Արթուր Սաքունց. «Պերմյակովի դատավարությունը թատրոն էր»
11:03, August 14, 2015 | Այլ լրատվամիջոցներ, Նորություններ
«Վալերի Պերմյակովի գործի առանձնահատկությունը նկատի ունենալով, քանի որ վերջինս առնչվում է Ավետիսյանների ընտանիքի սպանության հետ, նրան 10 տարով դատապարտելը ավելի շատ պոպուլիստական որոշում եմ համարում, որի նպատակն էր հաճոյանալ Հայաստանի հասարակությանը` հաշվի առնելով այդ գործի նկատմամբ հանրային մեծ ուշադրությունը: Այլ պարագայում, եթե Պերմյակովը չմեղադրվեր սպանության մեջ, առավել քան համոզված եմ, որ պատիժը ավելի քիչ էր լինելու»,- Aravot.am-ի հետ զրույցում ասաց Հելսինկյան քաղաքացիական ասամբլեայի Վանաձորի գրասենյակի ղեկավար, իրավապաշտպան Արթուր Սաքունցն` անդրադառնալով երեկ տեղի ունեցած դատավարությանը եւ հրապարակված վճռին: Իրավապաշտպանին նման եզրահանգման հիմք է տվել նաեւ մեղադրողի խոսքը, ով իր ելույթում նշեց, որ Պերմյակովը մեծ վնաս հասցրեց հայ-ռուսական բարեկամությանը եւ Հայաստանում` ՌԴ-ի վերաբերյալ բացասական կարծիքի ձեւավորմանը, քանզի դատաքննություն էր տեղի ունենում եւ նշյալ բաներն իրավական կատեգորիայում որեւէ կերպ չեն տեղավորվում: Ավելին, դա որեւէ կերպ քրեորեն հետապնդելի արարք չի ու նման հոդված էլ չկա, որով մարդուն հնարավոր լինի մեղադրել: «Դա ապացույցն է նրա, որ երեկվա դատավարությունը ամբողջությամբ թատերական ներկայացում էր` նախօրոք մշակված, բայց վատ սցենարով, քանզի շատ հարցերի պատասխաններ այդպես էլ չհնչեցին: մասնավորաբար, այդպես էլ հստակություն չստացավ պատճառը, որի համար Պերմյակովը լքել էր զորամասի տարածքը: 1,5 ամսվա ընթացքում ընտանիքին կարոտելով հաստատ նման գործողության չեն գնում, առավել եւս Թուրքիայի տարածքով ՌԴ հասնելու մտադրությունը ամենաֆանտաստիկ տրամաբանության մեջ էլ չի տեղավորվում»,- ասաց մեր զրուցակիցը: Հաջորդ ուշագրավ հանգամանքը կողոպուտի հանգամանքն էր, որը չի համապատասխանում մինչ այս շրջանառության մեջ գտնվող վարկածներին: Թեեւ սա արդեն տվյալ գործի քննության շրջանակների հարց չէ, բայց քանի որ դատավարության ժամանակ այդ մասին էլ խոսվեց, իրավապաշտպանը տարակուսում է` եթե կողոպուտի նպատակ ուներ, այդ դեպքում ինչո՞ւ է մանկահասակ երեխային սպանել: Ընդհանրապես, Արթուր Սաքունցը մի շարք հակասություններ է տեսնում այն ամենում, ինչը ռուսական կողմը ապացուցված փաստ է համարում ու հենց դա էլ նրան հիմք է տալիս պնդել, որ ռուսական կողմը հակված չէ ճշմարտությունը բացահայտել: «Անվստահությունը ռուսական կողմի նկատմամբ էլ ավելի խորացավ: Մի բան է, երբ նման խայտառակ հանցագործություն է կատարվում, այլ բան, երբ դրա բացահայտման եւ արդարադատության իրականացման ուղղությամբ կամք չես տեսնում: Այդ ձգտման բացակայությունը շատ ավելի վտանգավոր ու մտահոգիչ է»,- ասում է մեր զրուցակիցը: Անդրադառնալով դատավարության ժամանակ հնչած այն փաստին, որ ռազմաբազայի ղեկավարությունն իր ուժերով է փորձել հայտնաբերել Պերմյակովին ու հայկական կողմին չի հայտնել զինված զինվորի փախուստի մասին մոտ 7 ժամ, ապա ՀՀ տարածքում օպերատիվ-հետախուզական աշխատանք են կատարել ու այդպիսով նպաստել են ծանր հանցագործության կատարմանը, իրավապաշտպանը ՀՀ-ի ինքնիշխանության նկատմամբ ոտնձգության փաստ է համարում ու գտնում է, որ ՀՀ իրավապահ մարմիններն այդ փաստով պետք է ռազմաբազայի ղեկավարության դեմ քրեական գործ հարուցեն: Իրավապաշտպանը ռուսական ռազմաբազայի ղեկավարության մեկ այլ հանցագործության մասին էլ հիմնավոր կասկածներ ունի` Պերմյակովի ավելի շուտ են հայտնաբերել ու պահել իրենց մոտ` մինչեւ որոշեն սցենարը: «Ու ներկայացվեց թատրոնը, որ իբր բռնել են սահմանը խախտելու ժամանակ: Այսպիսով, ռուսական կողմը Պերմյակովի վրա նաեւ սահմանը խախտելու հիմնավորումը տվեց: Բայց, քանի որ նրան չեն փոխանցել հայկական կողմին, ինչպես հայ-ռուսական համաձայնագիրն է սահմանում, ուստի, ստացվում է, որ ռազմաբազայի ղեկավարությունը եւ սահմանապահ զորքի ղեկավարությունը եւս մեկ հանցագործություն են կատարել եւ դա երեկվա դատավարությամբ ապացուցվեց: Մենք միջնորդություններ ներկայացրել ենք նրանց նկատմամբ քրեական գործ հարուցելու»,- ասաց Արթուր Սաքունցը` հավելելով, որ սա լրացուցիչ հիմք է պնդելու, որ ռուսական կողմը ամեն գնով կոծկում է Ավետիսյանների սպանության գործի իրական պատճառը ու հանուն դրա պատրաստ է մի շարք հանցագործություններ ընդունել: