաճառել, իսկ իրեն վաճառված բնակարանից մասնաբաժին չտալու համար ուղարկել հոգեբուժարան:
«Իմ ծնողները, որ ողջ էին, նման բան չկար: Հիմա ինձ ծեծում ա, ասում ա` ամբողջ տունն ինձ տուր, գնա: Հինգ տարի ա՝ դիմում եմ ոստիկանություն, ոստիկանությունը գումարը վերցնում ա, կեղծ արձանագրություն ա կազմում, ինձ ուղարկում Ավանի հոգեբուժարան: Եղբայրս ինձնից պահանջում ա իմ սենյակը, ասում ա` դու ուզում ես առանձնանաս, մի տղայի հետ ամուսնանաս: Բայց ես ընկեր չունեմ: Թող ինձ համար մի առանձին տուն առնեն, ես հեռանամ, ես ոչ մեկի հետ խնդիր չունեմ»,- NEWS.am-ի հետ զրույցում ասաց տիկին Ժուլետան, որն ստիպված տնից հաճախ բացակայելով` խուսափում է շտապօգնության մեքենայով իր հետեւից եկած բժիշկներից:
«Մի գիշեր վեր կացա, որ ջուր խմեմ, լսեցի, որ ախպերս պատշգամբում խոսում ա, ասում ա` հիվանդ ա, եկեք տարեք: Գիշերվա կեսին տնից դուրս եմ եկել, մոտս 3 հազար դրամ փող ա եղել, տաքսի եմ նստել, գնացել բարեկամի տուն: Ախր ես հիվանդ չեմ, ինչի՞ են ինձ տանում հոգեբուժարան: Որ ինձնից ազատվե՞ն»,- պատմեց տիկին Ժուլետան, որը 2013թ. մայիսի 30-ից հունիսի 28-ը ստիպված է եղել մնալ Ավանի հոգեբուժական կլինիկայում:
Նրա խոսքով, հոգեբուժարանում իրեն ստիպել են դեղեր ընդունել, որոնցից ինքը հրաժարվել է:
«Բերանս զոռով բացում, դեղերը լցնում էին: Կեղտոտ քարով դեղերը ջարդում էին, լցնում բերանիս մեջ: Ես իրենց ասում էի, որ դեղերից ալերգիա ունեմ: Մի տասը օր էլ Էրեբունու հիվանդանոցում եմ պառկել ալերգիայի համար»:
Ժուլետա Ամարիկյանին Ավանի հոգեբուժարանում հարկադիր բուժման ենթարկելու պահանջով հոգեբուժարանի տնօրեն Արեգա Հակոբյանը դիմել է դատարան։ Փետրվարի 26-ին դատարանը կկայացնի վճիռը։ Մինչեւ այդ տիկին Ժուլետան փորձում է տանը չմնալ՝ իր հետեւից եկած բժիշկներից խուսափելու համար։
Աղբյուրը՝ news.am