0 8000 12 11

Իրավապաշտպան Արթուր Սաքունցը կարծում է, որ բազմաթիվ համագյուղացիների մասնակցությամբ հայ երիտասարդի սպանությունը Ռուսաստանում այսօր տիրող մթնոլորտի արդյունք է: «Այն մթնոլորտը, որը տիրում է Ռուսաստանի դաշնությունում, պայմանավորված է հիմնականում իշխանությունների որդեգրած քաղաքականության բնույթով: Այսինքն՝ բռնության, ռուսական լրատվամիջոցներով քարոզչության հիմքում ընկած է բռնությունը: Դրա դրսևորումներից մեկն է հանդիսանում նաև այս դաժան սպանությունը: Սամասուդ հասկացողությունը դարձել է ոճ: Այսօր, օրինակ, քարոզվում է բռնություն արտասահմանյան ապրանքների ոչնչացման ուղղությամբ, այն դեպքում, երբ ՌԴ-ն ունի այդքան աղքատ և սոցիալապես անապահով բնակչություն»,-մեզ հետ զրույում ասաց իրավապաշտպանը:

Նշենք, որ օգոստոսի 30-ի գիշերը Ռուսաստանի Ռոստովի մարզի գյուղերից մեկում տարբեր տվյալներով 100-300 հոգի ծեծելով սպանել են հայ վարորդ Ռաֆայել Խլղաթյանին, որը դեռ անհայտ պատճառներով կորցրել է մեքենայի կառավարումը և միանգամից 5 մեքենայի հարվածել: Գործն արդեն հանձնվել է քննչական կոմիտեին. կան ձերբակալվածներ: Կատաղած համագյուղացիները ծեծել են նաև հայ երիտասարդի հորը՝ 45-ամյա Սերգեյ Խլղաթյանին: Զոհվածի քույր Էդիտա Միտինան լրատվամիջոցներին ասել է, որ վթարից հետո կատաղած ականատեսները երիտասարդին հանել են մեքենայից եւ սկսել են դաժանաբար ծեծել, մինչև որ սպանել են: Այսօր Ռոստովում հայ երիտասարդի թաղումն է:

Իրավապաշտպան Արթուր Սաքունցը չի կարծում, որ այս վայրագությունը պայմանավորված է էթնիկ պատկանելությամբ: «Որովհետև տարբերակում չկա, ՌԴ-ում առկա է ազգայնամոլության կրկնակի աճ, որի դրսևորումներից մեկը կարող է հանդիսանալ այս սպանությունը: Թե քննչական մարմինները ինչպես կորակեն՝ դժվար է ասել, քանի որ նրանք գնահատական են տալու ըստ քաղաքական նպատակահարմարության: Բայց, որ ՌԴ-ում օրենքի գերակայության տեսակետից արմատական նահանջ կա, սա միանշանակ է: Եվ դա իր դրսևորումները շարունակելու է ունենալ ոչ միայն ազգությամբ հայերի, այլև տարբեր ազգությունների նկատմամբ»,-ասաց Սաքունցը: Ըստ նրա՝ բռնության բռնկումները կարող են պարբերաբար կրկնվել:

Աղբյուրը՝ armtimes.com