Ոստիկանության ԿՀՊԳ վարչությունը մերժել է քրեական գործ հարուցել՝ ընթացք չտալով ապօրինի կիրառված ԱԱՀ-ի հաղորդմանը
10:05, March 10, 2016 | Այլ լրատվամիջոցներ, Նորություններ
ՀՀ ոստիկանության կազմակերպված հանցավորության դեմ պայքարի գլխավոր վարչությունում մերժվել է Հելսինկյան քաղաքացիական ասամբլեայի Վանաձորի գրասենյակի հաղորդման հիման վրա քրեական գործ հարուցել:
«Քննությունը կատարվել է և նյութերով մերժվել է քրեական գործ հարուցելու պահանջը»,- NewsBook-ի հետ զրույցում հայտնեց ՀՀ ոստիկանության լրատվության բաժնի աշխատակից Արմեն Մալխասյանը՝ հավելելով, որ հաղորդումն ուղարկվել է ՀՀ դատախազություն:
Հիշեցնենք, որ Հելսինկյան քաղաքացիական ասամբլեայի Վանաձորի գրասենյակը փետրվարի 11-ին հանցագործության մասին հաղորդում էր ներկայացրել ՀՀ դատախազություն՝ պնդելով, որ ՀՀ իշխանությունները չարաշահել են պաշտոնական դիրքը՝ ԵՏՄ երկրներից ներմուծվող ավտոմեքենաների նկատմամբ ապօրինի կիրառելով ավելացված արժեքի հարկ: Նշենք, որ ՀՀ գլխավոր դատախազության ՀԿԳՔ վարչության կողմից ուղարկվել էր ՀՀ ոստիկանության կազմակերպված հանցավորության դեմ պայքարի գլխավոր վարչություն՝ սահմանված կարգով ընթացքը լուծելու համար:
Ավելի վաղ Մոսկվայի, Երևանի ու Աստանայի միջև տեղի ունեցած տեսակամուրջի ժամանակ, դժգոհելով Հայաստանի հարկային վարչարարությունից, ԵՏՄ ինտեգրման և մակրոտնտեսության հարցերով նախարար Տատյանա Վալովայան հայտարարել էր, թե Հայաստանի իշխանությունները 20 տոկոս ավելացված արժեքի հարկ են գանձում ԵՏՄ երկրներից Հայաստան ավտոմեքենա ներմուծող ֆիզիկական անձանցից, որը հակասում է միության իրավապայմանագրային դաշտին: Հիշեցնենք նաև, որ Կառավարությունն որոշում է կայացրել չեղարկել ԵՏՄ-ից ներկրվող մեքենաների համար գանձվող ԱԱՀ-ն: