0 8000 12 11

Ինչպես տեղեկանում ենք  Դատալեքս տեղեկատվական համակարգից, օգոստոսի 12-ին Սյունիքի մարզի ընդհանուր իրավասության դատարանում վարույթ է ընդունվել գոմեշի մսի հայտնի գործը, որի նախաքննությունը սկսվել էր դեռ  2012թ.-ի ամռանից:

Հիշեցնենք, որ Լեռնային Ղարաբաղի պաշտպանության բանակի   զորամասերից մեկում   տավարի ոսկրոտ  մսի  փոխարեն  մատակարարվել էր   գոմեշի սառեցված միս:  Հարուցված քրեական գործի շրջանակներում  մեղադրյալի աթոռին է հայտնվել Կապանի «Ա. Օհանջանյան» ՍՊԸ-ի տնօրեն Ալբերտ Օհանջանյանը, ում մեղադրանք է առաջադրվել այն բանի համար, որ նա ընդհանուր առմամբ 82 տոննա տավարի ոսկրոտ քառատված մսի փոխարեն մատակարարել է նույն քանակությամբ բրիկետ տեսակի հնդկական արտադրության գոմեշի միս, իսկ ՀՀ ՊՆ-ից տավարի մսի դիմաց ստացված գումարը հափշտակել է`ՀՀ ՊՆ -ին պատճառելով առանձնապես խոշոր չափերի`126.936.000 ՀՀ դրամի գույքային վնաս:

Զարմանալին այն է,  որ  նման  առանձնապես խոշոր չափերի  խարդախություն կատարելու հատկանիշներով գործում  մեղադրյալի աթոռին է ոչ թե  պաշտպանության նախարարության բարձրաստիճան որեւէ պաշտոնյա, այլ մատակարարող ընկերության տնօրենը: Ամենաքիչը  տարօրինակ է, թե ինչպե՞ս կարող էր մսի կոմբինատի տնօրենը միայնակ մոլորեցնել  մի ամբողջ նախարարության:

Իրավապաշտպան Արթուր Սաքունցը Ալբերտ Օհանջանյանին  որպես քավության նոխազ  է դիտարկում․ «Նախ պետական գնումները հայտարարվում է պետական գնումների կոմիտեի ծառայության կողմից: Եթե նույնիսկ Ալբերտ Օհանջանյանը այդ 82 տոննա տավարի ոսկրոտ   քառատված մսի փոխարեն նույն քանակությամբ բրիկետ տեսակի  գոմեշի միս է մատակարարել, ապա 82 տոննան դա միանգամյա մատակարարում չի, դա պարբերական բնույթ է կրել, հաջորդը, որ այդ միսը, որ ընդունվում է և մատակարարվում է Զինված ուժեր, պետք է անպայման ստուգվի սննդամթերքների համապատասխանությունը այն գնումներին, որը պաշտպանության նախարարության համար կազմակերպվել է և նշվել է: Ես դա գնահատում եմ կանխամտածված անվերահսկողություն: Մեղադրանք  պետք է առաջադրվեր   ոչ միայն Ալբերտ Օհանջանյանին,  երևի թե Ալբերտ Օհանջանյանին ամենավերջինը պետք է մեղադրանք առաջադրվեր,  և առաջին հերթին պետք էր ՊՆ աշխատակցին մեղադրել, տվյալ դեպքում պաշտպանության նախարարի տեղակալին կամ գլխավոր շտաբի պետի տեղակալին, ովքեր  զբաղվել են մատակարարմամբ:  Գտնում եմ, որ նման ծավալների գումարների վնասը դա ակնհայտ էր, և չէին կարող տեղյակ չլինեին բարձրաստիճան զինվորականությունը, և ես հիմնավոր կասկած ունեմ, որ  գումարների վնասը դա ավելի շատ յուրացում է՝ ատկատ, որի մասին  Սերժ Սարգսյանը ասեց իր հայտնի ելույթում»,- ասաց իրավապաշտպանը:

Արթուր Սաքունցը համոզված է, որ իրականացվել է ոչ  օբյեկտիվ քննություն, ՊՆ բարձաստիճան սպաները անմիջական մասնակցություն  են ունեցել, սակայն հետաքննությունը տարվել է  նրանց հովանավորելու միջոցով:

Իրավապաշտպանից հարցրեցինք, թե վերջինս ակնկալու՞մ է, որ արդեն դատական նիստի ընթացքում նոր բացահայտումներ կլինեն և այլ անուններ ևս կհնչեն:

«Ալբերտ Օհանջանյանն այն վիճակում չէ, որ մի ամբողջ նախարարության վերաբերյալ ճշմարտությունն ասի, որովհետև ես անձամբ համոզված եմ, որ եթե նա ճշմարտությունը ասի, ապա երաշխիք չունի, որ ինքը ողջ կմնա, սա միանշանակ, հստակ եմ ասում»,- ԳԱԼԱ-ի հետ զրույցում նշեց Արթուր Սաքունցը:

Հետաքրքրական նաև այն փաստն է, որ ՀՀ գերագույն գլխավոր հրամանատարը նախաքննության ընթացքում  չարաշահումների  մասին խոսելիս հնչեցրել էր նաև Հայաստանի Զինված ուժերի գլխավոր շտաբի պետի տեղակալ, գեներալ-լեյտենանտ Արշալույս Փայտյանի անունը, այս անունը, սակայն, քրեական գործում չի հայտնվել: Վերջինիս   2012 թվականի  սեպտեմբերի 6-ին  Սերժ Սարգսյանի  հրամանագրով աշխատանքից ազատեցին՝ առանց որևէ դրդապատճառ նշելու:

Աղբյուրը՝ galatv.am