0 8000 12 11

ԲՀՀ-Հայաստանի ֆինանսական աջակցությամբ իրականացվող «ՀՔԱ Վանաձորի գրասենյակի կայունությունը ՀՀ –ում՝ ժողովրդավարության և մարդու իրավունքների մարտահրավերների լույսի ներքո» ծրագրի շրջանակներում իրականացվող դասընթացների շարքը մեկնարկեց Գյումրի քաղաքից: «Զորակոչիկների և զինծառայողների իրավունքներն ու պարտականությունները, զորակոչիկների իրավունքների պաշտպանությանն առնչվող իրավական կարգավորումները» թեմայով դասընթացի մասնակիցները հիմնականում նախազորակոչային տարիքի երիտասարդներ էին, տարբեր բուհերի իրավագիտական և իրավաբանական բաժինների ուսանողներ, զորակոչիկների հարազատներ: Դասընթացը վարում էր ՀՔԱ Վանաձորի գրասենյակի խաղաղասիրական ծրագրերի համակարգող Արմինե Սադիկյանը: Վերջինս ներկայացրեց զորակոչիկների իրավունքներն ու պարտականությունները նախազորակոչային ժամանակահատվածում և զորակոչի ընթացքում, մասնավորապես՝ այն հարցերը, որոնք վերաբերում են զինվորական հաշվառմանը, կցագրմանը, զինվորական ծառայությանը զորակոչիկների պիտանիությանը, ինչպես նաև նշված խնդիրները կարգավորող օրենսդրությանն ու դրա կիրառման պրակտիկային: Ներկայացվեցին նաև զինծառայության ընթացքում զինծառայողների իրավունքներն ու պարտականությունները, նրանց տրվող արտոնությունները, բողոքարկման մեխանիզմները, ինչպես նաև սահմանված կարգի խախտմամբ պարտադիր զինվորական ծառայություն չանցած քաղաքացիներին առնչվող իրավական կարգավորումները: Անդրադարձ կատարվեց զորակոչիկների և զինծառայողների բժշկական փորձաքննության իրականացման մեխանիզմներին:

Մասնակիցներն իրենց հարցերն ուղղեցին բանախոսին, ներկայացրին տարբեր իրավիճակներ, քննարկեցին իրական դեպքեր:

ՀՔԱ Վանաձորի գրասենյակը շնորհակալություն է հայտնում «Ասպարեզ լրագրողների ակումբ»  հասարակական կազմակերպությանը և Գյումրու քաղաքացիական երիտասարդական կենտրոնին՝ դասընթացի կազմակերպմանն աջակցելու համար:

 Տես նաև՝ asparez.am