0 8000 12 11

Գյումրիում դաժանաբար սպանված Ավետիսյանների ընտանիքի իրավահաջորդներից Անդրանիկ Պողոսյանի՝ սպանված հարսի հոր ներկայացուցիչները՝ ՀՔԱ Վանաձորի գրասենյակի իրավապաշտպաններ Արթուր Սաքունցը եւ Արայիկ Զալյանը, դաժան սպանության գործը քննող քննչական խմբին մի շարք միջնորդություններ են ներկայացրել:

Նրանք երեք դիմում են հանձնել քննչական խմբին, որոնցից առաջինով տեղեկացրել են, որ տուժողի իրավահաջորդ Անդրանիկ Պողոսյանը մինչ օրս որևէ տեղեկություն չունի դստեր և նրա ընտանիքի անդամների սպանության վերաբերյալ քննվող գործի ընթացքի մասին: Իրավահաջորդի ներկայացուցիչները խնդրել են քննչական խմբի ղեկավարից իրենց տրամադրել քրեական գործում առկա բոլոր որոշումների պատճենները՝ այդ թվում ՀՀ և ՌԴ քննչական կոմիտեների միջև կնքված համաձայնագրի պատճենը: «Միաժամանակ նույն դիմումով խնդրել ենք հնարավորություն ընձեռել ծանոթանալ առաջադրված մեղադրանքի հետ, հնարավորություն ընձեռել նշանակված փորձաքննություններին մասնակցելու և փորձագետներին հարցեր ուղղելու»,- ԳԱԼԱ-իհետ զրույցում ասաց իրավապաշտպան Արայիկ Զալյանը:

Երկրորդ դիմումով իրավապաշտպանները խնդրում են փոխել Վ. Պերմյակովին առաջադրված մեղադրանքը:

«Գտնում ենք, որ Վալերի Պերմյակովը, բացի ՀՀ քրեական օրենսգրքի 104-րդ հոդվածի հատկանիշներով կատարված հանցագործությունը, կատարել է այլ հանցագործություններ ևս: Առաջարկել ենք ՀՀ քրեական օրենսգրքի 235-րդ հոդվածով նախատեսված արարք (ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) կատարելու հիմքով մեղադրանք առաջադրել՝ լրացնելով նախկինում առաջադրված մեղադրանքը: Եվ ապա Վ. Պերմյակովին պետական սահմանն ապօրինի հատելու համար եւս մեղադրանք առաջադրել»,-ասաց իրավապաշտպանը:

Ինչ մնում է երրորդ դիմումին, ՀՔԱ Վանաձորի գրասենյակի իրավապաշտպանները գործի հետ առնչվող մի ամբողջ հարցաշար են ուղարկել, այդ թվում.

1. Վարույթն իրականացնող մարմնի կողմից ի՞նչ միջոցներ են ձեռնարկվել Վալերի Պերմյակովին Հայաստանի Հանրապետությանը հանձնելու ուղղությամբ,

2. ՌԴ կողմից հարուցված է արդյո՞ք քրեական գործ, թե ոչ, եթե այո, ապա Վալերի Պերմյակովին ի՞նչ մեղադրանք է առաջադրվել,

3.Վալերի Պերմյակովի կողմից հայ-թուրքական սահմանը խախտելու փորձի առիթով հարուցվե՞լ է քրեական գործ, թե ոչ,

4. Ռուսաստանի Դաշնության կողմից հարուցված քրեական գործով Ավետիսյանները տուժող, նրանց հարազատները տուժողի իրավահաջորդներ ճանաչվե՞լ են, թե ոչ,

5. Ի՞նչ փորձաքննություններ են նշանակվել (դատաբժշկական, դատաձգաբանական, հետքաբանական և այլն),

6. Ոստիկանությունը հանցագործության մասին ե՞րբ է տեղեկություն ստացել, ի՞նչ գործողություններ են իրականացվել Վ. Պերմյակովին հայտնաբերելու ուղղությամբ և ում կողմից,

7. Ե՞րբ է հայտնաբերվել Վ. Պերմյակովը, ում կողմից և որտեղ,

8. Հայտնաբերվելուց հետո ու՞ր է տեղափոխվել Վ. Պերմյակովը,

9. Թիվ 102 ռազմաբազայի սպայական անձնակազմը ե՞րբ է իմացել Վ. Պերմյակովի՝ զորամասը լքելու փաստի մասին, ի՞նչ միջոցառումներ են իրականացվել նրան հայտնաբերելու ուղղությամբ,

10. Ե՞րբ է սկսվել դեպքի վայրի զննությունը Ավետիսյանների բնակարանում,

11. Ի՞նչ նմուշներ են վերցվել Ավետիսյանների բնակարանից, ում կողմից և երբ,

12. Հարուցված քրեական գործի շրջանակներում ովքե՞ր են հարցաքննվել ռազմական բազայից,

13. Պարզվել է արդյո՞ք՝ ռուսական թիվ 102 ռազմաբազայից Ավետիսյանների տուն տանող ճանապարհներին կան տեղադրված տեսանկարահանող սարքեր, թե ոչ (բանկերի, սպասարկման օբյեկտների տարածքում),

• եթե կան տեսանկարահանող սարքեր, ապա արդյո՞ք դրանց կողմից նկարահանված նյութերը առգրավվել են և դրանցից վերծանումներ կատարվե՞լ են, թե ոչ,

14. Պարզվել է արդյո՞ք, թե երբ է զորամասի սպայական անձնակազմը իմացել Վ. Պերմյակովի՝ զորամասը լքելու փաստի մասին, և ի՞նչ միջոցառումներ են իրականացվել նրան հայտնաբերելու ուղղությամբ,

15. Պարզվել է արդյո՞ք, թե ի՞նչ հերթապահություն է իրականացրել Վ. Պերմյակովը, որ հենակետում, ով է եղել հենակետի պատասխանատուն:

Բոլոր այս միջնորդությունները ներկայացվել են քննչական խմբին, եւ հիմա, ըստ իրավահաջորդ Ա. Պողոսյանի ներկայացուցիչների, իրենք սպասում են ՀՀ քննչական խմբի պատասխան գործողություններին:

Աղբյուրը՝ galatv.am