Կոտորակված քվեարկություն. իրավապաշտպանի խոսքով` հանրաքվեն բացահայտեց գյուղական վայրերում «իրազեկվածության» խնդրի առկայություն
18:02, December 9, 2015 | Այլ լրատվամիջոցներ, Նորություններ
Կենտրոնական ընտրական հանձնաժողովի հրապարակած արդյունքները, որտեղ տոկոսային տվյալներով արտահայտվում է տվյալ մարզի բնակչության վերաբերմունքը Սահմանադրության փոփոխությունների նկատմամբ, խիստ խնդրահարույց են համարում ընդդիմության, քաղաքացիական հասարակության ներկայացուցիչները, դիտորդական առաքելություն իրականացրած կազմակերպությունները:
Հանրաքվեի արդյունքների ամփոփումից մեկ ժամ անց՝ ընտրատեղամասերում աշխատող վստահված անձինք, դիտորդները «Ֆեյսբուք» սոցիալական ցանցի իրենց էջերում ներկայացնում էին տվյալ ընտրատեղամասի հաշվարկի արդյունքները, որոնցում «ոչ»-ը մեծ տարբերությամբ հաղթանակ էր տանում: Ուշագրավ էին Գյումրու, Վանաձորի, Երևանի ընտրատեղամասերի արդյունքները:
Դեկտեմբերի 7-ին Ազատության հրապարակում անցկացված հանրահավաքում ՀԱԿ խմբակցության քարտուղար Արամ Մանուկյանը իր ելույթում շնորհակալություն է հայտնել այս քաղաքների ընտրողներին՝ քաղաքացիական հասարակությանը:
«Հաղթել ենք բոլոր քաղաքներում, հաղթել ենք բոլոր մեծ գյուղերում, հաղթել ենք օլիգարխներին՝ բդեշխություններում, որտեղ փող են բաժանել, ահաբեկել են, բայց հաղթել ենք: Սարքել են, սարքել, ու նկարչությունը չի տեղավորվել: Մեր հաշվարկներով՝ 600 հազարի չափ «ոչ» է քվեարկվել, 150-200 հազարի չափ՝ «այո»: Հարամելու ենք ձեր գողացած իշխանությունը, ձեր կեղծած իշխանությունը, չենք թողնելու, հարամելու ենք ձեր այստեղ ապրելը…»- ասել է Մանուկյանը:
ԿԸՀ տվյալներով՝ մեծ տարբերությամբ հաղթել է «այո»-ն: Ամենաբարձր տոկոսներ են ապահովել մարզերից՝ Վայոց ձորը՝ 78,50 տոկոս, Արարատը՝ 77,93, Գեղարքունիքը՝ 76,57, Արմավիրը՝ 72,89, Սյունիքը՝ 71,62, նրանց հաջորդում է Կոտայքը՝ 66,58 տոկոսով: Առավել շատ «ոչ» են քվեարկել Երևանում՝ 41,24, Շիրակում՝ 42,43, Լոռիում՝ 39,20 տոկոս: Գյումրում «ոչ»-ը հաղթել է 21.595 ձայնով, Վանաձորում՝ 21.944-ով:
Բարձր տոկոսներ արձանագրած մարզերը հայտնի են որպես այս կամ այն քաղաքական գործչին, ԱԺ պատգամավորին կամ մարզպետին «պատկանող տիրույթ», ինչպես, օրինակ` վարչապետ Հովիկ Աբրահամյանը՝ Արարատի մարզում, ԱԺ պատգամավոր Գագիկ Ծառուկյանը՝ Կոտայքի մարզում, ԱԺ պատգամավորներ Մանվել Գրիգորյանը և Սեյրան Սարոյանը՝ Արմավիրի մարզում, Սյունիքի մարզպետ Սուրեն Խաչատրյանը:
Անձանց ազդեցությունից բացի, փորձագետները նշում են, որ «այո»-ի հիմնական ձայներն իշխանությունն ապահովել է գյուղական բնակչության հաշվին:
Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը նշում է. քաղաքային բնակչությունը՝ Երևան, Գյումրի, Վանաձոր, իրազեկ են, ունեն դիրքորոշում, քան գյուղական բնակավայրերում, որտեղ նաև իրազեկվածության հետ կապված լուրջ խնդիր կար:
«Գյուղերում, որտեղ արտագաղթը, արտագնա աշխատողների թիվը մեծ է, սոցիալական ավելի մեծ դժգոհություններ կան, ու քվեարկում են իշխանության նախաձեռնությանը կողմ` անտրամաբանական է, չկա էսպիսի բան աշխարհի որևիցե մի երկրում, դա միայն կարող է լինել տոտալիտար մոտեցման դեպքերում, երբ ընտրության արդյունքները կեղծում են այնպես, ինչպես սովետական երկրում էր արվում»,- «ԱրմենիաՆաուին» ասում է Սաքունցը:
Ըստ նրա` Գյումրիում ու Վանաձորում, որտեղ քիչ թե շատ կայացած են քաղաքացիական ինստիտուտները, վերահսկողության հնարավորությունները բավականին մեծ եղան, ինչը չի կարելի ասել, օրինակ` Արմավիրի, Արարատի մարզերի մասին: Սաքունցի դիտարկմամբ՝ պետք է շարունակ զարգացնել քաղաքացիական հասարակության ինստիտուտը:
Հանրաքվեում իր ելույթում ՀԱԿ-ի փոխնախագահ Լևոն Զուրաբյանն անդրադարձել է երկրում քաղաքացիական հասարակությանը, նշելով, որ քաղաքացիական լուրջ հասարակություն պետք է կառուցեն նաև այնտեղ, որտեղ տիրում են խաները, լիսկաները և այլք:
Գյումրու ավագանու ընդդիմադիր անդամ, «Ասպարեզ» լրագրողների ակումբի նախագահ Լևոն Բարսեղյանը, անդրադառնալով Գյումրու 1000 դիտորդներին, ովքեր այդ օրը «կռիվ են տվել ռեժիմի դեմ», ֆեյսբուքյան իր էջում գրել է. «Թե ուզում եք` համարեք, որ կրվեցինք էլի, բայց մենք մեր կարեցած ամեն ինչն արեցինք, մենք հպարտ ենք, որ նախրի մեջ չենք կարող լինել, որ մենք յուրահատուկ ենք, մենք ենք ուժեղը, մենք ենք, որ յուրաքանչյուրիս սրտում ամբողջ հայրենիք ունենք, ոչ թե մի ոհմակով` մի կերաման` անունը «Հայաստանի Հանրապետություն», և ոչ մի պարտությամբ մեր հասկացած հայրենիքը չենք զիջելու ոչ մեկին»: